Stubbzen-am lehlak-im, εeqlaγ-t, qqaren ur t-yeẓri.
Nniγ „ẓriγ ayen ur teẓrim, selt-d i imeṭṭi n teγri“!
Zik d amru, ass-a d aselkim i yesseqdaceγ deg wadeg n yeẓri.
Ay at wulawen ur nerkim, a sut tugademt lemri!
Wwteγ uzzal s uqerru, γileγ ad ken-in-taweḍ teqreḥ.
Ẓmiγ-d allaγ d wemru, luḍa d abrid iserreḥ.
Taḍṣa teggul ur tettru, imeṭṭi yerwa anecreḥ.
A ziγ γur-wen d aγurru ufus n tgella d lemleḥ.
Lemri deg-wen izellem, tettwalim-t s wergigi.
D timendeffirt tuzzlem almi tebra i wagus tuggi.
Ffγen-d waman yettawlen, walit urγu la ineggi!
Ayen-nniḍen ur t-tuklalem, yal wa ad yečč i d-yettheggi.
Uḥeqq jmaεliman-nni swayes tettgallam, ur t-tegzim!
Uḥeqq azembil d yesni, uḥeqq aqabac d ugelzim!
Ur tγizem agḍi deg igenni, deg yiman-nneγ ma ur nezzim.
Ay aḥeddad n at Yanni, uγaleγ-d daγen, ttuγ afzim.
Ṭṭfeγ di tεekkazt-ik ay ul, ma necceḍ nekk yid-k ur nuksan.
S yeẓri yettrun nettsmuqul, nekkat ad ṣeggmen wussan.
Arrac ass-a am lleft d webqul akken meccḍen d wamek lsan.
Yal wa ul-is yettebruqqul, sseγrin tadist i ujeğğig yefsan.
Sεan ul γef tin ḥemmlen, unagen akin i tayri.
Ulawen ttebruqqulen, s tikci ufus gren-d tiγri.
A yemma d acu ḥemmlen? D acu-tt εni ziγ tayri?
Steqsaγ iγyal ihemlen, yal wa yenna "nekk d adzayri".
Ula d at laxert slan, s dderz mi d-gren tiγri.
D izdayriyen akken ma llan, d iγyal akk n Lanjiri.
Ddezdayer tesεa imawlan, texḍa-ken a wid ur neẓri.
Steqsit widen iwalan, acku txuṣṣem deg yeẓri!
Mačči deg yeẓri i txuṣṣem, d tafat kan i ulac.
D tallest ternam texxucem, d tirga i ken-yenγan ay arrac.
Ẓriγ deg-i ad teḍṣem, ihi ssufγet-d tuεlac!
A nnaγ lemmer ul ad yessusem, maca, ugadeγ a k-yeṛṛeẓ a nnεac.
Bu wul yemmlen di ddunit yessaram talwit uẓekka.
Kriγ-d azref i targit, awer kem-issineγ a Mekka!
A yemma i telha twaγit, fell-aγ lemmer ur t-tekka.
A nnger-im a taqbaylit, amek ad tiliḍ azekka!
D aḥebber-im i d iyi-yernan afud akken ad idireγ.
D tayri-m i d iyi-yerran sseglafeγ ur ssusmeγ.
Fell-am i yettwanaseγ itran, γas ulamma ur ten-ttawwḍeγ.
Ma tewwḍeḍ kemm γer yetran, ulac ayen ur wwiḍeγ.
Taqbaylit ma tewweḍ itran, ad yasem ufeggag n wuraγ.
Argu ay allaγ yessefran Azwaw s umendil awraγ!
Sεid At Mεemmer