Mraw d yiwen yemdanen i yemmuten di Pakistan, d ifransiwen. Aseggas kan zdat txazzabiyin n 11/09. Ihi ar medden akk tefra, rebrab yessemγ-id acciwen di yal tama n umaḍal: d irebraben inselmen i ten-yenγan. Ar unṣiben n Fransa diγen yif-itt akka: d irebraben i ten-yenγan. Maca sa iseggasen ar zdat, yiwen ubugaṭu n twaculin n wid yemmuten, yenna-d: i ten-yenγan d wid yebγan ad xellṣen Fransa imi ur tefki ara tajεalt i d tṛeggem i imḍebbren unṣiben n udabu n Pakistan. Imḍebbren-agi fkan afus i Fransa akken ad tezzenz ibubaṛ n ddaw waman, les sous-marins, i tmurt n Pakistan, imḍebbren n Fransa ṛeggmen-asen tijεal. Imi nzan ibubaṛ-nni, tijεal ulac, ihi kkren nγan 11 ijenyuṛen n Fransa i ixeddmen dinna deg Pakistan. Zemmem qemmem, kečč ur d-qqar nekkni ur d-neqqar. Mraw d yiwen, “ḥdac”, “onze”, wid ur ḥezzben a ten-nγen, wigi ur ḥezzben ad ffren sebba n tmenγiwt-nsen! Ahat seg imir-nni xellṣen tijuεal-nni. Lemmer ur tent-xellṣen ara ahat ili nγan wiyaḍ.
Tijuεal ttilint-id yal ass deg tmurt n Lezzayer. Acḥal d aṣenfar i ssulint tkebbanyin tibeṛṛanyin deg tmurt s wwet εeddi, imḍebbren neddlen allen-nsen s tjuεal. Acḥal n “les avances forfaitaires” i ferqen imḍebbren n tmurt Lezzayer akk d imḍebbren n tkebbaniyin tibeṛṛaniyin war ma mmusent ula d aḍγaγ, war ma tsers-d tkebbanit-nsen ula d tiqfilt deg tmurt n Lezzayer. Llan yedrimen aṭas deg tmura yecban Lezzayer neγ Pakistan, awi-d kan anwa a ten-iḥewṣen. Aṭas aṭas, buhan, d ahdum n yedrimen, d asif, awi-d kan anwa ad yawin. Ihi “yyaγ ad tawiḍ akken ad awiγ» d wagi i d inzi n imḍebbren n tmura-yagi. Tudert n wemdan ur teswi ara zdat n wehdum-agi n yedrimen i yellan. Tudert n wemdan, tudert n mraw d yiwen n yemdanen, tudert n 126, tawinest d snat tmerwin d sḍis, n yemdanen, tudert n 200000 (snat twinas igima) n yemdanen, tudert d ulac zdat n wasif yedrimen i yellan i weḥwaṣ.
Dacu-tt tudert n Umeẓyan Mehenni zdat imelyaṛen iddulaṛen i tezmer Fransa ad texṣer ma tewwi-yas aṣenfar n unadi neγ
usali n upitṛul kra n tmurt nniḍen, amedya Marikan ? Nγan-t ass n 19 deg yuni. Ass yecban ass deg Bumedyen yekks-as adabu i Benbella. Ass deg tṛessa tsertit udabu aεṛab-ineslem deg Lezzayer. Deg wefran n wass deg i t-nγan, yella yizen: «win i d-yuẓan ar tmurt n Bumedyen, a nekkes iziγer-is»
Ma yella d tidet timenγiwt kan akka n menwala, ayγer ur ten-id-ufan ara wigi. Ma d tidet imsaγen n «restaurant »-nni deg yella yeqqim Umeẓyan kkan deg tmenγiwt-is acku yewwḍ-iten, issekn-d lmus, amek ur ten-id-ufan ara ar tura. Lacekk ma yella d imsaγen, ili llan wid i ten-yessnen. Ma yella d imsaγen, ili mačči ass-nni kan i d-kecmen. Ma yella d tikkelt tamezwarut i d-usan ar dinna, ihi ttwaceyyεen-d.
Deg Birmingham, tiqcicin-nni i yemmuten deg texxamt-nsent, ass-ni, ufan-d anwa i tent-yenγan, acku taluft texḍa tasertit, imsaltiyen ufan-d abrid yettawin ar win ixedmen taluft-nni seg wayen i d-leqḍen ar wid yessnen tiqcicin-nni, d inaragen neγ d imedukkal.
Amek imsaltiyen n Paris ur ssawḍen ara a d-leqḍen kra seg wid yellan deg «Restaurant »-nni akken a d-afen abrid ar wid i t-yenγan ?
Nγan-t deg tezniqt, maca imsaltiyen uddren-d ayen yeḍran deg “Restaurant”-nni. Umeẓyan issekn-d lmus. Yiwen ineγl-d lkkas n tissit γef userwal-is.
Tayeḍ, nnan-ak, ass-nni akkya, yettwet yiwen deg tezniqt-nni s lmus. Ihuh, tameddit, uγalen-d ar dinna wten Ameẓyan nγan-t ! Ihi ahat uγalen-d azekka-nni ad nγen yiwen nniḍen ? Imsaltiyen n Paris ttferriğen.
A s-nini, ur iban ara anwa i t-yenγan. D abrid. Maca ayγer imsaltiyen, ipulisen, ugin akk ad fken kra n tamawt i ufus n udabu azzayri i izemren ad yili d win yenγan Ameẓyan. Acuγer ? Iwacu ? Ayγer ? Pourquoi ? A neγ ur d-iban kra, ayγer i regglen yiwen webrid, netta ahat d win i yessawaḍen ?
Tidet ad tuγal a d-tbin, ad tcemmet wid i tt-yeffren. I tt-yeffren ? Mačči i tt-yeffren ay aεluḍ. I tt-yezzenzen. Wigi, d tagi i d tawuri-nsen. Zznuzayen.
Wid yugaden tidet n webrid azeddgan n timanit deg talwit d liser, nγan Ameẓyan akken ad ssigden win yeṛzan asalu, a t-ssigden neγ γilen akken a t-ssufγen seg webrid n talwit, wid yezznuzayen tidet s yedrimen, ufan-d dacu ad zzenzen. Raison d’Etat. Ṣwab n uwannak d Ẓwab mačči d Ṣwab.