Win izerεen ad yemger, d wa i d alugen agmawi s wayes tefles tiddukla Nmidya n Wehran. Dγa, akka i tga seg wasmi d-tlul ar ass-a : tesselmed, twelleh imeltaγen-ines γer tira , acku teḥṣa akken yessulef, imi anagar abrid-a kan i yessufuγen; neγ amek ihi ara d-nessenser idles d tutlayt-nneγ seg waccaren n tatut yeggunin idelsan d tutlayin timawiyin, imi timawit tilist-ines d nnger. Tasuta n zik teqqar : “ tamεayt deffir imensi”. Aya yeskanay-d tella lbaḍna neγ sser deg yal tamεayt, γef waya i tent-id-ttawin deffir imensi, mi ara d-teγli tallest.

Deg wakud ideg anagar at wexxam i d-yettegrayen, d nutni kan i d-itezzin i lkanun, ulac gar-asen aberrani neγ aḥkim. Din, ttafen-d iman-nsen zemren a d-awin iznan imarawen i wid d-ilulen war tugdi, seg yimi γer umeẓẓuγ. Akka i tennerna tmusni, deg wawal yella uwelleh, yal tamacahut d tadyant i d-yettaken tisri. Di tallit-a-nneγ, yekfa uziẓen γer yiri n lkanun, kfant tmucuha. Adeg n tmucuha d lkanun, yewwi-t ttilivizyu. Dγa ters-d xemsa γef yimi, cccccet!... Tizit ma tεedda-d ad as-tesleḍ.

D iznan n wiyaḍ i yeṭṭfen tasga : Imaṣriyen, Ifransisen d Imarikanen… Tilmeẓyin d yelmeẓyen n wass-a, qqaren-d anda ara d-banent tmucuha-yagi-nwen zdat isura i d-yettεeddayen di ttlivizyu?! Maca, yessefk ad ḥṣun ansi d-kkan isura am Ulis, Ṭṭrad n Diṭerwa, Imenḥufa d Ɛli Baba d 40 imakuren… atg.    Isura-ya merra kkan-d si tmucuha. Maca, si tmucuha n wiyaḍ i d-yufan allalen d ttawilat s wayes ssezrayen timucuha-nsen. Ma d wid ur nessin, wid ur nezmir akka am nekkni, i wumi tt-yekkes wulac, nettu tid-nneγ, nletha-d kan d tid n wiyaḍ, nettγil akka ay d tatrarit, akk ay d tameγradit.

Tamacahut-a iγef d-newwi awal, telqeḍ-itt-id yiwet tmeltaγt n tiddukla Numidya deg useggas 1991.

Weltma-tneγ tuḥdiqt Fiḍala Suεad, tesken-aγ-d di tmacahut-a “ Tuεwijt iḍarren” nezmer ad naf lewqam deg yal amdan, ula deg tuzligt iḍarren, maca, d awezγi a t-naf deg wuzlig n wallaγ. Wissen dγa ma d agcur neγ d ayen-nniḍen?! Imi tugna iγef ters tmacahut-a d tameṭṭut : “Tuεwijt iḍarren” tin i tt-id-ileqḍen d tameṭṭut, ula d tin i s-igan isunaγ ihuskayen, i sen-d-yefkan iman i tugniwin, daγen d tameṭṭut, weltma-tneγ Faḍila Saḥri. Maca, γur-neγ aya ur yelli d agacur neγ d ayen-nniḍen.

Aql-aγ negguni tiyaḍ am : Ṭac-ṭac γerbal, Ḥmed ccqa… Γas ssusem a Cehrazad, ihi tura d nnuba-m a Zalgum, kkes takmamt i uεeqqa yessawalen.

 

Tamawt: Aḍris-a yeffeγ-d deg “L’hibdo n tmurt” uṭṭun 11, imalas seg 22 ar 28 Mayyu 2000. Daγen deg tesγunt “Tiziri” (n tiddukla n Imaziγen n Bilǧik) n waggur n Tuber 2000.