“D acu d-tesnulfam
D acu i wumi telham
Tkerhem lewqam
Deg-wen ur yelli
Neğğa-yawen amkan….“
At Mengellat
Wid yeṭṭafaren amezgun s umata, iqeddacen di taγult (domaine) umezgun amaziγ ladγa, wehmen, u baten imi ur tettekki terbaεt umezgunt «Tigawt d wawal» n tiddukla Numidya n Wehran deg teẓrigt(édition) tamenzut n wussan umezgun amaziγ n tmazγa, deg Tizi-Wezzu, ussan si 6 ar 12/05/2009; kra seg-sen uran-aγ-d neγ ssawlen-aγ-d akken ad ḥṣun tamentilt (ssebba) n waya?!
Γas ma tiririt n tidet, attan γur yemsuddsen (organisateurs) n wayen i wumi semman « Ussan umezgun amaziγ n tmazγa“, imi d nutni i yessefken a γ-d-mlen amek fernen tirebbuyaε; ma d tagi n “UR SƐIN ARA UṬṬUN N TTILIFUN-NNEΓ“ ! Tban ula i uderγal!!
Lemmer ur d as-semman ara «Ussan umezgun amaziγ n tmazγa», yili: “Win i γ-ibedlen s yibiw, a t-nebdel s yeclem-ines”; maca, yelha ma nessegra-d s kra n yesteqsiyen-a:
Amek d-yella usefren (critère) n trebbuyaε-agi i d-fernen?!
1)-Tarbaεt “Munasṭir” yettwafernen d tagensast (représenante) n Wehran, melmi tga kra uhanay (spectacle) s tmaziγt deg Wehran neγ berra i Wehran? Acḥal n tmezgunin i tessuli s tmaziγt?! Melmi tettekki di kra n tfaska?!...
Tamawt: Tarbaεt «Tigawt d wawal» i rran deg yidis ass-a: - Tessuli yakan Kraḍ (3) tmezgunin s teqbaylit:
1: “Di tmurt uεekki“, 2: “ Bu tcacit ulac-it“, 3: “ Aneggaru a d-yerr tawwurt, yeččur wesqif n ṭṭmana“…(Ahanay-ines amenzu, yella-d ass n 18 Yebrir 2003).
-Tettekki di 7 tfaskiwin; tewwi-d yakan 9 warrazen…
-Turar deg waṭas n temdinin d tuddar: Tizi-Wezzu, Bumerdas, Buzgan, Bgayet, Amizur, Iγẓer Ameqqran, Iγil-Ɛli, Belεeggal, At Maεuc, ugar γef ihanayen i tga akk deg tzeqqiwin (salles) n Wehran...
2) - Tirebbuyaε yettekkin deg temlilit-a, ur ifent tarbaεt “Tigawt d wawal” la deg wemḍan (nombre) n tmezgunin i tessuli, ur tt-ifent daγen s tγara (qualité) n leqdic-ines.
Yegra-d kan a d-nini, anamek (lmeεna) neγ ssebba uḍerref n «Tigawt d wawal»; d agbur (contenu) n tmezgunin-ines, wamag ayen-nniḍen akk d timucuha, acku ur nebbehba ara, maca, ssya ar d-tili tririt sγur yemsuddsen n wayen akka i wumi semman “Ussan umezgun amaziγ n tmazγa“, a d-nini kan:
Uhu (ala) i uḍerref!.. Uhu i meḥyaf!... Tudert i tmaziγt!!!
I terbaεt: “Tigawt d wawal”/ Ǧamal Benεuf.
Wehran ass n 15/05/2009.