TAJMILT I TMEṬṬUT


Tikkelt tamenzut imi rriγ imru ger iḍudan-iw i wakken ad aruγ γef tmeṭṭut d wayen tt-iḥuzan n lḥif, d wayen txeddem ama deg yedles, ama di tdamsa, ama deg umezruy, ama di tsertit …atg, ḥulfaγ i yimru iteddu waḥd-s, acku ula d netta ifud, icaḍ ayagi. Yebγa a d-yessekfel tidett imi izerfan n tmeṭṭut di tmurt-nneγ ttwarekḍen, ttwaneṭlen. Ihi imi walaγ tizzeγzeγt i yettεεeddayen γef tmeṭṭut, yeqreḥ-iyi wul-iw . Dγa din kan truḥ-iyi-d tekti i wakken ad beddeγ γer tama-s, a s-iliγ d afus ayeffus swayes ara tkemmel amennuγ γer zdat akken ad taweḍ γer wayen tessaram .
Amennuγ n tmeṭṭut mačči n wass-a, yelḥa-d d amecwar iseggasen-–aya. Di tgrawla taγelnawt tameṭṭut terhen tudert-is i lfayda n tmurt, tbeggen-d iman-is di yal tagnitt iweεren. Deg uzekka n tmunent kra n yemdanen rran-tt di cḥani, nekkren ayen akk texdem, bγan ad terren di rrif maca nettat ur teqbil ara ayagi, tugi azaglu, tugi a s-rren takmamt i yimi-s imi tumen si yiman-is d akken tezmer ad tesεu amḍiq-is di tmetti .
Ass-a nebγa a tt-id nekkes ger tuγmas n wid yeṭṭfen izerfan-is ugin a sen-d-brun, a tt-id nekkes ger tuγmas n tatut. Ssamsen amezruy n tmeṭṭut yellan d azedgan, maca nekni nessazdeg-it s ubeggen n tidett .
Ammenuγ d-tebda tmeṭṭut dima yettkemmil, ulac facal, tebγa ad taweḍ γer yiswan-ines akken neqqar “ aḍar iteddun yessawaḍ ” ihi nessaram i tikkelt nniḍen d akken tameṭṭut ad taweḍ γer yeswi-ines, ad tesεu izerfan-is di yal taγawsa akken i ten-yesεa wergaz.
Neḥṣa d akken tameṭṭut texdem,neγ tura isem-is deg umezruy s tidi-s,s idammen-is. Tura kan wi bγan ad iẓer tidett ad inadi γef umezruy, a tt-id-yessukkes din, acku tikti-yagi aṭas iwumi i d-tusa, bγan ad arun, bγan ad nadin γef tidett n yizerfan n tmeṭṭut, bγan a d-sbinen, ad refden amezruy n tmeṭṭut maca ugin-asen, llan widen i ten-yettqerriεen deg ubrid-nsen, qqazen-asen tisrafin i wakken a d-afen iεewwiqqen ara ten-iḥebsen deg umecwar-nsen. Γas akken ufan-d uguren deg ubrid-nsen, (am yergazen imusnawen, imagdayen,am tlawin daγen..............)maca amecwar γezzif abrid yettkemmil, mazal-iten dduklen, ttnadin γef tidett akken yella deg yenzi: ” d fad i yettnadin γef waman” alarmi tikti-yagi tettnerni, tettumγur, tettenfufud,ma ur tufi wara tt-irefden assen yewweḍ-d wass ideg ara d-lalen izerfan n tmeṭṭut.
Tettbeddil tegnit, ṣwab, tidett anect tebγu tekkit, anect tebγu teffer uleqrar a d-teferfer, a d-yaweḍ wass anda ara d-lalen izerfan n tmeṭṭut.

Islam Bessaci