I s uḍar yeddan ḥafi,
ass-agi n tam di meγres.
Asmi d aγ-d-urwent ur d as-necfi,
ihi nγil wissen ansi d-nesseγres.
Tsuγeḍ ulac win d am-d-yeslan, γas ma din yakk i nella.
Tecqecqeḍ yakk deg izilan, terniḍ tiγrit s ufella.
Rnan-kem imawlan γer waklan, seg wasmi teğğiḍ amula.
Fkan-kem i mmi-s n flan, temmugreḍ axxam d lexla.
Tesεiḍ-d dderya tḥemmleḍ, γas ur d-tekkireḍ s tayri.
Yal ass tezgiḍ tugadeḍ, aṭṭan-im yenṭeḍ i lemri.
Yettergigi am kemm mi ara t-tessakdeḍ, mi ara ifuk wass ur d am-yebri.
Γas d lmeḥtut win tuγeḍ, deg wexxam d Ḥmed Umerri.
Akka igan yakk yergazen yuran di twenziwin-nkent.
Seg wasmi i sen-d-necfa qefzen γer tlawin almi helkent.
Ahat asefru-w d izen, azal awer d as-t-fkent.
Ay ul s igenni a n-azen iḥulfan d aγ-d-ttakent!
Tudert-is teqqel am lmut tmeṭṭut-a taqbaylit.
Ssarameγ ad as-tifrir tagut, γas ma berriket tmeddit.
Ay aẓar tessew tefsut, gmu tura iẓri-s ldi-t!
D amdan ula d tameṭṭut, ṣeḍḥi-kem kra a tawaγit!
Am werbib i yedder Weqbayli seddaw leεnaya n tneslemt.
D tizlit "Aseklu ilili", asefru n Lewnis tessnem-t.
Seddaw-as ttargut i tili, qqaret-as"yerna ad nemmet"!
Neγ erret-tt d ayen ur nelli, γer tayri n tmeṭṭut rewlet!
M ifassen isemmaḍen, yid-s d aẓebluc wusu.
Ula ma triḍ asuden, imiren ad ak-d-tusu.
Aker iman-ik γef yefden, ttifxir nadi kra usensu!
Tarewla ur ẓẓaḍ irden, ur d aγ-ssiṛẓig seksu!
I kečč ay Azwaw!
Aha ddu neγ teddiḍ, ttu ulac d ayen ur nelli !
Yerra-k i tuṭṭfa n lḥiḍ, dadda-k ğeḥḥa n yiḍelli.
Llsas s waḍu i tessuliḍ, ssqef ur tugadeḍ ad yeγli.
Tessiγzifeḍ tilin i yiḍ, ass d awezγi a d-yeflali.
A takurt yennḍen s lxiḍ, tindac-im ur tent-yettwali.
Ur telli imi-k, ffer tuγmas! Γas rkant-ak ad afgent.
Lqut n tiẓeṭ d amessas, lehhu allen-ik γur-s ur wellhent.
Din din teqqleḍ d ameγnas, allaγ-ik lkaγeḍ-is ḍebbεen-t.
Qqaren-ak “yella uεessas, anef i wiyaḍ ma xedεen-t”!
A win iγef ur yettali wass, nnger-ik yexten bubben-t.
Taḍṣa d unecreḥ deg-k γunzan, acku tgiḍ i tḥila ccan.
Ssedhan-k mi d ak-cnan, s ujewwed ul-ik i k-t-ččan.
Yak d iman-ik i k-yerran, tessḥerceḍ γer γur-k uccen.
Lemmer teḍfireḍ afennan, ulac anwa a k-iγuccen.
Rnu-ten wigi k-yernan, γas akken ad cuffen ad feccen!
Tgiḍ tilisa i tarda, tessneḍ anida ad teğğeḍ ṣṣnan.
γas rran-ak tabarda, uli-k seg widak yeḍṣan.
Tettεummuḍ di kra n temda, ulac yakk deg-s aman.
γur-s teddem-ik tmedda, tewwi-k tesεeddayeḍ ussan.
Yal ass ma ifut iεedda, akken i k-id-yettaf win d-yusan.
Tlemdeḍ tesseṛwayeḍ laẓ , yal aseggas tettalseḍ.
I tyita iḥeffu uεekkaz, s ufus-ik i s-tt-id-tneğğreḍ.
Lemmer d uzzal ad yerreẓ, uqerru-k yes-s tekkateḍ.
Iqjan qqaren-ak rreẓ, yal iḍ deg-sen tcewwleḍ.
Imi-k deg yiḍ iteffeẓ, tafat mi d-tuli ad teffreḍ.
S yiwen uḍar mi ara tbeddeḍ, tettsennid tεekkazt fell-ak.
Tqerḥeḍ iẓra tettḍeggireḍ, tḍelluḍ i waṭṭan lehlak.
Tγileḍ ma teqqleḍ-d ur teddireḍ, am wakken tufiḍ ayla-k.
D tidet γur-k tzewreḍ, d temlel ad terreḍ tebrek.
Ay amcum ziγ tettγaḍeḍ, d ammus ad tawiḍ yid-k.
A win yessuguten allus, yerra-k ucuffu am teylut.
γer tmusni aṭas n drus iγef d ak-ldin tawwurt.
Tagrest ma tebges-d agus, tessekfaleḍ-d s umekti lmut.
Tekkateḍ i usirem-ik afus, teččureḍ tirga-k d tafsut.
Ihi γas nebbeh-d lmus, ẓwer-k s iman-ik zlu-t!
ẓriγ anida terriḍ aḍar, anida ur tukileḍ γef wul-ik.
Akken ira yiwen yehder, duru ur teffeγ taxriṭ-ik.
Teddreγleḍ ur telsiḍ nnwadar, maca, da walant wallen-ik.
Deg wannect-a yiwen ur k-iγedder, ulac anwa i terfed tidi-k.
D tawaγit llah wekber, ẓwer ssendi ifassen-ik!
Tezgiḍ deg uḍad trefdeḍ, tessḥeḍreḍ medden walan.
Walan-k s yes-s tcehhdeḍ, ḥala netta i yellan.
Amek almi i t-tettagadeḍ, γas akken ur yesεi imawlan?
I yemceyyeε-is-nni tḍefreḍ, teẓriḍ i ḥeqqa anwa i t-ilan?
Ma yehwa-yak ad tesleḍ, wigi mačči d icilan.
Sel-iy-id ayen akk tεettbeḍ, ur ttagad, ur k-yettruḥ.
Atan tura i d-tluleḍ, anef a k-zzuzneγ di dduḥ.
Akken yebγu tiliḍ meqqreḍ, argu iman-ik d amecṭuḥ.
Yebbaḥ tiṭuḥ ad tizwiγeḍ, xic a mmi mummuc ifuḥ.
Xerṣum yiwen wass ma tessneḍ, tamusni fell-ak ur tettcuḥ.
Xic a mmi. Mummuc ifuḥ, ifuḥ, ifuḥ!!!
Mi ara d-yeγḍel isiḍ yesγi, neγ iγyal mi ara smermiγen.
D ccwal di yal amḍiq ma yemγi, neγ d aman zeddigen i iluγen.
Yečča-yi weqjun-nneγ, ẓriγ a medden ad teḍṣem.
S teqreḥ n wegzar i walaγ, ma d nnεac yuker-iyi asusem.
Ul yebges agus s allaγ, yekkes-as lγemm deg tegrest.
Seg yimiren iḍeṣ ur t-walaγ, i yeffer udem-is γef tebγest.
Tidet tettreqriq am yetri neγ am isufa mi ara reqqen.
S tdayazt tasa n tẓuri d iḥulfan-is irqaqen.
A win yettruẓun lemri, tettnadiḍ iman-ik deg-s.
Tezliḍ di lεid ikerri, ul-ik s imenγi i d-yebges.
Ssaked deg-k a win ur neẓri, qqen asefru-w d asegres.
ṭṭef tunṭict n tayri, ssendi iciwi-k γur-s!
Ssenṭeḍ tikta-w i tmuγli-k, ferreẓ isennan deg tmurt!
Tafat ldi-yas allen-ik, ṣfeḍ tamuγli-k taqburt!
Ay Azwaw ḥrez udem-ik! Tidet teččur-ak-d tawwurt.
Ssemneε yes-s iman-ik, fsi γef uqerru-k takurt!
Turgaḍ ayen ideg ur telliḍ, telliḍ deg wayen ur turgaḍ.
S wallen-nniḍen tettwaliḍ, tiṭ-ik deg-k tettagad.
Yenkeẓ yeẓri-k ur teẓriḍ, tamuγli-k ur tessegmaḍ.
Tγileḍ tekkreḍ kečč teγliḍ, tiγrit ul-is d asemmaḍ.
Argu, sfillet, ssirem, cḍeḥ-as i uwezγi γef tmiṭ!
Akud d ayen ur d-nγerrem, γas kečč γer γur-k teğğiḍ-t.
Taẓẓelt tenta ur d-tqerrem, atta tidet tugi tiṭ:
Teqreḥ deg iḥulfan-is tedrem, tγumm iman-is s tceṭṭiṭ.
Ay Azwaw yeddren akka, i tlelli acu i s-d-tessukseḍ?
Twahhaḍ allen-ik γer Mekka, deg weεrur i Ǧerğer tmekkneḍ.
Ay Azwaw aqbur yerka, aki-d seg yiḍeṣ tekkreḍ!
Ssufeγ uccen si tferka, ma d tidet ur tettagadeḍ!
Anef-as i waḍu ad iṣuḍ, ur s-teddu di lebγi!
Ay Azwaw lemmer tceffuḍ, yewwi kra yellan yemγi.
Yessefk tura ad testufuḍ, seg wul-ik ad temḥuḍ,
ur k-t-yessenduy am yiγi.
Ini-yas “deg-i ur tetthuzzuḍ, kker ay aḍu ad telḥuḍ,
ur stufaγ i imenγi”!
Dayen ur ttnaγγef waḍu, ur ttnal deg-s, ur reggi!
Teğğam abeḥri-s a ken-yebḍu, d acu d tamacahut-agi?
D wagi i d abrid n reḍḍu, ay Azwaw xḍu!
Idim aṭas i yengi.
Ini-yas “ ssali aṣuḍu, neεya deg luḍu,
aql-aγ nuki-d ass-agi”!
Aḍu seg-k a t-tessufγeḍ, fell-ak ad telhu tegnawt.
S tlelli d tiẓeṭ ad tḥemmleḍ, ad tzewğeḍ s war taεmamt.
Deg yiman-ik ad tafeḍ, seg wul ad teḍṣeḍ,
ul ideg ur d-tegri teεdawt.
S tezwawt ad tesmuzzγeḍ, tutlayt-ik ad tḥemmleḍ,
s yes-s i k-d-wwiγ tafat.
Tafat yes-s i k-tt-id-wwiγ, yak deg-s aḍu ur d-yettεeddi.
Lemmer ur tt-ssineγ ass-a ur tt-ufiγ, wissen tiṭ-iw ma ad teldi.
Taqellaεt ur tt-ttwaliγ, ad ccḍeγ deg-s ad γliγ,
yak ulac anida ur tendi.
Ma tγileḍ ulac d acu ẓriγ, aḍu-yagi ideg ttsibbiγ,
deg ifassen-ik γur-s ssendi!
Tuqqsa tamiclit
Ahat terra-kem d turqimt tnamit m tirga ur nzint.
Mi snagreγ a d-rnuγ talqimt, ufiγ tisγar dayen zzint.
Γas ma la yettru igenni, la ẓerreγ itran anda ffren.
Σeğğren deg wul-iw d tirni, walaγ-ten, deg-s i ddren.
Kemm tettuḍ ussan-nni, deg-i ur fsint tindac nesni
deg iciwan-nsen s icenfiren.
Ussan faten dayenni, tayri tettimγur, tettnerni,
tarra-yi γer yimiren.
Yal wa amek yettwali tebrek, yal yiwen d acu yeẓra.
Llan wulawen iγef tebrek, llan wid siγeṭṭlen iẓra.
Ttarguγ ayen yid-i yeḍran, i ta d targit neγ d amekti?
D tamuγli-w i yeswan qeḍran, asirem-iw yečča arekti.
Win yettwaqqsen seg iẓuran, steqsit widak yeẓran,
mmagret tiliwa imeṭṭi!
I wannect-a anwa i t-iran, wissen ma dayen yuran
neγ lliγ cerkeγ d xalti???
I yesteqsiyen acu a d-awin? I wagi d acu-t εni?
Wa yesbabb i wayeḍ aεwin, ama nenna ama ur nenni.
Akka i teffeγ daya kan, daya i nezmer a d-nini.
Ttifxir lemmer d am-rkan iẓuran a m wurγu am yini.
Rwel ula γer Marikan! Imurar-ik ay ul deg udekkan,
tamuγli-k twehha γer At Yanni.
Si Micli i d ak-d-tekkan, tayri n yelli-s d ak-d-fkan,
yes-s i tessneḍ igenni.
Ul n mmi-m ur yettaḍen, γas lemmer d tiγrit tahendit.
A yemma acu a tt-isefḍen? Tagi d tuqqsa tamiclit.
Igenni ay ul yes-s i t-tessneḍ, wagi ideg ffren yetran.
Ula γer wis-sa tewwḍeḍ, i wussan-nni anda rran?
Tezgiḍ s umekti tseqḍeḍ, tura yessefk a d-tafeḍ
ttawil ger sin iberdan.
Qqim a Micli ur d iyi-tẓerreḍ! Ahat asmi a d-tfaqeḍ,
a d-tafeḍ ččan-k iγeẓran?
A Micli a Micli a Micli, awer k-tγunfu tezdeg!
Ssarameγ-ak tilelli, a k-tezdeγ, ad taf deg-k adeg!!!
Asirem, tabγest d usirem
Ukiγ-d sliγ i tusut, walaγ winnat la yettcax.
Sseww-as-d lqahwa a tameṭṭut, si zik tawenza-m tsax!
Ḥareγ a d-tuγaleḍ a tafsut, a d-naki s ccna n yefrax.
Anwa i k-yennan asirem ttu-t? Ma tkemmel akka ad tebbexbex.
Asirem ay arraw n tsedda, ur t-yeddim umedda.
Γeḍlet yal tamesgida, ad tafem anida yedda!
Ngum akk d-kkreγγliγ, yennum-iyi weḥnunef.
Γas ldiγ allen ttwaliγ, d acu izaden ma nekref?
Lemmer d bu tebγest i lliγ, a d-ssneγleγ allen n Butef.
Imiren akka ad as-iniγ: Ṭṭef a ddin n yemma-k, ṭṭef!
Tabγest ay arraw n tsedda, ur tt-yeddim umedda.
Ḥmed Umerri iεedda, ad tili yid-s i tedda.
Atan daγen usirem-nni, a d-yezzi γur-s wawal.
Aql-i ssakdeγ s igenni, yal tafawet usigna tettγawal.
Ad suγen γef webrid at Yanni, dda Lmulud ur d-yettuγal.
Yegra-d Ferḥat Mhenni, abrid-is la γ-d-yessawal.
Asirem ay arraw n tsedda, ur t-yeddim umedda.
Aṭas tura i nesεedda, ur neẓri anida nedda.
YIWEN USEFRU
Err ACELQIΣ d akessar! Twalaḍ tura ITRAN la ttrun?
Dayen tura" AMEK d WAYΓER"! Ih, d AMENNUΓkan ara tt-yefrun.
Fell-aγ ad zegrent TESΓAR, di LEΣNAYA n WID d aγ-yettγurrun!
A TIDET i LḤENNI acuγer? Amek? IMAWLAN? Ad am-brun?
Seg WASMI teddiḍ d TISLIT, AMΓAR-INEM d AΓURRU.
ANWA i d am-yennan MMI-S aγ-it? Γef TUFFRA yessekcem-am AKUKRU?
TAMΓART-IM d TAWAΓIT, TASUSMI γef TWENZA i tt-tettaru.
UL-IW KRA DA yessummel-it, yenna-d " AḤ MMLEΓ" s USEFRU:
Ad sfeqεeγ TAGUNI, ad tt-nγeγ, a d-tlal TNEKRA.
ALLEN ad ferẓent deg IGENNI, mi ara yeḍru deg-s KRA.
A KRA idergen dayenni, seg TUFFRA a d-teffγeḍ TURA.
Maca, amek akken a d-nini? Ih, i TAFAT sanda terra?
A TAFAT anda texxuceḍ, a TIDET swayes yettali WASS?
Nγil s TUFFLA n TILAS ad nessiweḍ, a d-neẓẓiẓeḍ TEṚẒEG s UMESSAS.
Lemmer ASUΓU ad yales a d-iεeggeḍ, TANEKRA ad tedder ad tt-ales.
TEBREK i TZIRI ad tettswasfeḍ, TAFAT dγa a d-tedduqqes.
A TEBREK eğğ ALLEN-NNEΓ, fek-as ADEG-IM i TZIRI!
D YID-M nezga nettnaγ, s YIS-M i nessen “AYEN-N-DIRI”.
KEČČ a LEHHU nadi-yaγ, af-aγ ttxilem a TAYRI!
Err UL n TAΓERT leggaγ, sfeḍ-aγ IDAMMEN γef YEẒRI!
Slef i WULAWEN ad ḥlun, anef-aγ YIS-M ad nennecraḥ!
Ṣṣeḍṣ akk ITRAN yettrun, AMUR SEG-M ad ten-id-iṣaḥ!
Aẓ-d ttxilem γer YIRI N LKANUN, INIG-IM deg-neγ yeqqreḥ!
A TAYRI deg WULAWEN icennun, s UẒAWAN-IM nra ad necḍeḥ.
Ad nezwi ad nerwi s TUQQNA N WALLEN, ZDAT-NEΓ a d-yers IGENNI.
D ITRAN yettṣṣaḍṣan ara t-yeččaren, AFUS a d-yeddem ISEGNI.
IMIREN d ASIREM a d-ilalen, s YES-S AKUD ad t-nesni.
I TAGI diγ d TARGIT-NNIḌEN? Ih, lemmer ad teffeγ ad naweḍ ASS-NNI.
Sani ara ad naweḍ akkagi? d acu nettnadi TURA?
Dacu i d aγ-ixuṣṣen ASS-AGI? Yak twunes-aγ TMARA.
Lemmer UL N LISER ad yergagi, ad nγunzu a d-nebder " BERRA".
A TALWIT d acu d WAGI? Ṣṣeṛ iman-im a TUFFRA!
Sken-aγ-d UDEM-IK ay ISWI! Anta TAMNAṬ ideg telliḍ?
Lemer yeqqur FAD ur yeswi, ay AYYUR ur tγelliḍ.
TAḤEMMALT urγ-tettawi, ASS ur yettak anzi s IḌ.
TAGNAWT N WASS-A terwi, yerwa YIṬIJ ASEMMIḌ.
Lmeḥtut
Yeγra almi yeqqerqer,
akka i thedder fell-as yemma-s.
Mimmi-s ccan-is meqqer,
am wezger i wumi tqebba taγmas.
Lemmer yelha useḍṣu-s meqqar,
ad as-naf leqrar i umerwas.
A tamγart mmi-m mi ara ihedder,
wali rkant-as yakk tuγmas!
Awi-d ukan, awi-d ukan,
lemmer mačči d lmeḥtut.
Anef-as kan, γas anef-as kan!
Anef-as kan wahin, ttut!
D lmeḥtut.
D lmeḥtut yerna yessen,
yeγra ad yezzenz iman-is.
Yuγ abrid-is γer wissen
s werfad uεenqiq-is.
Aḍar-is wid t-yessersen
anida akken yufa abrid-is.
D taftilt-is i d as-ssensen,
skecmen-t γer ṭṭlam uṭellis.
Awi-d ukan, awi-d ukan,
lemmer mačči d lmeḥtut.
Anef-as kan, γas anef-as kan!
Anef-as kan wahin, ttut!
D lmeḥtut.
D tallest i wumi ssawaleγṭṭlam,
ula d nekk ur d iyi-tezgil.
Maca, rriγ-d agelzim s axxam,
lemdeγ aẓbaṛ d ttelqim.
A tawerdanit ma nettkel fell-am,
nenger, nekkfa, ur d-neqqim.
Fek-as i mmi-m azul s sslam,
a tamγart issin mmi-m!
Awi-d ukan, awi-d ukan,
lemmer mačči d lmeḥtut.
Anef-as kan, γas anef-as kan!
Anef-as kan wahin, ttut!
D lmeḥtut.
Sεid At Mεemmer