Rumpelstilzchen d yiwet n tmacahut n Grimm (Lalman),
Amacahu, awal-iw ad yelhu am tteffaḥ lleḥlu..
Tifelwit-agi sufella i tt-igan d tanaẓurt Snjezana Vidovic ©
www.kunstmalerin.de.
Yella zik-nni, yiwen ureḥḥay,d aẓawali maca yesεa yelli-s d tahuskayt tugar tasekkurt. Yiwen wass, yusa-d ureḥḥay ad yemmeslay i ugellid, yenna-yas “ sεiγ yiwet n yelli, tzeṭṭ alim tettarra-t d izuraz n wureγ”
Agellid yenna: "wagi d idles, d idles igerrzen! Ma yella yelli-k am akka tenniḍ, awi-tt-id azekka γer weγrem, xseγ ad waliγ ayen tessen”
Armi tewweḍ teqcict γer weyrem, yewwi-tt ugellid γer yiwet n texxamt yeččuṛen d alim,yefka-yas aqerdac d tesfift u yenna: “tura εnu γer tizzad, ma sya γer d-yali wass ur tezḍiḍ ara alim-agi tessuqleḍ-t d tizuraz n wureγ atan d tamettant i kem-yettrağun”. Ar tin γur-s yezzem tawwurt ,u teqqim d yiman-is.
Tagrut wer nuklal ur teẓri d acu d wamek. Ur tessin ara maḍi maḍi anamek d usuqel n walim γer wureγ, u tuggdi ines tettnerni armi tegraref d imeṭṭawen.
Din din kan atan tawwurt teldi, u ineggzed yiwen n wemdan d amecṭuḥ, tugar-it tsebbaṭ di teγzi u yenna:
” Azul fell-am a yelli-s n ureḥḥay acimi i truḍ akka?”
– “ Ah”, tenna teqcict
– “ur ẓriγ amek ar ad suqleγ alim d ureγ”
– “ D acu ar yi-tefkeḍ ma zḍiγ-am-t-id?”
– “ Axelxal-agi inu” i s-tenna teqcict.
Azgen n wemdan-nni yeddem axelxal u zer zer zerr, kraḍ(3) tikkal attan tesfift teččur, dγa yerna tayeḍ, u zer zer zer kraḍ(3) tikkal attan tis-snat teččur. Akka i tedda taluft armi d-yuli wass, alim-nni akk yeqqel d ureγ, tisfifin-nni akk ččurent.
Armi i d-yuli yiṭij, atan yusa-d ugellid, akken kan i iwala amur-nni n wureγ, tewt-it lbaγa, maca ul-is yelluẓ, daymi i yewwi taqcict γer texxamt nnayeḍ yugaren tamezwarut, teččur d alim u yenna–s:
“a γurem ihi ma texseḍ tudert zeḍ alim-agi deg yiwen yiḍ! .„
Armi i d-yewweḍ yiḍ, taqcict ur teẓri amek, attan teṭṭerḍeq d imeṭṭawen , din din kann teldi tewwurt atan yejgelb-ed wergaz-nni amecṭuḥ u yenna:
“D acu ara yi-tefkeḍ ma suqleγ-d alim-agi d ureγ? „
“Taxatemt-agi uḍaḍ-iw „ i s-terra teqcict .
Argaz nni amecṭuḥ yeddem taxatemt u yekker i tuzḍa , ur yuli wass armi yerra akk alim-nni d ureγ yettiriqen.
Taṣebḥit armi ḍallent wallen ugellid γef ureγ-nni yuγal am uderγal-nni i ifujen γef tafat, maca ul-is tirni kan i isurem. Ihi yewwi taqcict ur nuklal γer texxamt yugaren timezwura-nni, u yemmeslay:
“Tagi daγen yewwi-d a tt-tezḍeḍ iḍ-agi u ma tzemreḍ atan ad tuγaleḍ d tameṭṭut-iw „
“Ma γas akka d yelli-s n ureḥḥay, tameṭṭut tameṛkanttit am ta ur tt-ttafeγ anda nniḍen„ i yenna i yiman-is.
Armi i d-tegra teqcict di texxamt iman-is yusa-d wergaz-nni amecṭuḥ tikkelt tis-kraḍ (3) u yenna:
“D acu ara yi-tefkeḍ tikkelt-agi ma suqleγ-am-id alim-agi d ureγ?”
-“Ur yelli wacu i yi-d-yegran a k-t-fkeγ „ i s-terra teqcict.
- “Ihi ini-yi, asmi ara tuγaleḍ d tagellidt ar da yi-tefkeḍ agrud amenzu ara yi-rnun γur-em„ I s-yenna wergaz amecṭuḥ.
Taqcict texcawet : “Anwa yeẓran sya ar ass-nni dacu i γ-yettarjun ” I tenna i yiman-is, yernu tagrut ur teẓri di teswiεt-nni amek i d tifrat. Taqcict ihi tefka-yas awal. Argaz amecṭuḥ yekker i uzeṭṭa..
Azekkaw-nni armi i iwala ugellid ayen yakk yexsa yeḍra-d yessawel i iqeddacen a d-heggin tameγra. Yelli-s ureḥḥay tuγal d tagellidt.
Ugar useggas kan, atan yerna weqcic d ahuskay γer tgellidt, u nettat tettu yakk argaz-nni amecṭuḥ. Yiwen wass kan, atan ijgelb-ed di texxamt n tgellidt u yenna-yas:
“Ah awi-d ihi aqcic-nni „
tagellidt trekb-itt tuggdi, dγa tεenna-yas s bab idurar ar s-tefk ayen yakk yessaram ma yeğğa-yas mmi-s-nni. Maca argaz yugi u yenna:
“ Uhu ayen yeddren yif akk agerruj n ddunit merra„
Tagellidt tettru u tesqenziz, armi tcerreg tassa n wergaz amecṭiṭuḥ. Din ihi yenna-yas:
“a m-ğğeγ kraḍ (3) wussan, ma yella, sya ar slazekka tufiḍ ism-iw atan a m-ğğeγ mmi-m-agi„
Iḍ aken ma yella tagellidt tettnadi ismawen tessen d wid i wi tesla yakan, u tceyyeε ar yal tamurt, deg usamar γer umalu, deg tneẓruft γer ugafa ad dummen yakk ismawen yellan.
Azekkaw-nni armi i d-iḍal wergaz amecṭiṭuḥ tluεa tgellidt s yismawen:
” Σebban, Iεmac, Bessaεd, Mεemri „ u tenna-d akk ismawen i tessen, maca argaz amecṭiṭuḥ yenna“ mačči d wagi i d isem-iw„.
Ass wis-sin tceyyeε γer leεruc nniḍen ad steqsin,γef yismawen nnaḍen, u tenna i wergaz amecṭuḥ armi i d-yuγal, ismawen werğin nefri.
“ isem-ik ahat Mqidec, Hmiṭuc neγ ahat akeεwan?„ maca netta yal tikkelt yeṭṭerdeq d taḍsa u yeqqar “mačči d wagi i d isem-iw „
Ass wis kraḍ (3) yuγal-ed yiwen uqeddac u yenna:
“ ismawen imaynuten lemmer d yiwen ur t-ufiγ, maca armi wwḍeγ γer yiwen wedrar ar tagara n tiẓga, anda i s-yeqqar ubareγ i wewtul .“ Azul fell-ak”, walaγ yiwen wexxam d amecṭuḥ,u zdat wexxam-nni afarnu n temesst, timesst-nni yezzi-as-d yiwen n werğin d acut, d azgen n wergaz, yettneggiz γef yiwen uḍar u icennu:
“Assa a d-εerkeγ, azekka a d-sewweγ,
slazekka a d-awiγ mmi-s n tgellidt,
ah, ay yelha, imi ulac win yeẓran
Amaziγ i d isem-iw!”
Dagi tzemrem ad tmeyyzem, acḥal i tefṛeḥ tgellidt, armi tesla isem-nni, armi i d-yekcem wergaz-nni amecṭuḥ yesteqsa :
“ ini-d ihi a tagellidt, isem-iw”
-“ isem-ik Aggur”
“ Uhu„
“isem-ik Yidir? „
“Uhu „
“isem-ik ahat Amaziγ“
Wagi d cciṭan i m-t-id-yennan, wagi d cciṭan i m-t-id-yennan“
Argaz amecṭuḥ yesseḍ, yewwet s uḍar ayeffus lqaεa armi tcerreg,u tessebleε-it ar tqeṣrit, u yeṭṭef aḍar azelmaḍ s sin ifassen dγa icerreg iman-is γef sin.
Arezqi