Kkseγ-as ffad laεca, fkkiγ-as teswa almi teddeṛder. Ssbeḥ-agi ufiγ-tt-id tebrek, udem yecrureq, amummi-s meqqer; alih rekkbeγ-tt, d abrid anda tebγu tawi-yi !
Teččur ddunit d iriran, anda txezreḍ d tamduct n iriran; medden tetten kra akken uḥelwiḍ, ur zṛiγ dγa dacu-t ! ad ččen ad ččen alma qebrren dayen, imiren ad tt-rren i yiriran, myal tasga tettarra.
Atnaya sin wuεwijen n iqudam, imawen-nsen γef zelmeḍ, tikli-nsen d tamderkkalt !
- Dacu i yuγen akka talγemt-ik ?
- Ur tt-yuγ wara, fkiγ-as tečča teswa, ala ur tt-yuγ wara !
- Awah temgarrad γef tleγmatin-nneγ, dacu i s-tettakkeḍ aεni tettett-it ?
- Uzzu n tniri d temẓin n ugemmaḍ-in
- Ihhuh ! tsudukkuleḍ-as-ten !?
- Ulac i yifen aya !
Myexzaṛen am wid ara k-yinin “d lewhayem” !
Negzem abrid, nerra γef yeffus, azniq yettklučut !
εeddan-d sin yiḍan, yiwen deg-sen yezzuγr-ed yid-es amdan anctilit ! dγa din din sliγ-as i yiwen weydi yenna-yas i wayeḍ :
“D tisewham, myal tikkelt γef ara zṛeγ yiwen yezzuγr-ed amdan, ini affeγ-t yettakk anzi γur-es”
Xzṛeγ dγa amdan-nni, ufiγ d tidett, yettakk anzi γer bab-is !
Isuγan…!
“I tesselfeḍ axxi i wudem-ik, madya ad temmagreḍ anzaren-ik; dacu keč anzaren ulac !
Ssekkreγ-k-id, εetbeγ fell-ak, εawzeγ, nnuḍḥeγ, fkiγ-d nnig tezmart-iw !
Ass aneggaru akka ara yi-txedmeḍ ! a win ur nessin, tizzya-k atent-id kerzent tiferkiwin-nsent, snernayent rennun-t !
Keč deg iḍ deg wass ay teggareḍ azeṭṭa dagi, a k-id-tas temnirt ma d keč dγa i d argaz !”
Wigi d imeslayen i tenna yiwet n tmurt i mmi-s; deg wezniq-agi timura εewqent deg warraw-nsent; unfen i webrid, ttṛebga-nsen teffeγ cayeḥ.
Tenna-yi tmurt-a dγa dakken mmi-s yessufγ-as-d aḥaẓuz , yerra-yas ddunit d tamerzagut, akken texdem mačči akken !
Nniγ-as: ihhuh ! qqaren w’ur ten-nesεi yuggad nngger, wi ten-yesεan yeṛwa amdegger !
Diγ netta kem teṛwiḍ amdegger, yettban γef wudem-im tencewwaleḍ !
Ma ncewwaleγ ? hebleγ, lemmer ufiγ ata nnejlaγ acḥal aya !
D tameγbunt meskkint tmurt-a !
Talγemt-iw tezmer ! ansi i s-yehwa a yi-tessukk, ur s-rriγ algam; lemqud γur-es i llan !
Aqlaγ tura nessuruf deg uzaγaṛ…asif yessečča-yas ijdi i uberkan uqqeruy
“win inudan γef temcumt-is, ad tt-yaf ! iεebbaḍ ad ččaṛen d ijdi !” akka y-yenna wasif bu wurrif, “win yeγzen tasraft ad ilqu deg-s, win i ifegglen ad yečč seg wayen I ifeggel”
Aεebbuḍ-is yuγal d aciraw seg wayen yečča d ijdi. Nniγ-as i telγemt ad tγiwel, ammer ad iṭṭerḍeq uzeεbbul amcum, a γ-d-iḥaz yejdi !
Urεad nwexxeṛ syina almi i s-nesla i ugejdur-nni yeṣṣeεseε, yessuγ γer ṛebbi i t-id-yefkan !
Asif sliγ-as ttcelbbiḍen waman-is, yecreh !
Nelḥa, nedda,… agemmaḍ-in kra yesuruf-ed !
Tlata (3) temrarin teddunt-d qbala γur-neγ.
Tamrart tamezwarut: anda akka tettedduḍ a wagi irekben talγemt ?
Nekk: d talγemt-iw i iteddun mačči d nekk.
Tamrart tis-snat : a talγemt anda tettedduḍ ?
Talγemt : aḍar ur yesεi azaṛ, iberdan akk nneγ !
Nekk : I kunemti ansi i d-sresremt akka aεni ?
Tamrart tis-tlata : nxenq-ed tlata yemdanen, nuγal-ed.
Talγemt : dacu i xedmen aεni ?
Tamrart tamezwarut :
- yiwen yeḍreg tala, rran-t d lmezwer n taddart.
- wayeḍ yettekkes tucerka s yidamen n telkit.
- tayeḍ teznuzu ayefki n tebbucin-is !
nekk : d at taddart i kent-yennan xneqqemt-ten ?
tamrat tis-snat ; ala ! at taddart ar iḍ-a ur ḥbisen ara deg imeṭṭi mi slan s wigi ttwaxenqqen !
nekk: acuγer ?
tamrart tis-tlata: uγen tanumi yid-sen, tura aten-id am igujilen !
talγemt: msakit !
nekk : wi kent-yennan ihi nγemt-ten ?
tamrart tis-snat : d tazemmurt tazemnit !
tazemmurt, agemmaḍ-in tbedd teclawa; nelḥa ddeqs d wamek I tt-newweḍ !
sslam fell-am a tazemmurt tazemnit
a yemma-s n ddunit
nεefs-ed ayla-m, aqlaγ di leεnaya-m !
tazemmurt tezwi ticuḍaḍ-is, tezdi lqedd-is :
“acḥal aya tura seg mi i d-yebda rekku tamnaṭ-a, akal ibeddel tiγmi, ayen mmussan ad ihruri, sṭεeṭεen tagnitt. Tallit tuḍen, tewweḍ tizi n lmuta. I wakken ur tgellu yes-neγ !
Refdeγ serseγ, uzneγ timrarin…! Tura aqli ttxemimeγ ad tt-dduγ γef wid d-yeqqimen, amer ahat ad d-tuγal tezdeg nnuba-s…cceyεeγ s asif, ur yettεeṭṭil ara ad d yaweḍ…ddut, γiwlet muli ad yeglu yeswen !
D tarewla i d leslak nneγ, asif yerfa, yerna γef sebba i yella. Win tḥuza atan d amcum. Nwexxṛ-ed syina; dderz, tiγwas wwḍen s igenni !
Nekcem “tiẓgi yesṛeγ bbicuḥ”. Azaγaṛ dayen megdul. Asif isseqqsa-d γef yezṛa-s ! Ar zdat ayen i d-iteddun nwala-t, ar deffir ala tazemmurt i yezṛan i yellan, i yeḍran.
Ar zdat sliγ I lheffa, nniγ-as i telγemt dacu-t akka wa !
Tenna-k aqlaγ deg teẓgi yesṛeγ bbicuḥ, d ayen yebγun yili-t, ma d nekkni ad naweḍ iswi !
A d aher !
A yizem a yizem arğu a k-steqsiγ !
Izem n teggṛust n lqahwa yewwet iεedda !
Nniγ-as ad t-steqsiγ ayγer yeğğa lexla, yuγal γef teggṛust n lqahwa, iga akka yetteṛfeε !
Tenna-k telγemt asmahit yesetḥa, imi yetteḥbes di lkkaγeḍ, netta mmu qqaren bu tissas, iḥulfa γlint-as !
Nniγ-as ad taffeḍ, ihi, akka !
Tiẓgi yessṛeγ bbicuḥ mckkenṭaḍen isekla-s, amzun myuṭṭafen afus, wissen d tiggdi, wissen d tayri !?
Nniγ-as I telγemt ad nesgunfu, ad nens, mi d tafrara, ad naγ abrid.
Tenna-k mi neffeγ tiẓgi-ya, a γ-qqiment mraw n tγaltin ad tent-nezger, d ulamek ara naweḍ azaγaṛ amaynu; dinna dγa i yella wayen i γef nettnadi !
Serseγ idisan-iw γer lqqaεa, senndeγ γer uqejmur n tbelluṭ. Talγemt ula d nettat tebrek.
- Mraw n tγaltin bac akken ad naweḍ azaγar amaynu !!
- Mraw.
- Ddeqs γ-mazal ihi !
- Skud ad netteddu skud ad nettẓiẓẓi !
- …!!
- “Tiẓgi yessṛeγ bbicuḥ”, tezriḍ ayγer i s-qqaren akka ?
- Ur zṛiγ ara !
Talγemt tḥemmel timucuha. Nekk iḍeṣ yettezzi-d felli, ttnudumeγ. Mačči d yiwet deg uqqeruy…asif yerfa, tazemmurt tessawel i nngger, izem yuγal γef lkkaγeḍ…mačči d yiwet !
- I tedyant n At Qirruc yeqqnen i yizem aqemmuc, tesneḍ-tt ?
- Ahh… !
Iḍeṣ yezuzun dgi. talγemt tessawal-d timucuha n at zik !
Deg uqerruy-iw yettmenṭaṛ : bbicuh, lkkaγed, azaγar amaynu, mraw n tγaltin, At Qirruc, tazemmurt…ttezzin, ttezzin !