Izlan Ibeḥriyen
Izlan ibeḥriyen, d aḍebsi amaynut i d-yefγen ussan-agi. Fiḥel ma cebbḥeγ-ed aḍebsi-yagi s umeslay, zemreγ ad d-inniγ kan ismawen n wid i t-ixedmen ad teẓrem belli igerrez, wigi d anazuṛ ameqran Ḥusin Bukella (Ccix Sidi Bimul) akw d umyaru Amezyan Kezzaṛ. Tizlatin i yellan deg uḍebsi-agi, d tisuqliwin si tmeslayin nniḍen, am Tefṛansist, γer Teqbaylit. Igerrez cγel i yexdem Amezyan Kezzaṛ di tsuqliwin n isefra-agi. Ma d lmusiqa, Ḥusin Bukella yettwasen si zik γef leqdic ines igerzen deg uḥric n lmuziga. Ifka-yasen cbaḥa akw d sser i ysefra n Umeẓyan Kezzaṛ.
Llant 12 n tezlatin deg uḍebsi, imeslayen n tezlatin yerra-ten-id Ḥusin Bukella γer ublug ines : Zembrek yerna tzemrem a ten-tafem γer tagara umagrad-agi. Ma Tebγam ad d-taγem aḍebsi-yagi yettnuz di l’internet, ṛuḥet γer undergroone.com ad t-tafem dinna. Timlilit n 'Meẓyan Kezzaṛ akw d Ḥusin Boukella nerbaḥ fell-as imi tefka-yaγ-d Izlan Ibeḥriyen, nessaram mazal lxir γer zdat, aḍebsi-yagi ad d-yeglu s waytma-s !
Ḥusin Bukella
Ḥusin Bukella, d anazuṛ ameqran di lmuziga, di ṣṣenf i wumi qqaren Rock. Ilul deg useggwas n 1957 di Lzzayer tamaneγt, laṣel ines n At yeğğaṛ (buzgan). Deg useggwas n 1985 yunag γer fṛansa, ar tura mazal-it yettidir di Lpari. Aḍebsi-ines amenzu yessufeγ-it-id di 1998, El Bandi; syenna akkin issufeγ-ed 5 iḍebsiyen wiyaḍ. Muqlet myspace ines akken ad tissinem akter γef Ccix Sidi Bimul.