Ilmend n tuffγa n udlis-ines ASFIĞET, i wakken ad ittwassen udlis-a d umeggi-nnes, igga yides umedyaz Σumar DERWIC amsawal-a:
AMSAWAL AKED UMYARU AMAZIΓ SAΣID BELΓERBI
Σumar DERWIC: Tzemmared ad aneγ-d-tessiwred x tudert-nnek? Min iεna Mass Belγerbi?
Saεid BELΓERBI: D tidet itas-d iqseḥ cwayt bnadem ad issiwel x umeddur-nnes, maca ad cek-ssidseγ cwayt γar Saεid Belγerbi, netta ilul di Rkebdani, jar idurar n Arrif, tesγar-it tudart n Arrif. Day-s i ufiγ ad iriγ d ixef-inu, tamurt day-i isremden ad twariγ s tiṭṭawin d timaziγin, s uyenni ariγ taynit zi temẓi-inu i tmaziγt, zi zic tuγa twariγ tamurt aked tamaziγt-inu a tiri d tayujič mara war ğin ayt bab-nnes ad as-aren taynit. Mkur ijjen s tizemmar-nnes, mkur ijjen s uxarres-nnes, nec ixdareγ tira d abrid-inu zi γar iniγ cwayt n taycitin i zi taciγ.
Σ. D. Tessufγed-d ussan-a ineggura adlis-inek n tenfas ASFIǦET. Nxes ad aneγ-d-tinid ca n yiwaren x udlis-a.
S.Belγerbi: Trarit n udlis n Usfiğet tus-d awarni ijjen uxarres di tudart, tus-d awarni ijjet n taycit zi rağaγ n min iteddar Umaziγ, twannaṭ (almuhit) n Usfiğet tesmun jar kraṭ n tγawsiwin: tγawsa n ufgan d wakal d waman, d yina d imunas day-i yejjin ad ariγ Asfiğet.
Azzuγ a t-ggeγ d ijjet n tebrat a day-s iniγ: ha mammec iteddar Umaziγ, ha min εnan imunas-nnes, ha min εnan isutar-nnes, d imxumbar-nnes….
Twariγ, s tsekla, nzemmar a neswiza marra γar wufuγ zi min nteddar n uhuzi, d min nteddar n uweḍḍar deg ixef n tudrin-nneγ, ura deg ixfawen-nneγ, s uyenni irur-d Usfiğet isfiğit γar tcuni.
Σ. D. Mass Belγerbi d ijjen umyaru (écrivain)amaziγ amaynu. Mammec d-tusi tikti (idée) n tira s tmaziγt?
S.Belγerbi: Tikti n tira γar-i twariγ tus-d amenni waha, war das-swejdeγ ca, minzi tuγa taciγ belli tamaziγt-nneγ tettures-aneγ ca, mkur ijjen zzay-neγ ixessa ad yewc ca i tmaziγt, ijjen s uγennij, ijjen s tẓuri, ijjen s tarezzut di tusna deg izerfan d umezruy d tsertit d tγawsiwin nneγnit...
Di temẓi-inu, tuγa teggeγijjen n useqsi x ixef-inu, ma yemmi awar-nneγ war itwari am tutlayin nneγnit?, manawya zzat i ma ad γareγ ca n tira tura s tmaziγt, umi ssentiγ tesneγ, nniγ aked ixef-inu awi-d ad adfeγamaḍal n tira, sentiγ s usefru, arami day-i nedhent tira γar-sent, ggint-ayi isekraf, jjint-ayi ad iriγ d ismeγ-nsent.
Xseγ ad iniγ belli amaḍal n tira d ijjen n iyyar n tudart yiri s waṭṭas, izemmar ad ibeddar ura d tudart-nni mara amyaru yisi tidet n imunas n waydud-nnes x uεrur-nnes, niγ yisi deg wur-nnes ijjen n usutar zi γar iswiza s wendah γar ijjen n yimal d amaziγ d amezdag.
Σ. D. Aṭṭas di Imaziγen war qqaren bu tmaziγt; min txerrased di manaya?
S.Belγerbi: Wa d ijjen n umxumber d ameqran, war yeği iqqen γar waydud amaziγ waha, maca iqqen γar marra ayduden n umaḍal, imaγray traḥen tudrusen, aked assfay d-tegga tagrawla n tiknulujya n tagracna (lantirnit), ttafed atarras yarezzu x uneγmis zi lantirnit niγ zi TV niγ zi rxezrat-nnes di ca n lfilam…, atarras n wassa itcer x min γar-s d γar yawḍen γar ifassen s nebra tamara.
Neccin Imaziγen εad war γar-neγ ameγray, din ijjen ukemmic ntaf zzay-sen yenni γar yeğa tusmin x tmaziγt, niγ imselmad yarezzun di tsekla tamaziγt, maca bac a nini din imeγray arezzun x udlis amaziγ a t-γaren mammec yarezzu yejjen yeğuẓ x ca n ureqquz n weγrum a t-yecc, a nini εad war yeği, εad imyura ixessa ad arenyen isuraf γar zzat, ḥuma ad zemmaren ad swejden i yimar ameγray-nni.
Maca manawya war d aneγ-itejji a nedwer γar deffar, niγ a neγder deg ifadden i wayawya-nneγ, ixessa-neγ a negg ur ijjen deg unneγnit, ḥuma a nuyar γar zzat s tira d tsekla γar ijjen n yimar n tcuni i tmaziγt-nneγ d ayt bab-nnes.
Σ. D. Cek tettidired di Kaṭalunya (Seppanya); nessen tamurt-a tessemγar tutlayt (langue) aked yidles amaziγ. Iǧa manaya niγ uhu?
S.Belγerbi: Aydud akaṭalani iddar ura d netta di min izeryen ijjet n tudart n reγben d ujeyyef i teddar rexxu tmaziγt, zi manawenni issen min teswa tutlayt γar ayt bab-nnes. S uyenni, tamurt-a s lḥukuma-nnes axminni tafen ca n imenneεraq γar-sen tusmin x tusna-nsen d tutlayt-nsen ticcen-asen ifassen.
Di Kaṭalunya, nec twariγ tmaziγt tegga isuraf mγaren γar zzat, din aṭṭas n imxumbar, d waṭas n tenεekraf, maca imeγnasen imaziγen izedγen di tmurt-a txarrasen s waṭṭas ḥuma ad arenyen isuraf-nni γar zzat, s tmesmunin-nsen d tizemmar-nsen teggan deg umsawaḍ d usufeγ n idlisen yuran s yiles n tkaṭalant, ḥuma ad ssiwḍen ad inin min teεna tmaziγt d min εnan Imaziγen i marra aydud akaṭalani.
Σ. D. Mammec γa ggen Imaziγen ḥuma ad ssimγuren tasekla-nnsen (leur littérature) ?
S.Belγerbi: Tasekla n tmaziγt εad teddar mammec γar tegg a temmutti zeg wawal (cafawi) γar tira, ixessa-neγ ijjen n lta yezzugart s waṭṭas ḥuma a γar-s irin iẓewran deg iyyar n tira γar dixer i tudart n waydud amaziγ, s uya, war nzemmar a nessiwir x ijjen imal n tsekla tamaziγt bra ma ad itwaγar yiles amaziγ deg uγerbaz d tesdawiyin. Mammec netwara tasekla n umaḍal n midden ntaf teddar deg ijjen n lta yeqseḥ; s uya, tγima tudart n tsekla tuyer γar wadaf-nnes deg iyran n sinima d tiliẓri (tilibizyun) d umezgun…
Ixess-aneγ mammec γar nxares a nessiweḍ tibratin n tsekla tamaziγt γar iwdan marra, manawya itas-d s tizemmar d uswizi deg iyyar n usuγel zi tutlayin nneγnit γar tmaziγt u zi tmaziγt γa arsawen n midden, ḥuma a nesbiyyen marra min itwarin s tmaziγt i yennaγnit. Zi ssa, a naweḍ a neffeγ iymaren, ḥuma ad aneγ-γaren ura d midden. U ixessa ad din tiri ijjet n twiza i yenni itarin s iles n tmaziγt, ad aren taynit i tira n iḥenjan imeẓyanen ḥuma ad swejden ijjet n tarrawt d ijjen n arrac n Imaziγen ad yefsi iked min yeğan marra d amaziγ zi tsekla d tutlayt d tmagit d tγerma….
Σ. D. Min γa tinid i Yimaziγen aked Tmaziγin itteddaren addad d aεeffan di tmura-nnsen ?
S.Belγerbi: D ijjet n tidet tyezzem axmi nni-ntaf tarwa n tmurt teddaren sennej i tmura-nsen aḥuzi (ttahmic), d lḥugra, d tattut… manawya yus-d arendat i tasertit taεurubit d-ixezzaren γa Imaziγen am ijjen waydud d midden di tmurt-nsen, manawya nzemmar a zzay-s nennufser di min d-yusin n wussan, mara Imaziγen bedden x iḍaren-nsen, mara munen d asettif deg ijjen useddi, smunen axarres-nsen, ggin afus deg ufus, ḥuma ad swizan ad suyaren tudart-nsen d tmurt-nsen s izerfan-nsen d mammec xsen nitni, war xafsen itray ḥed nneγnit.
Σ. D. Tessned billi adabu (lḥukem) di Merruk ikref aṭṭas zi imeγnasen imaziγen ; γarec ca n wawar x manaya ?
S.Belγerbi: Rmexzen mammec nessen zi mermi war itexs ad iser γar iγuyyan n Imaziγen, amezruy n waydud amaziγ aked rmexzen ameγrabi yeccur s iyezzimen, ca itwaneγ, ḥed itwacar εad war ssinen mani twaneḍren ura mani ğan, mγar deg ussan-a ntaf aṭṭas n imeḍran ssawaren-d s iḍennad abarcan.
Akraf itegg rmexzen i Imaziγen war yeği ca d acraf waha, maca rmexzan yarezzu ad ikref irsawen-nneγ, ad ikref tagrawla-nneγ, minzi assa Imaziγen war ğin am mecḥar uya; assa, snen tiseqqar-nsen, s manayenni, arezzun xaf-sent deg ijjen n lta ntaf εad rmexzen deg ixef n Ifriqiya marra εad iteggwed zeg Imaziγen, minzi issen belli tiseqqar i tettaren di tuttra-nsen d ijjet n tidet mecḥar mma yiriwen wussan a γar-s awḍen.
Σ. D. Awarn i tenfas, nessen Mass Belγerbi ittari tiqessisin tiṣebḥanin s tmaziγt, iǧa ca n usenfar (projet) n tqessisin?
S.Belγerbi: Wah, mammec i dac-nniγ deg umezwaru n wawal-inu, zzat i tira n tinfas teggeγ ura d tizemmar di tira n usefru, aqq-ayi smuniγ tiqessisin tuγa uriγ, zedγeγ day-sent zi twarat γar tenneγnit, u ssitimeγ deg wussan d-yudsen mara yexs Wakuc ad tent-twariγ munent deg ijjen n wammud n isefra.
Σ. D. Wac γarec ca n wawar i Yimaziγen iddaren di barra n tmurt-nnsen?
S.Belγerbi: Tudart di barra d ijjen n ddeğ yemγar s waṭṭas, war kides itici mγar wenni din iteddaren, nec mammec twariγ tudart sennej ijjen ucar sennej ijjet n tmurt n midden taciγ d ijjen ujeyyef yemγar s waṭṭas i utarras mammec mma yegga, waxa γar yiri yecca ul-nnes. S uyenni, zemmareγ ad iniγ i yixef-inu d marra imenneεraq imaziγen yeğan barra i wexxam-nsen, ad irin d Imaziγen mani mma ğan, u manis mma kkin. ad ddaren d nitni mammec ğan, minzi amaḍal-a twariγ-t yegga am ijjen wamẓiw, min i xef mma yekka a t-iṣareḍ; s uyenni, mara war neṭṭif di tmaziγt-nneγ, war nesγar i tarwa-nneγ tutlayt-nneγ, tusna-nneγ, amezruy-nneγ… ataf ad yas ijjen n wass a day-s nettu min neεna neccin, rexdenni, mara niweḍ γar wufuγ-a ataf nweḍḍar. Iwa, ḥuma war netweḍḍar ixessa a niri d Imaziγen swa di tmurt-nneγ niγ newεa γar tmura n midden.
Σ. D. Awar-nnec aneggaru?
S.Belγerbi: Qqareγ-ak tanemmirt d tameqrant x tzemmar-nec tegged ura d cek a Mass Σumar deg iyyar n tsekla tamaziγt, u ssitimeγ ijjen n yimal n tcuni i marra aydud amaziγ.
Igga akides amsawal-a Σumar DERWIC
Asfiğet iga ammud wis sin n tallasin i d-issufeγ umyaru amaziγ Saεid BELΓERBI. Yusa-d udlis-a ad isbuγer iger n tsekla tamaziγt tamirant. Ad nessekti nwis illa γur umyaru-a yiwen udlis amezwaru igan win tallasin umi ifren d azwel ASWAḌ IBBUYEBḤEN, iffeγ-d di 2006. Tawuri igga mass Belγerbi tettwagg di tama tagafant n Yill Agrakal di tmurt n Kaṭalunya mani ittidir netta d waṭṭas seg Yimaziγen ittwaẓẓlen si tmura-nnsen. Di tallasin-a, issawal umyaru aṭṭas γef yinig d uzwag d tmukrisin imunen d yisental-a. Illa daγen ubatu n tγufi ittaγen iminigen g yamu umyaru-nneγ ; nitni ur iẓerren tamurt-nnsen γas yiwet n tikkelt deg useggwas mek iss ufan. Si tama yaḍen, isniret mass Belγerbi deg wammud-a tifiras n tγermatin n Arrif ittwattun akw d unfala n yimezdaγ-nnsent Imaziγen di tmura timezγarin.
Ilul Saεid BELΓERBI deg useggwas n 1974 deg Yiγerbiwen Ayt Sεid tama n Ḍar Rkebdani di Arrif g ugafa n Tmazɣa Tutrimt. Netta d amsellas, amedyaz u d amyaru n yimagraden d yiḍrisen iseklanen s tmaziγt d taεrabt. Iga amaslaḍ n tmesmunt n Yimaziγen di Kaṭalunya. Yamu g usmel n yimedyazen n umaḍal mani nzemmer ad nγer kra n yisefra-nnes: http://www.poetasdelmundo.com/verInfo_africa.asp?ID=3920
Nessaram ad ilint tuddsiwin iswingimen g usnili n yimyura-nneγ d yimedyazen-nneγ i wakken ad ittunefk uzal i tsekla tamaziγt d yidles amaziγ.
Yaru asnili-a Σumar DERWIC
Tamawt:
Saεid BELΓERBI , Asfiğet. Taẓaẓragt Triphagraph, Berkan 2008. 83 n yisebtaren. Tazwart n Σumar DERWIC & Σebdelmuṭṭalib ZIZAWI