Mmeslayen lehdur γef wawal
Am usekṛan mi ara ihedder, acemma ur t-iteffer,
fek-as kan ad yeṛwu tissit.
Neγ am wul n temγart mi ara yeqber, nettat a d-tettargu ṣṣbitar,
ad tekcem γur-s ad teṛwu tuččit.
A d-teḥluḍ, a d-teḥluḍ, a d-teḥluḍ,
a d-teḥluḍ ssya γer tmeddit!
Yak war ma nsuγ " UR NEṚWI", a Rebbi dawi neγ awi!
S wesmuḥya a d-nerr nnefs.
Ay allaγ kečč lleγwi! Ajelkaḍ-ik ad yesseḍwi,
ad yesmundel mummu n yiḍeṣ.
A d-teḥluḍ, a d-teḥluḍ, a d-teḥluḍ,
a d-teḥluḍ adif, iγess!
-------------------------------------
wwin-d γef isefra awal, uggten imeslayen γef lehdur.
Kker tura a lqut γer nnwal! Bu tawant yeqqel meεdur.
Slalen-d ccwal i ccwal, weznen uzzal s wuffal,
sduklen tazart d wemdur.
La ttwaliγ kra d asellaw, luγent tliwa-w,
awal yuγal d ameγdur.
Γilen fessuset tγawsa, εeddi kan zger asefru.
Γur-sen imeṭṭi am taḍṣa, γas acmumeḥ-nneγ yettru.
Mgaraden umeğğed d tawsa, yak timess ur tensa,
deg ujajiḥ i d-yessusuf wemru.
Ajeğğig n wurγu yefsa, ma nsuḍ-it ass-a,
nuli di teflukt uγurru!
Nugi ad nemmel si txidas, nerra-tent tura d usu.
Anwa i zeglent tsuqas? D ssem yakk i d-nettusu.
Amek ara agadeγ aweqqas neγ izem aγilas,
ladγa ma ur sεin aseḍṣu?
Γas aqerru-w d aferḍas, mi ara s-yali ureqqas,
seg igenni ur d-yettrusu.
Tamuγli deg-i tzellem, ma d bab-is ur t-mlaleγ.
Yeqqel d bu war tuγmas yizem, ira a t-ttagadeγ.
S wulac ilem i t-teččurem, i waḍu tsellem,
targit-is deg-wen teffeγ.
A ziγ d aẓawan-is i tḥemmlem, yettsuḍu, tceṭṭḥem,
icennu " aqendur a wen-t-cuffeγ".
Yya-d a gma ur qebber ul-ik, ur ḥerres iman-ik,
eğğ-aγγer zdat ad nmuqel!
Amdan ma yewweḍ yessen-ik, yeqqim iḥemmel-ik,
d netta i d ameddakel.
D tayri n tegmat γ-icedhan i d iyi-yesselhan,
seg wul-iw werğin terwel.
Bru i tismin k-yessedhan, anwa i k-iwehhan
s abrid ideg k-yesderγel?
Sεid At Mεemmer