Si talast akin
Lehdur-a d allen n lemri, ax wali iman-ik deg-sen!
Deg-sen ẓer a win ur tt-nefri d yimmad-is ur yessen!
Kkseγ-asent εeryan i tekta, sburreγ-asent s tmuγli.
Ad twaliḍ akken iwata ayen akken tγileḍ ur yelli.
Ifrax yeγlin seddaw terga, ur zmireγ ara a ten-ttuγ.
Yes-sen aεwin n tmettant i ihegga, asmi tenna “ s wigi ad gluγ”!
Yal taqellaεt akka i tga, deg wallen-nsen seg laẓ tesmuγ.
Slan i usirem imerga yenna-yasen “ yid-wen a d-dduγ”!
Win ur nesεi tabγest i tirga, ur yesεi ara afud i umennuγ.
Tamusni, tussna d tirga d abrid yuγ yakan Uharun.
I tunṭict-is lfal nhegga, asmi neqqar “ yesleb umeγbun”!
Lemmer am netta yakk i nga, tili arquqen-nneγ ur ttrun.
Ur γellin seddaw terga yefrax, nekkni imcumen ur γ-ttγurrun.
Ur nettuγal i icenga d izembyal ibubben leqrun.
Akud yeqqel amzun d aγyul segmi nuγal d izembyal.
Lmizan n teεkemt-is d ul, yezga yeddem-itt γas yettmal.
Tasmunt-ik d tamettant kečč a bu tidet d tebγest.
Ulac anida ur ntant sut teqreḥ m yemseγret.
Imseγret d-ddment nnhati mi d-yeffeγ si lfuci-k ay ul.
D agulen n War aseγti i k-yeğğan yeddem-ik lhul.
Lhul yeqqaz, yettweṭṭi, almi d-yeffel seg wallen.
Yessufeγ-ik-id d imeṭṭi nettaf ma ulac allalen.
Allalen isebken gar ifassen ikerfen seg taγert n wallaγ.
Ḥewwa d Adem ur ten-nessen yiwen deg-sen ur γ-yenni a d-uγaleγ.
Tuγalin-nsen d awezγi γas fessus wayen a sen-ssutreγ.
Riγ ad asen-iniγ “war imenγi, mmeslayet s tagi is d-kkreγ”!
Asmi a d-nnulfunt tira, ad tezwir tiyaḍ γer lkaγeḍ.
Ihi ata mliγ-ak tura tirga iγer d-nessaweḍ.
Neγ Tamuγli-s treggel fell-ak imi tfaq d nettat i d targit?
Wissen acuγer teffer fell-ak? Wissen acuγer a taqbaylit?
Asirem zdeffir talast, γur-s ur newwiḍ, nettwali-t.
Am umaẓẓag n tfunast mi ara t-isumm mmi-s yeṭṭeḍ-it.
Sslexseγ-t γileγ a t-ḥamiγ wallaγ yeqqlen d azeqqur.
Allaγ fesreγ, ur t-ẓẓmiγ, yekkaw s ilefḍan, yeqqur.
Deg twuri riγ samiγ, zemreγ a s-semmiγ,
tin iγer ddmeγ acaqur.
Ay ul lemmer ur ḥareγ εmiγ, γef tidderγelt lemmer ur nemmiγ,
ur yesriffig wemqerqur.
A yemma deg-neγ ufan, ini-yi “ a mmi ugur d kečč “!
Yekker-d deg udaynin ger yilfan, la d aγ-yemmal amek ad nečč.
Iγeblan deg-m stufan, a yemma rniγ-am urfan,
mmi-m cuffen-t ur ifecc.
A wi yeqqlen d llufan, maca, d win yecfan,
deg tirga-nniḍen ad yesxentec.
Ul ma ireggel γef tidet iḥemmel, d timseεreqt m tindect yefsin.
Ixef-is ulayγer ad aγ-tmel, yak ulac anwa ur t-nessin.
Yeddem tarewla imi yemmel, tawwurt ma ur tt-yemdel,
ahat at tidet ad steqsin.
Yennejla γef tidet iḥemmel, akken ira yuzzel,
iminig turğa-t tisin.
Sεid At Mεemmer