"...Σecra iseggasen bezzaf, barka, ilaq d lweqt ad d-iban yixef-is, ula ayen nerna si 10 iseggasen d asawen. Nekkini amzun ass-a i yemmut Lwennas, ur εyiγ ara « Jamais »..." Nna Σelğiya
Muḥamed Gaya: Wwḍen 10 iseggasen seg wasmi yettwanγa Lwennas Matub amek tettwali Nna Σeldjiya ma yella iban-d kra γef tsestant n unadi γef tmenγiwt-is?

Nna Σelğiya : 10 iseggasen ayagi seg wasmi yemmut Lwennas ulac tamurt ğğiγ, ulac anda ur suγeγ ara, ulac anida ur d-nniγ ara, akken yeqqar deg wawal-is Lwennas « ssawaleγ ur iyi-d-slin » La ssawaleγ, la neddheγ, la ttnadiγ ur yelli win iyi-d-yerrin « la réponse » γef lmut n Lwennas. Nekkini lmut n Lwennas, γas ur iyi-d-yerri ḥedd ṣṣut neγ leğwab, nekk leğwab-iw deg uqerruy-iw i yella. « Jamais » ad bruγ i uεekkaz γef lmut n Lwennas, axaṭer d axxam-iw i inegren, d axxam-iw i yexlan. « Tujur » ger wallen-iw ayen yeḍran yid-i. Ur tettuγ ur t-tettuγ, εecra iseggasen ayagi a teẓẓad tessirt « pour rien ». Mi akka ur d-iban ara Lwennas win i t-yenγan, akka ara teẓẓad termegt d rrεud mebla ageffur, a tberren kan, nekkini ḥabbeγ ad d-iban win i t-yenγan, d ayagi la ttqellibeγ. Σecra iseggasen ayagi, yemmut lḥewt.

I wid yeṭṭfen tamsalt-agi acu d-nnan, imi neẓra taγdemt, tefka-d ismawen n yelmeẓyen n At Dwala d nitni i yellan deffir n Tmenγiwt n Lwennas, amek tettwali Nna Σelğiya tamsalt agi ?

Ladγa si lğiha-nni ulac acemma, si lğiha-nni rran-as « la dalle» . Nekkini γas rran-as-tt, kkseγ-as-tt, akka ara ttnadiγ, γas mmuteγ, γas yegra-d yiwen weqbayli ad ikemmel « l’enquête » n Lwennas. Ur nesεi iεdawen deg At Dwala, seg yiwet n tbaqit ay ntett, leεmer llan wigad-nni d ixṣimen. Ma yehwa-yak seddu-t-id deg ujarnan, ur yelli aṭas ayagi i s-yeqdec bab-as di tmeγra, llan d lğiran-nneγ, dina i nezdeγ deg At Dwala imiren. Ar tura mazal-it wexxam-nneγ. Ur llan win t-yennulen, ur llin d ixṣimen, ur llin d imakaren, ur llin d iqettalen, d atmaten i illan. D lmumenin γef mmγen.
I tsestant n unadi, amek tkemmel, mi d-yenna uselway Butefliqa ad d-fkeγ afus?

« Jamais » yella kra, ur iyi-d-yerri lğawab, yefka lεahed yeskaddeb, seg wasmi i t-ẓrant wallen-iw, nhar amezwaru i t-neẓra γef « l’enquête » n lwennas, leεmeṛ, ula d yiwen n nhar iyi-d-yerri tiririt, acemma!

I wid d-yettasen γer Tewrirt Mussa Weεmer amek ttwalin, ahat yeččur wul-nnsen?

Wid d-yettasen γer dagi qlil win ad d-iṛuḥen ulac imeṭṭawen deg wallen-nnsen, ḥussen akken ḥusseγ, γelbaγ-ten kan s tasa, axaṭer εebbaγ ayen i iεebba udrar. 10 iseggasen ayagi leεmeṛ kkreγ seg ukersi. Ulac lğens ur ẓrant wallen-iw, ulac lğens iwumi ur hdireγ ara. Wid d-yettasen ssuturen tidet, mkul nhaṛ, ma drus ara k-t-id-inin, εecra neγ εecrin ma drus. Zgan qqaren-d s anda tedda temsalt, qarreγ-asen d ayen i twalam ay walaγ, lamer yella ayen d-yewwten γur-i ad awen-t-id-iniγ, imi ulac. Nwan sefḍen tamsalt, nekkini γur-i ur tesfeḍ ara, « Jamais ».

Mkul tamurt la sewjaden, la tteḥdiqiren, meεna win ara d-yinin awal agi ẓẓay fell-asen, cceεb meskin lamer yufi iban-d yixef-is. Ttqelliben γur-i, nniγ-asen d acu ara wen-xedmeγ nekkini. Qelbet kunwi, nekkini yella kan yiwen wawal, ur berruγ i uεekkaz. Tasarut attan γer cceεb, fkiγ-asen tasarut-iw ad ldin yess tawwurt, ad xedmen akken i sen-yehwa, ala lexṣara ur qebbleγ ara. Lexṣara ur tt-ttaqbaleγ ara i teqbaylit. Ma yella γef temsalt n Lwennas ad qelben, ad nadin.

Aql-i greγ tiγri i cceεb anda ma yella, mačči d axerfi i γ-iruḥen, d izem i s-iruḥen i Lezzayer. D Lezzayer i bγan a tt-rẓen di tlemmast. Aql-i greγ-asen tiγri ad nadin γef temsalt n lwennas ilaq ad d-afen ixef-is, ad d-iban win i t-yenγan. Ẓriγ yella deg wulawen-nnsen, meεna tikkelt-agi, εecra iseggasen bezzaf, barka, ilaq d lweqt ad d-iban yixef-is, ula ayen nerna si 10 iseggasen d asawen. Nekkini amzun ass-a i yemmut Lwennas, ur εyiγ ara « Jamais »! Ḥaca ma yebra yimi-w i weγrum ad bruγ i tsestant n unadi γef lmut n Lwennas. Lğerḥ-iw ur iḥellu, mačči d lğerḥ i iḥellun, ur yeḥli ur iḥellu. Asmi ara d-iban win i t-yenγan, imiren amer ad ḥluγ. Ma d tura « Jamais ».... Ur bγiγ lbaṭel γef yiwen, bγiγ lḥeq, lemer d lbaṭel mačči armi d ass-a i tefra... Bγiγ tidet, d acu n lfayda ma rriγ-d γef walbeεḍ lbaṭel, wwiγ lεib, wwiγ ddnub. Qarren-ak win yenγan ad yemmet neγ yettwaḥbes. S kra n win yemmuten iban-d win i t-yenγan, siwa Lwennas ur d-iban win i t-yenγan.

Izen a Nna Σeldjiya i wid i ireffeden amennuγ γef tmaziγt d wid i d-yeslulen tafsut n 80 s imussuyen d tidukliwin tidelsanin i iqeddcen, d acu tessarameḍ?

Sarameγ ad d-akin, ad d-akin seg yiḍes. Nεeyya, εecra n yiseggasen ur nrennu fell-asen, d lweqt. Akken i s-yeqqar Lwennas deg wawal-is “win i yesdergen iman-is di Tizi n leḥris iεemmed neγ ittekka”.

At Dwala ass n 10 yunyu 2008.

Muḥamed Gaya γef Kabyle.com