Tamagit d yedles mačči dayen ara yettwaḥerzen s twuri tadelsant kan.

D tawengimt tasertant-nni ur yessaweḍ ara ad tt-yessali umussu adelsan amaziγ ( M. D. M ) i t-yeğğan yeqqim kan d amselγu n tmagit.

Adiwenni d Salem Caker ( yesteqsa-t Yasin Faraḥ n weγmis “ Lwaṭan” )

Mi ara d-yawi wemdan abrid neγ ad iḍegger tamuγli-s si yebrir n 1980 ar yebrir n 2008, ar wanida akka d-yessaweḍ tikli-s umussu adelsan amaziγ ( M. D. M. ) ass-a?

Ayen ara d-iniγ, ẓriγ dayen ara yessefriwsen kra n yemdanen, maca, aql-aγ γef yiri n lkaf, acuγer?
Acku amussu adelsan amaziγ ( M. D. M ) yella yedder kan d adelsan, daya. Annect-a ur t-yessaweḍ ara ad s-ttwinefken yes-s izerfan d yeswiyen isertanen akken ad yizmir asemres-nsen( ineggura-agi ) deg wennar, d annect-a i yeğğan tidet tettak anzi s iṭij ur yettγum uγerbal n wakud. Ihi talalit n umussu tusa-d seg ucemmer iγallen n yemdanen akken ma llan di tmetti taqbaylit neγ tadzayrit s umata, mačči si tnekkra neγ seg umennuγ n waggagen neγ imussnawen imeqqranen, uhu.
Daya daγen i s-yuγal snan di yebrir d azemz iεeğğren di tesga n yal ul.

Yella kra n webrid n lewqam twalaḍ akken ur nettegririb ara di lkaf-agi i wumi nukel γef yiri-s?

Ur yelli ara wamek i yezmer ad yili usenfar adelsan yettwaεzel γef usatel-is asertan, imetti d udamsan.
Ama d iqbayliyen ass-a neγ d imaziγen s umata gezmen akk asirem ula γef tudert n lḥif i lebda, ur neggren ara neγ ad ḍeggren isurrifen-nsen γer zdat ( asnefli ) war ma ssulin i yiman-nsen kra usenfar asertan s teγdemt-is tadigant d udamsan n war tiqecmaε. Tamagit d yedles mačči dayen ara yettwaḥerzen s twuri tadelsant kan.

Dacu n ttawil twalaḍ kečč ihi ad as-yelhu?
Ma yehwa-yas i wemdan ad yefreḍ tindaw zdat wallen-is, ur d-yegri kra n wefran neγ ttawil-nniḍen i yeqbayliyen sennig amwafeq γef tsertit tadsimant ideg ara dduklen. Akken ad tiγzif tudert-nsen, yessefk-asen ad fken i yiman-nsen allalen-agi. Tadsimant d tazmert n tsertit d teγdemt igeddren iγef yezmer wemdan ad yesseqdec allaγ-is.
Lemmer ad iḍegger wemdan tamuγli-s γer tmurt n ikaṭalunen, ad yemlil d umedya-agi igerrzen nezzeh: Wwḍen γer yeswi-nsen, acku sdduklen leqdic adelsan, asnilsi d usertan. Ihi war ma uγaleγ d aderwic, atan ma ur ddiren ara imaziγen di kra n tzelγa tasertant tadsimant, γas ini fell-asen si tura: „ Atan yeččaten wasif ass-a neγ azekka!“.
Mgal tudert-nsen kra yellan: Tutlayt tadersit, tasmaḍalt, tineslemt s wacciwen-is d uwanek bu snasel d leqyud.

Dacu d-yekkan si tama udabu adzayri deg wayagi yakk?

Yessefk amdan ad yini ayen yellan. Mačči d lbaḍna i d-feḍḥeγ ma nniγ-d adabu adzayri ur yelli ara d ameddakel n tugdut, s wannect-a i tuγal tullya n tewwura i wawal d weskasi γer tlelli d waṭas iberdan isertanen akken iwata d awezγi. Daγen " susef s igenni, ad uγalen s udem-ik", ur yezmir ara wemdan ad yemdel tiṭ-is γef waggagen iqbayliyen yetteddun γer wissen sani.
Aḥric ameqqran gar-asen imeqqranen-agi isertanen tturaren turart uwanek-aγelnaw. Ur d iyi-tettawi ara tγerγert mi ara ttwaliγ deg waggagen idzayriyen knan akk i iεenqiqen-nsen zdat tecdaṭ uwanek-aγelnaw. asinef n webrid udabu ur tessinen ara neγ γilen ur tteddun ara γer zdat war netta, amzun ur yezmir ara wemdan ad yeγz ula d aẓekka i yemma-s ma ur d-yewwi ara agelzim si Lmuradiyya.

Tessergagi tekti n tedsimant n tmurt n yeqbayliyen icekkaben n at Lmuradiyya?

Ad iniγ ih war wahin neγ tahin. Azrem yettagad yal tiγrit d-yetteddun s aqerruy-is mi ara yettwernenniḍ akken i s-yehwa deg wennar neγ deg wemraḥ. Anabaḍ-agi yeckunteḍ am jebbirdu seg 1962 deg kra yellan:
Taεessast, taγdemt, taγamsa, tadamsa d kra yesselḥayen akk tameddurt. Tadamsa talellit neẓra yakk ulac-itt di Ledzayer, d takabanit imakuren ( imakraḍen ) yeqqnen imurar-nsen γer Lmuradiyya i yellan kan, daya. Yal win ad yezgen am wugur zdat yemcumen-agi, ad inadi ad yegzu dacu yeffγen d wayen d-ikecmen ama seg yedrimen neγ seg wayen-nniḍen, ad t-walin d aεewwiq. Ayen akk ad yerren i tlelli umeslay d tmetti taγrimt tazmert-nsen ad sen-yuγal am weḍγer di taγect. Amdan ur yessefk ara fell-as ad yargu neγ ad iγil ahat adabu adzayri ad yanef i tegrawla tamagit ( tadsimant ) s webrid n tlelli war tuzzya neγ tunḍa.
Ḥala tazmert n tdukli m wafud igerrzen i izemren ad temger ijeğğigen di tebḥirt n tedsimant.

Aql-i smuḥyaγ-awen-d adiwenni-agi, ihi mačči d asuqel-nni n 100%, yal wa yetteddu kan akken yufa, mačči akken i s-yehwa.
Ssuref-iyi ttxil-k a mass Caker ma yella aṭas n tikkal i yecḍeγ!
Muhabdiki