Imuḥyaten n trumit
Mi akken γriγ tabrat-nni, tabrat-nni i d-iyi-d-tuzneḍ.
Walaγ ul-im amek i yettergigi, mi tt-yura win ideg tessutreḍ.
Winna ideg tessutreḍ ad tt-yaru s tmeslayt ur tessineḍ.
Walaγ iẓri-m la yettru, walaγ-kem a yemma tḥezneḍ.
Tekkfa fell-am ddunit, tferneḍ abrid ur triḍ.
Tnudaḍ ad tafeḍ talwit, teddiḍ γer WISSEN SANI, teẓriḍ.
Teẓriḍ γer WISSEN SANI i tleḥḥuḍ, tessarmeḍ γur-i ad tawdeḍ.
S teqbaylit mi akken i s-tḥekkuḍ, di trumit tesmuquleḍ.
Iḥulfan-im γas ulamma yesgucel-iten SSI TADIR.
Deg-i la ttuḍun a yemma, skecmen i wul-iw lḥir.
Skecmen i wul-iw lḥir, anezgum-iw yennerna.
Yiwet deg-kent ur telli di lxir, am tmeslayt am kemm a yemma.
Si taman makken tekker, asmi akken d-tlul targit.
Nγil γur-sen i teffer, ḥarzen-tt ad tt-naf tameddit.
A ziγ kra din d asberber, d iγiγden qqel a tirgit!
A yemma s wigi i tenger, d imuḥyaten n trumit.
Essaid At Maamar