IMEṬṬI N BAB IDURAR
D asefru ad zegreγ tura γef tmerγa i γ-yeğğan ncaḍ.
Ad as-azneγ tisura i tmuγli n wul asemmaḍ.
Ad tekker ad tcali di tmura, ahat ad yefsi weblaḍ
deg taddart ideg yeḍra, wayen ur neḍri di tiyaḍ.
I weqcic d-yeffγen seg-s, sani ara yessiweḍ tameddit?
Deg iḍarren-is akk yesseγreṣ, yeṭṭef-it yiḍ di taddart TALWIT.
Seg wakken ur yesεi amwanes, axxam n yemsebriden yettnadi-t.
Yenneqlab kan yesla i lḥess, iwala amγar yeḍfer-it.
Azul fell-ak a baba amγar, anda-t wexxam n yemsebriden?
Yya-d a mmi ad nelḥu amecwar, ur yelli d win ibeεden.
Amγar zdat-s yezwar yerna d win i t-yessawḍen.
Yedda yid-s almi d imi n wemnar n wexxam n yemsebriden.
Atan a mmi ihi wexxam, anida i tzemreḍ ad teṭṭṣeḍ
yerna ngum a d-yeγli ṭṭlam, a k d-awin imensi ad teččeḍ.
Di tlemmast n taddart i tebnam, axxam-agi iγer i d iyi-tesskecmeḍ.
Tura γas kkes ttexmam, tanemmirt! Ihi ar tayeḍ.
Aqcic yeqqim di tqernit n wexxem ideg t-yeğğa wemγar.
Γas ma teγli-d tmeddit, γef imensi ur igir tisγar.
Yak taddart-a isem-is TALWIT, i truẓi uqerru, acuγer?
Ur tezlig fell-as targit, asirem deg yiman-is ur yessemγer.
Ur yuḥtam almi s-yesla, yezzi-d kan deg-s iwala,
m wul ur nessin tebrek.
D tamγart teččur d leḥmala, amuḍin ma yeẓra-tt yeḥla,
ad yeqqel amzun werğin yehlek.
Azul a mmi aql-aγ nella, ugmeγ-d aman si tala,
tura a d-uγaleγγur-k.
Azul yes-m lεeslama, s tezmert-im a yemma,
γur-i yuzen-ikem-id lmelk.
Tasusmi terna teggugem, s kra yettawlen irekkem,
yeγli s iciwi n trusi.
Tamγart tessaweḍ aman d-tugem, teṭṭef deg wawal tṛeggem,
tewwi-d i inebgi imensi.
Ay iḥulfan tuccagem, mi akken s-tefka abernus d-teddem,
teggull i usemmiḍ ur yensi.
Aqcic d uḥdiq ur yessusem, dγa s ul n temγart yekcem,
teddem tebda-yas-d asteqsi:
Tamγart s wawal tettaẓ, tessen tiẓeṭ ideg d-tesquccuḍ.
A mmi teεyiḍ terniḍ laẓ, ansi-k, anida ttedduḍ?
Deg iqerra ssusmen yebẓaẓ, ay aqcic d acu tettrağuḍ?
Ugadeγ ad iyi-d-teddmeḍ aεekkaz, a d-tiniḍ kker ad telḥuḍ!
Tidet lemmer ad am-tt-iniγ, ul-im seg-s a yemma ad mḥuγ.
Mi kkreγ a d-mmektiγ, ad zzreγ s anda tettuγ.
Ur cfiγ ansi i d-kkiγ, ur ẓriγ anda tedduγ.
Ttuγ daγen isem ay sεiγ, i tura d acu ad am-d-rnuγ?
Ad rfuγ fell-ak, acimi? Ad teqqimeḍ akka ar melmi?
Ihi attah tidet ssneγ:
A k-iniγ yiwen wawal a mmi, yya-d ad teqqimeḍγur-i,
nekk iman-iw i zedγeγ.
Axxam meqqer ad aγ-yawi, amḍiq ad yegri,
ad iyi-twanseḍ a k-wanseγ.
Tixsi a γ-d-tefk ayefki, ayen is ara nedder ad yili,
awal aql-i ad ak-t-fkeγ.
Aqcic yesbek, yettwehhim, ur yumin ara imeẓẓuγen-is.
Maca, d asusam ur yeqqim, yemḥaḥed, yeldi imi-s:
Yenna-yas ma yella s tidet-im, " yessaked tamγart s allen-is",
ad qqimeγ, err-iyi d mmi-m! Γef tuyat yeẓẓel afus-is.
Γas amzun seg igenni i d-γliγ, teldiḍ-iyi ay asirem ul-ik.
D tidet ayagi ttwaliγ neγ tγurr-iyi targit-ik?
Tenna-yas kker i d ak-nniγ, deg wexxam ad tkemmleḍ učči-k!
I tura amek ara k-semmiγ, imi akka tettuḍ isem-ik?
Tiririt yelhan ur tt-yeẓri, yufa-yas-d tin is ur yeγliḍ.
Akken i m-yehwa semmi-yi! I s-yerra ur yezzi, ur yenniḍ.
S wawalen d-turew tayri, tenna-yas ur nwiγ almi d-teflaliḍ.
Ihi a mmi a k-semmiγ ITRI, amzun seg igenni i d-teγliḍ.
Yenna-yas yelha yisem-agi, yekcem igenni wis-sa.
Isem-is tura temγart-agi? Tenna-yas isem-iw BISBISA.
Yelha ula d isem-agi, ikemmel učči mi d as-d-tessa.
Kker a mmi ad teṭṭṣeḍ dagi, aṭas i d-telḥiḍ ass-a!
ITRI yekcem γer wusu, yewwet-itt γef yiwen yidis.
Yebred nezzeh si εeyyu, amzun aseggas ur yeṭṭiṣ.
Azekka-nni teğğa-t ad yesteεfu, BISBISA ur yesli i lḥess-is.
S leḥder i tqeddec i tleḥḥu yerna zik i d-teldi tiṭ-is.
Almi izeggen wass i d-yekker, ulac γef wacu ara yeccetki.
Am winna yeṭṭṣen yeskeṛ, yuki-d yettnadi a d-yemmekti.
Di ddunit wa yesεa ẓẓher, wayeḍ tawenza ur d as-tefki.
Tefka-yas-d BISBISA ad yefḍer, tessers-as-d tazart d uyefki.
D ayefki n tixsi i k d-ssewweγ, ečč tazart d ak-d-sserseγ,
ass-agi ad ncali, ad nḥewweṣ!
Mi s-tenna ečč akken ad neffeγ, yemmekti-d γer BISBISA i yezdeγ
yerna ad yeqqim γur-s.
Ul-is yecreh yettaḍṣa, d win turew i temlal tasa,
γas ma s tidet mačči d mmi-s.
D acu ara xedmen ass-a? ITRI yeffeγ d BISBISA,
tesken-as-d taddart d iḥerqan-is.
ITRI yuγal am mmi-s, ikess-as tixsi-s
yerna izeddem-as-d isγaren.
Yerra lqeḍyan d ssuq-is, d aẓidan yiles-is,
yeḥdeq s arrac s imγaren.
Di tiḥerci-s kra ur yenγis, ḥemmlen at taddart tikli-s,
γas ma d terẓeg n tiṭ i yezzewren.
Sseεd-is yuki ur yeṭṭiṣ, tgerrez ddunit-is,
iḥemmel yemma-s t-iḥemmlen.
Yiwen wass deg wussan, d aṭṭan amcum i d-yesteqsan,
BISBISA teṭṭef tiγmert.
Ay adfel γef uqerru yessan, d acu akka i d-yusan,
d acu yettrağun tamγart?
Yak kra win i t-iheggan, yeḥrec ur yeggan,
amdan tegguni-t taγert.
Ay ITRI awi-d sin inagan, leεmur ttafgen,
ngum a d iyi-tcuddeḍ taγeṣmart!
Gilda d Salu yegla-d yes-sen, BISBISA tenna-yasen:
ttxil-wat aẓet-d γer γur-i!
A tamuṭṭut d wergaz ay iεzizen, lecγal yessefk ad berzen,
yak ur yelli d ayen n diri?
Cfut a widak igerrzen, azekka ur neẓri d acu a d-yasen,
lmut tura γef yal d iri.
Axxam-iw d netta ara t-izedγen, iḥerqan-iw d netta a d-ṣaḥen,
kra a d-ğğeγ d ayla n YETRI.
Ddunit akka i tella, yelha wayagi d-tenniḍ.
Kemm tenniḍ nekkni nesla, awal ur yezzi, ur yenniḍ.
ITRI ad yawi axxam lexla, kkes akk aγilif tesεiḍ!
Tezmumeg acemma BISBISA, drus kan teγli, tettγiḍ.
Tettban-d am wakken teṭṭeṣ, temmut mi teγli γer deffir.
ITRI tγaḍ aṭas, aṭas, Yekker ad yettru, netta ur yezmir.
Yeqqel i wallaγ iḥesses, BISBISA tedder di lxir.
Yeẓra yecreh wul-is yes-s, talwit ideg tella ur teffir.
ITRI yegra-d iman-is deg wexxam i s-d-teğğa BISBISA.
D tixsi i d tamwanest-is, beṭṭu yejreḥ-as tasa.
Ikemmel am medden tameddurt-is, almi d asmi d-yuγal si lexla.
Yekker ad yekcem s axxam-is, yufa ur yezmir ara.
Yeḍra wayen ur nḍerru, tagi d tidet d tamuffirt.
A ziγ awezγi ur yettkukru, ur yessin timendeffirt.
Tawaγit n YETRI d asefru, tewwet-it-id tferract n tewwurt γer tgecrirt.
I tedyant-agi amek ara tt-yefru, lqermud n wexxam ddaw timiṭ?
Inuda yufa-d tiririt i yesteqsiyen s wayes i s-yekcem ttexmam.
Kker kan ad teṭṭṣeḍ di tebḥirt ay ITRI yugaren axxam!
Γas ulamma d tameddit, d azγal, anef a d-yeγli ṭṭlam!
Walit ay at taddart walit, d leεğeb a ddin qessam!
Azekka-nni mi yuli wass, at taddart wehmen akk deg-s
yerna ur t-εqilen ara.
Akken llan uzzlen γur-s, tamezwarut yemmeslayen yid-s,
TAFAT i d isem-is tinna.
Taqcict testeqsa-t tenna-yas: Anisi-k ay argaz?
D ITRI, amek ur d iyi-tessineḍ ara?
Amek? D kečč i d ITRI? Awwah, amek akkagi?
I wannect-a amek i d-yusa?
Nniγ-am ITRI d nekkini, d TAFAT kemmini,
atan wexxam n BISBISA.
Uhu yiwen ur t-yenni, umnen-t d tirni,
imi d-yuder BISBISA.
Ay akka yecmet wudem-is, amzun d amadaγ uqerruy-is,
iγallen-is d ayen ur nettwabdar.
Annect n sin yetrakturen iḍaren-is, ITRI yemḥa later-is,
isem-agi yečča-t yeγẓer.
Taddart yessagad arrac-is, ur t-ḥemmlen lγaci-s,
ssawalen-as BAB IDURAR.
Yelha imi d-nezger asefru, d inigi n wakud amessas.
Tindict yes-s ara tefru, i umezruy ad yeqqim d aεessas.
I teqṣiṭγezzif usaru, yella wacu ara yekrez wemru,
ccḍeḥ war tiqeṣrit yers-as.
BAB IDURAR yeṭṭef aqerru, deg yiḍ yettwanas bururu,
ur yeggan daγen deg wass.
Cemteγ, ugin-iyi medden, kerhen-iyi widak ḥemmleγ.
Arrac deg-i ttagaden, ihi tura amek ara xedmeγ?
Takti deg wallaγ tedden, ḥala tiẓgi ara d iyi-irefden,
amadaγ ass-a a t-kecmeγ.
Amdun d netta i t-yeγzen, yeggan di tlemmast-is am wuccen,
asemmiḍ deg wezγal yeffeγ.
Ur yettagad uccanen d yilfan, ur zmiren a d-zzin γur-s.
Maca, ssmaḍiḥ asmi d-stufan, asemmiḍ n tegrest iteqqes.
D acu n tqubbet-agi d-yennulfan? Di ddunit ulac anwa i yecfan,
i tnezduγt ad yekken nnig-s.
I leεğeb ifassen ur krifen, yessuli axxam zdat wasif s icerfan,
atan amek yefra ccγel-ines:
Ur yeḥwağ agelzim d telwaḥt, s ufus kra yellan yezmer-as.
Yezwar deg uweṭṭi n tberṭeḥṭaḥt, deffir-s sakin yeγza llsas.
Aman seg wasif i d-yugem, deg tayedwin yegzem,
lebni n iγerban s yedγaγen d waluḍ yers-as.
iseqqef axxam s tayedwin yakk d teblaḍin,
isγaren ubelluḍ deg tewwura d ṭṭwiqan fkan-as.
Yesbedd axxam annect n wedrar, yezdeγ deg-s iman-is.
Lεib-is deg umadaγ yeṣṣer, akka i d as-yenna wul-is.
Ur yesseγzef amecwar, ur yurğa ar d yemmet si ccer,
tiẓgi hraw wakal-is.
Deg inijel yegzem yeẓber, deg wenγac d tyerza yezwar,
atan wayen yeẓẓa di tebḥirt-is:
Ifelfel, tajilbant, taga, lebṣel, lleft, zrudiya,
lḥemmeṣ, ddellaε d texsayt.
Akbal, lekremb, claṭa, afeqqus, ibawen, lubya,
nneɛnaε, akbal d tiskert.
Yuγal yeγza igeḍyen deg tama-nniḍen,
i ččina, rremman d tẓurin.
Ma deg iḥerqan imeqqranen, yak widak banen,
yezreε irden d temẓin.
Yerwa aγrum n yirden d temẓin, aksum n yewtal d tsekrin
d win n yilfan umadaγ.
Tissit-is d aman d wid n tẓurin, ẓẓeεter d nneεnaε ur t-xḍin,
am Rebbi di Fransa i yezdeγ.
Γas wid yettnadin ufan, tamuγli n wemγar ad teqqel am tin n llufan,
seg wayen ara walint wallen-is.
Iceṭṭiḍen yesburr medden ur d asen-d-cfan, s weglim n wuccanen d yilfan,
i d-ifeṣṣel i weglim-is.
Ameskar n tullist akken i d-yenna, BAB IDURAR ur yezmir ara,
ad yedder deg taddart TALWIT.
S wayen n diri i ttmeslayen fell-as merra, γas ulac win i wumi
yexdem kra,
rran-t amzun mačči d amdan a tawaγit.
Yir lehdur ffγen fell-as, yerra-tt i uxemmem.
Yettxemmim am yiḍ am wass, amek ara yexdem.
Amek ara yendi tasennart, akken iḥemmel lγaci n taddart,
ula d nutni am zik a t-ḥemmlen.
Ayen yettnadi yufa-t, takti tban-as-d am tafat,
mi s-tceṭṭeḥ zdat wallen.
Mi yessalay leḥsab-is, amzun iḥetteb deg iḍudan.
mi yemwafaq d rray-is, ffγen-as-d sin iberdan :
Yessefk imcumen ad ẓren, γas qqleγ d win icemten,
mačči d nekk i ifernen axessar.
Ilaq daγen ad faqen, nekkini mazal ḥemmleγ-ten
yerna mačči d aqeṣṣer.
Awwah, tikti tamezwarut, ur ḥṣiγ ara a tt-fehmen.
A sen-d-sekneγ taneggarut, wissen ahat a yi-ḥemmlen.
Annect-a deg twenza-s yura, ula d netta yeẓra,
atan ihi amek i yexdem :
Win yekkren ad yerfed kra, ma ẓẓay ur s-yezmir ara,
a d-yas netta a s-t-yeddem.
Yal win ara yekkren ad yebnu, d netta ara ibibben taεekkemt-is.
S yedγaγen d yejga a s-d-yeglu, a t-yerr yeldi deg yimi-s.
Ma d afeqqus, ččina d tẓurin, steqsi arrac ma ur ten-ṛwin,
war ma nettu ayen akk nniḍen ččan seg ufus-is!
Tayri teffukti am tyedrin, d ayen yettnadi i d-yezzin,
uγalen ḥemmlen-t at taddart-is.
Yiwen useggas deg unebdu, qqurent merra tliwa.
Γas a d-yecnu Yidir " ssendu ", tamurt teffud ur teswa.
Azγal deg ifadden yettcuddu n win ur nezmir ad yeddem ad yeddu,
medden ttargun timiqwa.
Imγaren d imuḍan amek ara sen-tedṛu? Fad amcum taddart a tt-yexlu,
lemmer BAB IDURAR ur yeqwa.
Imdanen yessefk ad swen, kra n waman deg wasif llan.
Ugmen-d wid izemren i usawen d wezγal n yiḍ d izilan.
BAB IDURAR yelha-d d yemγaren, imeẓyanen d wid yuḍnen,
yesserwa-yasen akk aman.
Γas udem-is seg wid icemten, ul-is ḥnin walan-t medden,
arrac uγalen ttwalin-t d amelḥan.
Yiwen wass deg wussan unebdu, yeffeγ-d yiwen wergaz, iteddu
deg webrid γer tlemmast n taddart.
D netta i d-yeffγen d amezwaru, ur yenwi s tedyant-a ad teḍru,
ur yeẓri acu t-yurğan zdat.
Argaz iγil yettargu deg wayen yettwali, acku
ngum tefrari tafat.
Yuγal yeẓmeḍ aqerru, yessawal s usuγu,
ffγet-d ay at taddart.
Yiwen ur d-yegri yexxuc, din din wwḍen-t qeccuc meccuc,
γilen yeḍra lhemm ameqqran.
ur d asen-teffiγ am leεrac rran d leεruc, mi ssfeqden leɛcuc,
qqsen-ten-id izerman.
Ulayγer asemγer uxenfuc, fru-yaγ-tt-id a mummuc,
ini-yaγ-d d acu yeḍran!
Win i t-yessbezgen ad aγ-d-irucc, mačči d turart ulelluc,
yenna-yasen ẓẓulleγ wwiγ-awen-d aman.
At taddart s wallen ḍefren iḍudan-is anda ssneεten,
imiren tafat tufrar.
Walan aman la ttcercuren, am wasif i d-teffγen
seg ddaw wexxam n BAB IDURAR.
Ameẓẓallu-nni yenna-yasen : D nekk i d ssebba-nsen.
A yemma-s mmi-m yezmer!
Dγa MUSNI i d as-ssawalen, deg icuḍaḍ uqendur-is ssudnen,
si zik yerra iman-is yeẓwer.
Tudert i MUSNI! Tudert i MUSNI!
Uγalen akk i ttsuγun.
Yerγa wul n teqcict-nni, TAFAT, tugad a d-tini
kra at taddart ad rfun.
Teεreḍ tazwara teṭṭef imi, yečča-tt wul-is terfed tiγri,
tura d tidet a d-yestufun :
Arğut ay at taddart! Arğut! MUSNI annect-a yettargu-t.
Slan-as medden akk ssusmen.
A MUSNI fru-yaγ-d taluft! Ma γlin-d seg igenni γef tmurt,
acuγer mačči seddaw wexxam-ik i d-ffγen?
Tiγerγert tebda tettsummu-t, yeqqur din amzun yemmut,
udem-is d tezweγ i t-isebγen.
At taddar merra ssusmen, ldin i waḍu imawen-nsen,
yessufeγ-d awal DIDI :
A tiyessetmatin, ay atmaten, yessefk iḍarren-nneγ ad awḍen
axxam ideg d-ffγen waman-agi!
DIDI d argaz iḥercen, si zik i wawal yessen,
γur-s ulac anεam sidi.
Lγaci-nni merra nnan : d tidet, d awal yelhan,
kkren akk uγen awal-is.
Uzzlen s axxam-nni ad ẓren, ansi akka i d-ffγen waman,
MUSNI yessemneε iḍarren-is
Yessenser s axxam yekcem, tura azzel faqen-ak a lhemm!
Akka i d as-yenna wul-is.
Axxam n BAB IDURAR, seg-s i d-yeffeγ wasif-nni.
TAFAT deg ugerjum-is tessemγer, amzun tessawal s igenni:
BAB IDURAR! Wa BAB IDURAR! deg wawal ur d as-d-yerri.
At taddart ssawlen-as daγen, yegdel-iten ula d nutni.
Yiwen wergaz yenna-yasen: Deg wexxam wagi ur yelli.
Yiwet tmeṭṭut gar-asen : Ula si teẓgi a d-isel i teγri.
TAFAT tenna ayen tessen: Wagi ad yili yuḍen ihi.
Tdemmer tawwurt s ifassen, tufa-tt ur temdil, teldi.
Γer wexxam tekcem TAFAT, lγaci urğan ar tt-id-tefru.
BAB IDURAR dinna tufa-t, yeqqummec meskin yettru.
Iγaḍ-itt, yegzem tasa-s, dγa tettru ula d nettat.
Lγaci uγalen jban-d fell-as, walit tidet ay at taddart!
Imeṭṭawen-is ttcercuren, amzun ḥemlen-d iγeẓran.
Seg tzuliγt γer berra teffγen, uγalen d agelmim n waman.
Ldin akk imawen-nsen, wehmen deg wayen walan.
Qqimet-d a lγaci ad teslem, yid-i ata wayen yeḍran:
Yekker ad yeḥbes imeṭṭi, maca, ur yezmir ara.
Yuγal yenna i lγaci: "Ẓriγ d acu yeḍran tura.
Urgaγ asmi ay lliγ d ameẓyan, d wayen akk yid-i yeḍran,
ukiγ-d γef targit cfiγ.
Ihi ula d nekk sεiγ imawlan, ad awen-mleγ wi d iyi-ilan,
ata wayen akk d-mmektiγ":
Nekkini d mmi-s n TAKLIT, baba d AKLI N AT WADDA.
Γas ma tewεer teqbaylit, cfiγγur-i yiwet weltma.
Tesmekti-yi-tt-id targit, weltma isem-is TANINNA.
Imi ameddakel-is AGGUR, tḥemmel-it, yeggull-as baba γef leqraya.
Yesnejmaε-itt-id γer ger temγarin, atan γef wacu yeggull:
Iwala tessufeγ-d tidmarin, yessufeγ-itt-id si lakul.
" Rebḥen ufan-t" urγrin, ur yelli i d aγ-d-ğğan lemtul.
Lemmer kanur d asent-rnin i tullas lehlak n wul.
I tmuγli n ṭṭaq i tt-ssersen, melmi a d-iḍegger AGGUR wass.
Mi t-twala teẓra tessen, abrid n tala deg wul yuγwas.
Ugur n taluft assen, baba ur yeεdil d baba-s.
Mi tewweḍ ukkuẓ d mraw iseggasen, yebγa a tt-yefk i mmi-s n gma-s.
Yiwen wass lewhi imensi, yanna-yas baba " a yelli,
atan mmeslayeγ d gma”.
Fell-am nefra-tt ass-agi, mmi-s d yir aqcic ur yelli,
ur kem-yettxaṣṣ wacemma.
TANINNA tenna-yas " Nekkini"?, ulayγer tḍebbreḍ fell-i,
wagi ur t-ttaγeγ ara.
Awal ngum i t-id-tekfi, tečča ayen iγef ur tebni,
yejbed deg-s s ubeqqa.
Teṭṭerḍeq d imeṭṭawen, tuzzel γer texxamt-nniḍen,
awal ur d-yuli imi n yemma.
D nekkini i d-ineṭqen, kkreγ ad as-iniγ ayen,
yegzem-iyi awal yenna:
Kečč ṭṭef imi-k kan ssusem! Baba-k yeẓra ayen yelhan, yessen,
anwa i iḥekmen da tura?
„ Am win ara yeqqnen taγaṭ i wuccen“, tecfiḍ ay assen,
akka i s-nniγ i baba.
Nniγ-as " d lbaṭel a baba", yefka-yi tiyita,
ceḍḥen ifeṭṭiwjen zdat wallen-iw.
Kečč mačči d argaz a ccmata, akka i d iyi-yenna,
yenna-k yerna fkiγ awal-iw.
Tameṭṭuṭ a mmi ur tessin ara, ṣaḥḥa di yemma-k ṣaḥḥa,
ur tselleḍ ara i lehdur-iw.
Ssusem i d iyi-tenna yemma, qader a mmi baba-k tura!
dγa ffγeγ, yeqber wul-iw.
Yezzi-d waggur amzun tefra, amzun acemma ur yeḍra,
baba yessen amek yefren.
Sliγ mi akken s-yenna i yemma, ssmana i d-iteddun d tameγra,
awi-d tidak ara ifetlen.
Akken i s-tesla TANINNA, werriγ wudem-is merra,
amzun ffγen-t idammen.
Teğğa almi yeffeγ baba, γef wexxam n gma-s tenna:
„Iḍarren-agi ur t-keccmen“.
Baba-m yeẓra i d am-yelhan a yelli yerna nekkenti,
akka i yura di twenza-nneγ.
D acu nezmer a t-nexdem akkagi? Ula d nekkini
ur ssineγ baba-m asmi t-uγeγ.
Mi d as-tenna yemma ayagi, tenna-yas nekk mačči d kemmini,
nekk s wayen yenna Brecht, umneγ.
Nekk ul-iw ur yettergigi, win yettnaγen yezmer ad yeγli,
ma ur nnuγeγ, ḥseb xeṣreγ!
Yessefk a yelli ad tṣebreḍ, ulac d acu ara txedmeḍ,
annect-a yura di twenza-m.
Argaz-im a t-tennameḍ, yiwen wass a t-tḥemmleḍ,
ula d nekk nnumeγ baba-m.
Lebγi-nneγ merra a t-naweḍ, asmi ara tjewğeḍ,
d dderya ad teččareḍ axxam.
Ilaq a yelli ad t