Ccbaḥa d tmettant
Teεẓeg tekker tessawal sennig uẓekka n wefrux.
Rran-as-d imeṭṭawen awal, allaγ yessenger-it lmuxx.
Inehhit yeṣreε ur imal, tfuk tyerza n wakal,
akud ur yuni tilkin-is.
Yelsa aqerru d amellal, ur yettwali γer zdeffir ma iḍal,
yezεillim, yenkeẓ yeẓri-s.
****
Tesseḍḥa tafat tudrigt, imi d-tlul berrikt tmellalt.
Ṭṭḍen iγiγden n tjeğğigt seg yedmaren n tewlawalt.
Akud aderγal yettγawal, γef tmeslayt ẓẓay wuffal,
am wakken nnger deg-s yeggull.
Ngum ad ifat lḥal, " UR D IYI-TTAǦĞA" n Brel,
sserγeγ usu n tirga-s deg wul.
****
La nettwali udmawen-nneγ di lemri n lbir yezzren.
Yemγi-d zdat wallen-nneγ uẓekka n wefrux yeddren.
Tezlez terεed deg igenni, tizzegzewt n yiṭij n tguni
tedhen aqerru n wakud.
A tarkast yunagen, ay ass-nni, afrux amek ara s-nini,
amek ara s-igerrez wafud?
****
Neẓẓeg-ik-id ay ayefki aberkan, nettwaṣekkek amaẓẓag nufa-t.
Swan warrac d yebkan, nessarem ad ḥerzen tafat.
Lmus d-ilulen iṣedded, yegzem asirem ideg nteṭṭeḍ,
nemḍel-it sennig usigna.
A fad n tegnit ddem ad tesweḍ, a tasusmi ad iyi-tafeḍ
deg wul-iw ssekreγ lfetna!
****
Attan la tmecceḍ aqerruy-is am wakken meccḍen medden i ulaxert.
Tessen ad tehder, ad teldi imi-s, maca, tezmeḍ-itt taγert.
tesdukel tamuγli-s terwi-tt di tuggi n " ARU-TT, HDER-ITT",
tiṭ-iw s aseqqi-s tḍal.
Ax tidet ma triḍ wali-tt, tiflut-a tenna-k " sseww-itt,
akken ad tissineḍ amaḍal!".
****
La tettemεebbar akk d tmettant ccbaḥa n tudert-nneγ.
Ul-is iqerra ččan-t, rruḥ-is yugi a tt-yeffeγ.
Allen deg wulac ntant, deg wexjiḍ d acu ay ufant,
i tγuzi-s anda teffeγ?
Imezwura kra nnan-t, kra yella kra rnan-t,
wissen iγisi ma regleγ-t???
SΣID N AT MΣEMMER