Seg wansi i tekfa ddunit
Nefren a s-neg tazwara
Imi si tεebbuṭ n twaγit
I d-tettlal lehna…
I ijeğğigen i temger tefsut
I yetbiren i tṣegged lmut
I wid yettnadin tafat…
I imekrafen n tmurt
I kra n win iγef temdel tewwurt
I tidet i yeddren γas deffir tagut!
…
I wid i yečča Kayan
I wid i yesεeddan ussan
Di ṭṭlam i iḍulen
I widen i yesbelεen arẓagan
Ur mmuten, kecmen iẓekwan
Akken wiyaḍ ad ddren
I tafat d wid i tt-yebγan
I tlelli d wid i tt-inudan
I yakk IMAZIΓEN…
Akken ur ntettu, iseflan n tefsut n 80.
Akken ur ntettu tarwa n tefsut berriken.
Akken ur ntettu akk wid i iruḥen
D iseflan n temsalt
. . / . . / . . . .
Azul; a tawacult-iw tameεzuzt, ssarameγ a ken-id-yaf yizen-agi di tegnit yelhan i yifen tin ideg ttiliγ.
D tagrest a yemma εzizen, yezzi fell-i ṭṭlam si yal tama, anda ma ḍeggreγ tamuγli-w yettarra-tt-id lḥiḍ! Ulac acqiq ansi ara d-tekcem tafat, maca, skud tezdeγ deg wul-iw, ur cliεeγ ara di tallest n texxamt-agi taṣemmaṭ.
Yemma; fiḥel ul-im ad yettduqus fell-i yal iḍ, fiḥel ad tettεawazeḍ s uγilif d uḥebber.
Yemma taεzizt, ur ssendaf ara iẓri-m s imeṭṭi, ur d-yegri ara annect n wayen i yezrin!
Sin iseggasen i yezrin, amzun d yir targit, a ten-id-ḍefren sin-nniḍen, sikin a d-uγaleγ, a d-uγaleγ a yemma εzizen, γer irebbi-m ḥninen, γer yakk wid i yi-iḥemmlen; a d-uγaleγ γer taddart-iw, γer idurar-nni anda i yezdeγ yiman-iw. Jjmeγ-kem a yemma taḥnint yal ass mi ara d-lliγ allen-iw, ttmektayeγ-d ussan-nni mi d-ttakiγ taṣebḥit γef taγect-im ẓiden, mi yi-d-tesselfeḍ γef wudem-iw …cedhaγ a yemma taγuri-m, tamuγli-m, acḥal ttmamiγ ammer a d-uγalen wuḍan-nni ideg yi-tettrajuḍ melmi ara d-qirreγ s axxam, ula d tuzzma-m mi akken ur d-keccmeγ ara deg yiḍ, cfiγ γef lehdur-im ay yemma εzizen, cfiγ mi yi-tenniḍ: “ A mmi, anef-as akin i tsertit-agi ara yeglun yes-k γer wasif, mačči d kečč ara iqeεεden tamurt, ala lmertat ara k-id-isaḥen…” D tidet a yemma, mačči d nekk ara yesselhun tamurt-a i izedren di temda iluγen, mačči d nekk ara sen-d-yerren izerfan-nsen i imeγban, mačči d nekk ara yerren yal taγawsa s amkan-is,…d tidet a yemma, d lmertat i yi-d-isaḥen, d akraf i yi-yeggunin, maca, ḥṣu kan akken d nekk i ifernen aya, imi, smenyafeγ ad ddreγ ger kuẓ (4)leḥyuḍ s uqerruy irefden d asawen, wala, ad ddreγ ddaw iḍarren n wid-nni i yi-igan azaglu γef yiri! Ih, a yemma, smenyafeγ asekraf γef tudert n ddel…Rzan-iyi a yemma, maca, mmi-m ur ikennu teḥṣiḍ, bγan-iyi ad selxeγ aglim-iw, ad ffγeγ seg yiman-iw, ad nekreγ tanekkit-iw, ad uγaleγ d wayeḍ! D AWEZΓI, d awezγi, d awezγi…ass amenzu mi d-rziγ γer ddunit-a, ayen i walant wallen-iw d idurar εlayen, d axelxal n lfeṭṭa, acmux n waman, tacbaylit n zzit, tizemrin , ifitwan, akal-nni anda i mmaren idammen n jeddi, akk d tebḥirt-nni i yesseknan aεrur n baba!
Imeslayen imenza i wumi sliγ, d acewwiq-nni aḥnin s wacu i yi-d-tesrusuḍ iḍes mi ara iliγ deg irebbi-m, bγan-iyi a yemma ad beddleγ akk aya s wulac, s yilem, s tsusmi d tugdi! D AWEZΓI a yemma, d awezγi, imi ma yella ğğiγ akk aya, ihi, ğğiγ-kem ula d kemm a tin iyi-yessuṭḍen tanaṣlit! Mi d-nniγ “Ala”, gren-iyi-d γer da, γilen iseggasen-a ara zriγ deg usekraf a yi-settun imenzayen-nni n tjaddit, yecceḍ leḥsab-nsen a yemma, ur tettuγ ara tafenda n ijeğğigen di tefsut, neγ tesmeḍ n wegrist di ccetwa, neγ ulamma d azγal-nni n unebdu! Ur tettuγ ara a yemma d awezγi! Γur-m ad tγileḍ d tasertit i d tamentilt n wekraf-iw, imi werğin kcimeγ imeεmuεen i yecban wigi, teẓriḍ akken ur ddiγ d ukabar-a neγ wihin, imi akabar-iw nekkini d tanaṣlit, daya, ur cliεeγ ara deg wigi i iḥekmen, ur yelli daγen d tasertit i yi-yecqan a yemma, mmi-m i t-iceγben d laṣel, d tidet, d azref-nneγ di tilin, atan ihi d acu i yi-d-yessawḍen γer da!
Zdi lqedd-im, rfed aqerru-m s tnefxa ger medden a yemma taεzizt, ini-asen: “ Mmi d ilelli, d ilelli γas a s-zzin 100 leḥyuḍ, γas a t-keblen s 100 ssnasel, mmi d ilelli, d ilelli ur yettwakraf !” Ur yegri ara waṭas akken a d-uγaleγ a yemma taεzizt, a d-UΓALEΓ!
Ma d kemm a «Kenza», gma-m ur kem-yettu ara, jjmeγ-kem aṭas, akken i jjmeγ agama n taddart, ammer ufiγ a d-ssemγiγ afriwen, a d-cuqqeγ igenni, akken ad rwuγ udem-im, maca, lebγi n wul yurez-it wayen yuran deg wenyir, ayen yuran ad yezri, ulac seg-s tarewla!
Ur ttuγ ara udem-im yettfeğğiğen am tziri n waggur, yal mi ara kem-waliγ, tettuγ merra iγeblan, ttmektayeγ-d kan asirem-nni i izedγen tarwiḥt-im zeddigen, ẓwer, ẓwer, a tasekkurt i d-rebban idurar, ur ttagad tudert, ur kennu zdat ṭṭlam, imi d tafat i t-yugaren. Mi ara d-ihubb γef wul-im waḍu n lxiq, rfed allen-im γer tteṣwira-w di lḥiḍ, ad iyi-twaliḍ, ad tesleḍ i yiman-iw mi m-d-yettmeslay!
«Kenza», γur-m ad tedduḍ d waḍu n wurfan, a m-teεreq tikli, a kem-tγunzu tudert! Γur-m ad tedhuḍ d ccbaḥa n tfekka, ad tettuḍ tin n yiman, s tezdeg n terwiḥt-im d leḥdaqa n wallaγ-im i tzemreḍ ad tafeḍ adeg-im ger yetran, s tmussni kan i tzemreḍ a d-tekkseḍ izerfan-im ulamma seg yimi n uwaγezniw! Dhu d welqaḍ n tmussni, riγ a kem-id-afeγ d tamejjayt, mi ara d-UΓALEΓ! «Kenza», riγ a m-d-ssiwleγ “Tanaṣlit”, imi d kemm i d asirem n tjaddit, d kemm i d udem n teqbaylit, ẓwer a weltma, ẓwer!
«Maziγ», yessers imru-ines, γelbent-id-imeṭṭawen, neggin am tmiqwa n lehwa γef tebrat-nni i yura s waṭas n leḥzen d tujjma, yekker-d ar γur-s umeddakel-is «Yazid», yeqqim-d γer yidis-is, s taγect yebbḥebḥen yenna-yas:
- Tettruḍ a «Maziγ»?!
Maca, «Maziγ», ur s-d-yerri ara ameslay, iger tabrat-nni γer teγlaft, izemm-itt, iεedda a s-yaru tansa, yuγal yessers-itt, yezga yettmuqul deg wulac, am win izedren di targit; yeqqim akken taswiεt, yuγal yenṭeq γer «Yazid» yenna-yas:
- Ur tt-tceyyiεeγ ara!
- D acu-tt?!
- D tabrat i yemma.
- Ihi, ceyyeε-itt, ammer ahat, a s-tekkseḍ tujjma, ad tessneqseḍ fella-s lḥir, degmi d-nemlal d tikkelt-a i d tamenzut i k-ttwaliγ turiḍ-asen tabrat i twacult-ik!
Yeqḍeε-as-d ameslay «Maziγ» s wurfan:
- D acu ara sen-iniγ?! A sen-iniγ ur ttḥiret ara fell-i, aqli-n di lehna, d laman, ulac wi yi-yifen? D lekdeb, ẓran ayen ideg lliγ, ma yella a sen-rnuγ deg iγeblan…ulayγer.
«Yazid», yekkes-as tabrat-nni akk d yemru, yenna-yas:
- Aha, mel-iyi-d tansa, tikkelt-a a tt-nceyyeε, ulac tuγalin ar deffir!
«Maziγ», yessusem, yuγal yemla-yas-d tansa i «Yazid» i s-yennan akken azekka a s-tt-yawi i umassay γef imekrafen akken a tt-iceyyeε.
«Maziγ», yesteqsa «Yazid» s wewham:
- I kečč a «Yazid», ttwaliγ-k deg waṭas-aya tettaruḍ tibratin, maca, kra tettceyyiεeḍ-tent, tiyaḍ ala!
«Yazid», yerra nnehta rẓagen, yenna-yas:
- Tebγiḍ tidet?! Ammer ufiγ yili a tent-in-wwḍent s afus i riγ a tent-yeṭṭef, maca…
- D acu i k-yeṭṭfen, ur tessineḍ ara tansa?!
- Ssneγ-tt tansa am wakken i ssneγ tidikelt ufus-iw, meεna, ur zmireγ ara a tent-ceyyεeγ imi ur ilaq ara.
- Ihi, d tibratin n tayri?!
- Nekk semmaγ-asent tibratin uwezγi!
- Acuγer awezγi?
- Acku tagi i wumi tent-ttaruγ yekkes-itt lbext i wul-iw, tuγal megdulet fell-i tayri-s.
- I nettat, tḥemmel-ik? Teẓra akken tḥemmleḍ-tt?!
- Nedder lwaḥid tadyant n tayri ur necbi tiyaḍ, tezdi-yaγ yiwet tayri i ijehden ugar kra yellan, maca, akken tettwaliḍ, anwa wagi ara yefken yelli-s i win yellan deg usekraf, anta akka tagi ara irajun win i wumi yettwaḥkem ad yessezri 07 iseggasen ger (04) kuẓ leḥyuḍ?!
- Ma tḥemmel-ik a k-traju!
- Γas nettat ad teqbel akken a yi-traju, baba-s d awezγi ad iqbel aya, γef wakka i tt-yefka i umenzu i tt-id-ixeḍben, mbeεd mi tella d taxḍibt-iw nekk!
«Maziγ», yenna-yas-d s wurfan:
- Kečč ur d-tekcimeḍ ara amkan-a imi tukreḍ, neγ tenγiḍ, neγ tgiḍ ayen megdulen! Kečč aqli-k-id da imi d argaz n nnif, imi d argaz n laṣel d tissas, acuγer ara k-yekkes taxḍibt-ik, neγ ara yessetḥi yes-k akken ur k-yettnasab ara!? Timesbaniyin i nga, mačči i ubaγur-nneγ nekkni kan, neffeγ-d, nsuγ, nqubel aḥlalas s yedmaren yeεran akken kan ad nedder d ilelliyen, akken a d-nessukes ayen i d-yegran seg izerfan yettwarekḍen, γas ger waccaren n tteryel! Nekkni imi d-nusa γer da, d laṣel i γ-d-yezzuγren, mačči d laẓ neγ d leεra, mačči d imenγi neγ d tukerḍa… nekkni mačči d imekrafen a «Yazid» d ILELLIYEN, D ILELLIYEN…
«Yazid», i t-yettmuqulen s layas, yezder di tsusmi, ur yufi lehdur i ilaqen akken a s-d-yerr awal, γas ma yeẓra tamsalt i t-id-yessawḍen γer da d tin yerzan nnif d laṣel, maca, yeḥṣa akken mačči merra medden gzan aya!
«Maziγ», yezzer di ccfawat, bdan waktayen ttebdaden-d zdat wallen-is, am wakken ur yezri wakud, yemmekta-d amek i d-yeḥmel fell-asen wasif n lbaṭel i imegren tirwiḥin n ilelliyen, γas ma yella ass-nni d tafsut, tin akken ideg cebḥen wussan, tafenda i d-yettraḥen n lmut, mačči d tin n ijeğğigen, kra i icebḥen di tmuγli, tuli-t tebrek, ibeddel udem, deg wallen yezga imeṭṭi, idim yemmar di yal tiγmert, ass-nni n tefsut, imi akken d-yessawel yiman n Massnsen, iḍegger timedlin, isuγ-d si Sirta, tiγri-s tewweḍ Tizi, tewweḍ Bgayet, tewweḍ Tubiret, tewweḍ Leqṣur, kkren tarwa-s s yiwen usuγu, rran-as tiγri, nnan-as: “D ass n tlelli, wass-agi!”
…Deg wass-nni, yeḍra wayen yeḍran, ilmeẓyen n tefsut, γer irebbi n tlelli uzzlen, war tugdi, war aḥezzeb, ulac akukru, γas d aḥlalas i ten-id-yettmagaren, uzzlen, ẓẓlen ifassen-nsen γer ufus n tlelli i ten-id-yettmuqulen si deffir wagu, s iḍarren yeḥfan, s yedmaren yeεran, qublen aḥlalas, qublen ẓẓur n war tilas, … D tilelli i bγan, d lehna i nudan, d tamḥeqranit i nnuγen, xellṣen azal n tidet s yidim, s terwiḥin, s kra εzizen γef wulawen-nsen!
Mi d-yemmekta akk aya, s kra yellan deg-s d tazmert, yekker yeṭṭef deg igeḍmen n wuzzal i icebken tawwurt, isuγ: “A d-uγaleγ a yemma εzizen, a d-uγaleγ a Tafsut!”…
Tasusmi, tessaγ γef terwiḥin n yakk wid yellan deg usekraf-nni, taγect n «Maziγ» tecba rrεud n tegrest i yettcerrigen igenni, tewweḍ armi d imeẓẓuγen n tyemmatin, tid akken i yeggunin berra leṣwar usekraf, ger ifassen-nsent ttṣawer n warraw-nsent iγef ur d-iban isali… ur ẓrint ma yella ahat yiwen deg-sen d wa i d-isuγen akka, neγ ahat, yedda d yimanen-nni i yunagen γer umaḍal n war Tuγalin?!!
Tanaṣlit.
05-03-2008.