Γṛiγ mmektaγ-d...
Aseggas n 1994, lakul uγalent-as tewwura, tamurt n leqbayel meṛṛa tḥelles tekker fell-as ad tennaγ γef ayla-s, agemmaḍ-in lḥemla n idammen tebda-d amiri, myal ass ad ixnunes acḥal d aterras.
tasertit teqn-ed taεeṣabt n idammen tenna-k: w'ara yaγen, ccic, iqqeṛb-d !
myal taṣebḥit ad d-yejbu gma s weγmis, medden leqqfen isallen ṣbeḥ zik, ttnadin ma yella kra n tifrat.
Terwi tebberwi, anda-t uqqaru-s !!
ad arğuγ gma alma yeffukk taγuri, ar deqqal ad mγeγ γef weγmis, alih ad t-anniγ ! yella yiwen uneγmas, "yettara-d taṛwiḥt", yes-s i neṭṭef asirem, yeqqaṛ-d tiqquṛanin ur yettagad ara, yewwet yeffus zelmeḍ, d amnay, iman-is iqubel lmuḥal, d at iččumar neγ d at udabu myal yiwen yawi tiremt-is, "yečč-itt d iγil".
Qqaṛen-as Meqbel, Saεid Meqbel.
cfaya n iseggasen-aya tura, am ass-a cfiγ nniγ-as "argaz-a tella tegwdi fell-as", yenna-k gma "ad iḥudd ṛebbi"... 4 wagguren ar deqqal snat n tḥebbuyin glant s lεemṛ-is, itri wayeḍ nniḍen yensa !
"Ma mmuteγ zṛiγ w''ara yinγen, mačči d at iččumar, zṛiγ tiyita ay id tekk seg udabu, am d-inniγ acuγer (...) acku urğin lliγ d aqeddac nsen" (asebter wis 74).
akka i yemmeslay Saεid Meqbel i Monik Borgman deg useggas n 1993, yenna-d akk ayen i ticeγben, iḥekka-d amek yebda tira deg weγmis "Alger républicain" aseggas n 62, anda yeqdec d KatebYasin akk d Isyaxxem, yemmeslay-d amek yettwaṭṭef γer lḥebs deg useggas n 67 d lbaṭel din iεeddan fell-as, yewwi-d aṭas d ameslay γef tmenγiwin n imusnawen (imeddukkal-is), yefka-d ula d kra n yismawen seg wid yellan deg udabu yenna-k d nutni " i yejebbden lexyuḍ"...mačči d yiwet, lḥaṣun yenna-d tiqquṛanin γas akka yemmut !!
Adlis "Saïd Mekbel, une mort à la lettre" i t-ura Monika Borgman yefγ-ed di yennayer n 2008 γer tezṛigin Téraèdre/Dar Al-Jadeed, Paris/Beyrouth, yesεa 141 isebtar.
Adlis-a yiwen seg iγmisen n Lzzayer mačči yemmeslay-d fell-as, wissen d tigewdi wissen d ayen nniḍen, ur nzṛi ara !?
Nedderγel acḥal d aseggas tura, uraren yess-neγ ifuḥanen, lewhi nneγ yemunddel, neṭṭef aẓar nγil-it d aḍar, nuγal d lmal wi d-yusan yenheṛ-aγ, akka s teγzi-k a zzman.
Nzeṛ ur nettwali ara
Nesmuzgut ur nsell ara
Neqqaṛ ur nfehhem ara
Iγessan-ik di talwit a gma Meqbel
Ğamal Saadi