Akken ira yili d urqim inebgi-agi i kem-izedγen.
Γas yekcem wenẓad aseqqim, ḥader iḍudan a d-am-rγen!
Tabrikt ccekti-yas neγ qqim, ur d-tessemγay imeẓẓuγen.
Deg uẓar n teqreḥ ttleqqim neγ nadi abrid yessufuγen!
-------------------------
D wagi i d lkaγeḍ ad am-aruγ, lemmer d amejjay n tayri ay lliγ.
Aql-i ferneγ yid-m amennuγ, d tiwwura i riγ ad am-lliγ.
Yesmekti-yi-d usuγu-s ttruγ, tasusmi-m fiḥel a d am-iniγ.
Tzemreḍ ad tettuḍ imi ay ttuγ neγ ahat imi nekk nfiγ?
-------------------------
Ula d kemm ma yessefk nnejli neγ ffeγ ula seg yiman-im!
Fek-as i wul-im tilelli, anda i d as-yehwa, anef-as ad yeqqim!
Tawwurt-is eğğ-itt telli, temdel yiwen ur t-yekcim!
Sel-as i yir targit, wali, la d am-teqqar " rfed lqecc-im"!
---------------------------
Nekk tura rẓeγ-am-d targa, aẓar usirem γas ssew-it!
Aha ffeγ-d si yir tirga, ssendi ifassen-im i tefsut!
Ssufeγ-d temẓi-m si tesga, taguni γḍel-as-d tusut!
A weltma abrid ihegga, ḥemmel, dder akud ur ifut.
Essaid Ait Maamar