‘’ Ma nniγ-d ula y d-iniγ, ma ur d-nniγ ara a d-iniγ’’
Tikkelt-agi ad nejbed lwelha n imeγriyen n Tafukt γur tudert n weqbayli di temnaṭ n Wehran, imi tudert-is dagi d ayen iṣaεben aṭas…ur qbilent ara wallen-is, wala imeẓẓuγen-is, wala allaγ-is ayen yakk i yettwali, d wayen akk i isell. Tudert-ines deg temdint-agi tettwaḥettem fell-as d ayen kan. Ttrebga s wayes d-yetturebba i yeğğan liḥala-s d tin i iweεren aṭas ger…wiyad-agi…tazmert-is ur tezmir ad tεebbi ihwah…d wayen yugaren aya!
Iḥulfan-is yakk yettarra-ten γer daxel n wul-is i yebγan ad ifelleq. Yeẓra weḥrur-agi lemmer ad yeldi imi-s ad yeččar d izan, ihi yessusem, yetthuzzu kan deg uqerru-s, yettara-d deg nnhati, ur yufi abrid i temsal s wayes i yettwet, anda yerra d aεewwiq: deg lxedma, deg uγerbaz, di ttawil usiweḍ neγ deg berra s umata. D laεwej si mkul tama; yir ccγel, yir ameslay, yir ṣṣwab. Tudert-agi tucmit, tuqbiḥt I d-yettmagar weqbayli di temnaṭ n Wehran teqqel ẓẓayet mačči d kra γef tayet-is, tettruẓu afud-is cwiṭ cwiṭ. Dayen i t-yeğğan yettagad γef twacult-is d warraw-is, ladγa tiqcicin. Tessaweḍ-it teswiεt-agi ad iẓeyyer mliḥ fell-asent. Yettwaxneq, εerqqent-as meskin!
Tarwiḥt-is tettwaγ, tεetteb, tεebba ayen umu ur tezmir. Anda imuqel, d aγilif, ula d lqahwa, ur yettaf lbenna i wayen ara isew.
D ayen i t-yessawaḍen ad yeṭṭef abrid yettawin γer tiddukla n imaziγen Numidya, anida ara yaf widak yettaken azal ameqqran i wawal n tnaṣlit icebḥen, zeddigen yettaččaren tiṭ d wul d lferḥ d usirem: ‘’ ddaw webrid, nnig webrid, ad nuγal alamma d abrid’’.
Nadya
Yettwaks-ed seg tesγunt Tafukt , uṭṭun wis 3 . Tuber 2003