A tawaγit-iw, a lqecc-iw d wi tbubbeḍ ay ul ageswwwaḥ!!!
Macahu γef wass-nni amcum, yettaken anzi s ussan-nniḍen kan:
Tekker nna Taferruǧt s asewwi n imensi, aεeqqa n wewren ur izad, ur yenγis. Amzun tettektil-iten ngum a d-kecmen taseksut.
Teftel, terḍem, tesseww, yewweḍ-d lawan n imensi, yekcem-d dda Σmer ( argaz-is ) s axxam.
Yeqqim γef ukursi, yeẓẓel iḍarren-is akken yessefk, yesnejbad akk iman-is akka d wakka, yuγal yenṭeq γef mmi-s, yenna-yas: Yya-d a Mexluf a mmi, qabel-iy-id akka s yahin s učči, meqqar ad sɛuɣ la biti!
Mexluf yekker iqubel baba-s γer ṭṭabla, nna Taferruǧt tessers-asen imensi zdat-sen.Ččan, swan, rwan, uγalen ttgurruεen si bibṛas, dγa ufan-d γef wacu d-jebden awal:
Dda Σmer: Asmi d-newwi tislit si Xnecla i Bextis-nneγ, fkan-aγ-d at Meṛwan kra n imerṣumen n weksum a Mexluf a mmi fi εin cciṭan, wellah ar ugaren amehraz-inna deg ufus n yemma-k. Rnan-aγ-d yiwen lgazuz d aberkan, neswa almi neṭṭerḍeq, nuγal nettgurruε akka am tura. Twalaḍ a mmi li bbun sivinir, jjami u bli jjami teffɣen aqerru n yiwen "ya ma sseεd-k ya faεel lxir" ad yerḥem Rebbi iγsan n at lxir di lğennet!
Mexluf: Am arezg-nwen a ba, terwam-d MANJ TU s iqeffafen!
Lgazuz-nni aberkan ssawalen-as medden Coca Cola.
Dda Σmer: S bibṛas i t-xeddmen?
Mexluf: Wellah ma ẓriγ a ba, maεna ur cukkeγ ara, d lgazuz d-yennulfan di Marikan, si lazi akin, wissen ma yella dinna bibṛas?
Nna Taferruǧt tekker tejmeε ijeqḍuren ideg ččan yergazen, tesfeḍ-d ṭṭabla, tesdukel seksu d-yugaren deg iḍebsiyen-nsen γer yiwet tqedduḥt, terna-yas kra n useqqi, teqqim γer tγerγert ( lqaɛa), acku nettat d tameṭṭut i tella, ur tessin ara i wučči a la Xnecla. Akken tessaweḍ snat neγ kraḍ n tγenjawin n seksu s imi-s, terwa si tmendit imi ur d-yenni ara dda Σmer ass-nni izad kra neγ yenγes. Tessers taγenjawt-is ( tijγelt-is ), tekker tebda asired n leḥwal.
Dda Σmer iremmeq-itt si teɣmert, iwala tessegra-d kra n iεeqqayen n seksu di tqedduḥt-is, iγil εni tefka axxam-is i uxessar.
Yečča wergaz timess, yesmermeɣ fell-as s leεyaḍ, yenna-yas:
Ssers-iten din ijeqḍuren-nni, ssers-iten din a ddin n yemma-m!
"Yessusef-as γer tqedduḥt, ttfuh, ttfuh!!!" snat tikkal, yenna-yas daγen: Mebla ddin n baba-m, mebla ddin n baba-m, a lukan a d-teğğeḍ yiwen uεeqqa yugar-d, ar d-iferreğ deg-m win ixaqen. Ayen a lmettwet, ṣṣreγ lɛar-im almi d ass-a akken ad tessnegreḍ axxam-iw yerna yal ass qqareγ-am lḥal ilmend n leḥwal, kemm tugiḍ ad tesleḍ. D ayen iɣef d am-ttεeggineγ iɣer tettuɣaleḍ. Yefka-yas sin iqeddimen γer tlemmast n uzagur, yuγal deg-s nnefs tmeɣdurt, teẓẓel deg tlemmast n tγerγert, teṣreɛ. Dda Σmer bu tfenṭazit yezzi, yenneḍ sennig uqerruy-is, yebren cclaγem-is, yenser axlul, yenneḥneḥ, yuγal yekker ad yekcem γer tɣurfet-is, yessegra-yas-d imeslayen-agi: A yelli-s n yiẓẓan, lammer a d-yini cciṭan igenni tεawdeḍ i ugejdur yecban wagi, a kem-refdeɣ d tamuddurt, a kem-id-sserseɣ d lmeyyet. Ihi tura nekk nniγ, kemm tesliḍ, ata wansi kkiγ!
Yekcem γer texxamt-is n tguni, yefser iman-is γef wusu, iger-d nnehta, yessaweḍ yiwen uɛemmur n ccemma, annect tettaddam telwaḥt γer ddaw n icenfer-is ufella yellan di tama taẓelmaṭ, yettban-d amzun temγi-d teẓrut ddaw tiṭ-is, yuγal-d acemma γer leεqel-is, imiren yesteqsa iman-is γef wacuɣer d wacu d-yella ccwal-nni deg wexxam.
Yessuli leḥsab-is, yessers-it, yufa werğin i d as-yenna i nna taferruǧt kra, nettat ur tuγ ara awal-is.
A ziγ ssebba n ccwal yusa-d si tγimit yeqqim d kra imussnawen am netta di tejmaεt, d widak yessnen taqbaylit s wacciwen-is,
d at tafenṭazit ula d nutni.
d timess-nni d-yeddem wul-is seg tejmeεt, i isuḍ waḍu tuγal tendeh akken yessefk.
Ssekren timess deg wul-is mi llan ttmeslayen γef Lɛerbi.
Lεerbi-agi d yiwen yellan ur ixeddem ara neγ leɛmer yexdim di ddunit-is, kamim yessaweḍ yebna agarağ d kra n tγurfatin nnig-s, qublent iṭij yerna yessuli yiwen ssur annect-ilat, yeḥğeb yakk lḥara-s.
Yenna-yasen dda Σmer i imeddukal-is: A tawaγit n leεmer-iw, εeddan tura ahat kra n sin iseggasen, ih sin iseggasen seg wasmi d-yezla Muḥend-nneγ ikerri-nni i wumi terreẓ ticcewt, nekk qqareγ i wul-iw:" Tura ilaq ula d nekk a d-ẓerrbeɣ afrag-iw uma sεiγ ẓẓher tegra-d kra n ssiman, a d-εiwdeγ yes-s lebni i uẓekka n jeddi-s n baba", lameεna si temẓi-w, tečča-yi lxedma ay atmaten, ur lḥiqeγ ara ula d yiwet. D acu d umezwi-agi n Rebbi?
Aberkan n at Yir Signa" ihuzz aqerruy-is, idewwer agennur-is" yenna-yas: A Σmer, a Σmer, ur yelli i k-yewwwwin!!!! Wa Lεerbiii γur-s tameṭṭut llah ibarek, tugar εecra yergazen.
Win yesεan ẓẓher-is meqqar, yeγli-d di yelli-s n laṣel, ḥala alluy ar ad yali wexxam-is.
Muεtaṣem n at Wenbac: Deg wannect-a aql-i yid-k, fkiγ-ak lḥeqq a sidi, wigi d tidet d lehdur, tbarek llahu fi-k. D tameṭṭut i d llsas n wexxam, ma yerẓeq-ik-id uxellaq " ṣebḥan-u" s la bbun kaliti, a k-tessali ddunit ula deg yixef n tulmut.
Dda Σmer yemdekwal-d, yuγal-d s iman-is.
Seg wakken d-yesεedda taluft-nni tikkelt tis-snat am usaru zdat wallen-is, yufa d aεemmer i t-id-ɛemmren yemcumen-nni n imeddukal-is akken ttεemmiren yemdanen tamegḥelt s weḥlalas, yewweḍ-d s axxam, yeṭṭerḍeq γef nna Taferruğt.
Yendem sakin imi tt-yewwet.
Yekker-d γef yiman-is, iruḥ γur-s, yenna-yas s tezlemt:
Wellah ar lukan ur d-tessaseḍ ara tiγrit, ur kem-musan ifassen-iw yerna ula d Rebbi" εezza wa ğella" yenna deg wawal-is" ilaq win ixedmen kra a t-ixelleṣ". Aha tura dayen, jjmeε akka ijufar-im, berka-kem aḥnunef di tγerγert! Nekk nziγ deg izilan, cerweγ tidi d tamerγant, kemm tebγiḍ a γ-texluḍ deg yiwen wass.
Nna Taferruğt meskint yeqber wul-is, dγa tserreḥ d imeṭṭi, acku ur tezmir ara a d-tini ayen tettxemmim.
Akken iwala wargaz tiliwa-nni n imeṭṭi yuzzlen zdat wallen n tmeṭṭut-is, yenna-yas: Atan teḥrem temdelt n jeddi, ar tura a d-tiniḍ γef wacu tettruḍ neγ ma terniḍ ddqiqa deg wexxam-iw!
Seg wakken tt-terra tmara, terra-yas-d s imeṭṭi d wesxenfer, tenna-yas: Lammer i d iyi-tserrḥeḍ ula d nekk ad ffɣeɣ, ad xedmeγ, ur d iyi-terriḍ ara d taklit deg wexxam, ur ugiγ ara.
Werεad tessuli ameslay-is, wwḍen-tt ifassen n dda Σmer,yejbed deg-s s ubeqqa, yenna-yas: Cccccccccccccct, ccccccccccccccct, lammer a d-ternuḍ yiwen wawal, tura ara yafeg leεmer-im! waqila kemm ay aqadum uxessar, mačči d tukksa i ttekkseḍ, d timerna i d-trennuḍ.
Argaz yeγḍel-d igenni γef tmurt, yekkat deg ifassen-is, ineṭṭeg, yettεeggiḍ, yeqqar-as: A lxir-iw a Rebbi a lxir-iiiiiiiiiiiiiw, γliγ-d di yelli-s n leḥram, di yir ssekka.
Awi-yi-d ihi tura irgazen s axxam, mebla ma teffɣeḍ γur-sen γer berra! Nnεel ddin ufagur n baba-m a yir zerriεa.
A ziγ sεan lḥeqq imeddukal-iw mi d-nnan Lεerbi yerbeḥ, yufa-t.
A ziγ d tidet d tameṭṭut i d llsas n wexxam, nekk yesxeḍ-iy-id Rebbi yes-m ay agudu n leγbar!
A ziγ ulac n ddexxan mebla timess, lγaci ur d-qqaren ara kra ḥala ma yella, abbuh ay at leεraḍ, abbuh!!!
Yeqqel yettmeslay kan d yiman-is am umeslub akka s lexmata, yettales imeslayen-agi: Tameṭṭut n Lεerbi d tabergazt d wawal ih, tugar εecra yergazen yerna d tidet, d tidet, d tidet.....
Amzun nna Taferruğt ur tugar ara meyya yergazen am netta d widak-nni yella yeqqim di tejmeεt. Amzun ur tebγi ara ad terfed axxam-is s yiγil-is lammer γur-s izerfan am netta.
Dda Σmer tewweḍ-as tfidi s iγes, allaγ-is yerwi, maca yessefk-as a d-yaf ttawil amek a tt-ixeṭṭi daγen.
Yenna-yas wul-is:" Mexluf a t-yeḥrez Rebbi d argaz i yella, ur zmireγ ara ad bruɣ i yemma-s. Awal-agi n briγ-am 3 x 3 γas a t-ttuγ, yif-it ma ur d-yensir ara seg yimi-iw. Ala, ala d lεib fell-i, ur tekkseγ ara sser γef mmi".
Agejdur-nni yersen deg uqerruy-is yakan, γer γur-s d iseγ ameqqran i yerna i yiman-is, d irgazen am netta i wumi qqaren yeqbayliyen: " Wagi d aqbayli d wawal, yerra nnefs di tmeṭṭut-is, iγumm ssem-is".
Amecwar amecṭuḥ kan, yufa-d ttawil, yenna-yas: Atan mebla ddin n yemma-m ar deg udaynin ara tenseḍ ass-a!
Imiren kan, yeddem yeqqen-itt ger wezger d weγyul.
Mexluf ula d netta yessen tafenṭazit, ur yezmir ara ad yerẓ awal n baba-s, yeṣber almi d talemmast n yiḍ, yekker γef yiman-is, yeffeγ seg wexxam, yessawel-as i Ssi Menṣur.
Ssi Menṣur d yiwen wemrabeḍ n taddart-nsen, yettqadar-it dda Σmer nnig ccix Σli Centir.
Yessekna-d Mexluf aqerru n wemrabeḍ, yessuden-it, yessuter deg-s s timmuγbent akken ad as-yeggall i baba-s, a d-yebru i yemma-s seg udaynin.
Ssi Menṣur yessen taqbaylit s wacciwen-is, dindin yessufeγ-as aγbel seg wul, yenna-yas: Γas ruḥ tura kkes anezgum, ḥala tifrat ara tefru taluft-agi, anef-as kan tura d ccγel-iw!
Mexluf ur yuγal ara s axxam, yeṭṭef abrid γef uḍar γer Tizi-Wezzu. Ira
( yebγa ) a d-yawi iḍ s tikli, a d-yali kan wass ad yaweḍ Tizi, ad yeṭṭef lkar γer Ledzayer tamaneγt, a d-yekkes ddemmar γef yiman-is deg usekwar Lbuṛ Saεid.
Ssi Menṣur yeṭṭef deg wawal-is, imiren kan yeqsed dda Σmer s axxam, yessawel-as: Wa Σmer! Waaaaaa Σmer!
Yesla-yas-d, yeffeγ-d γur-s, yenna-yas s lemḥirat: Yak d lxir? D acu yedṛan akka? Yak ulac d acu i ken-yuɣen? D yejneε, yefneε....atg.
Ssi Menṣur: D lxir a Σmer, d lxir, ur ttqelliq ara yakk iman-ik, ulac akk d acu yedṛan yid-neγ. Wellah ar d yiwet taluft tamecṭuḥt, ur nesεi ara yakk ula d lmeεna, i d iyi-d-yewwin.
Yesγam-it γer tγerγert, yeṭṭef-as afus-is, iḥetteb-as deg iḍudan-is, yessawal-as-d tamacahut n lemḥibba yellan gar-asen, n wayen yezdin lejdud-nsen, iẓuran yellan gar-asen d wahin d tahin " Yenna waḍu, yenna wagu"....
Dda Σmer yettqadar ssi Menṣur, maca yeẓra ulac n iẓuran yellan gar-asen yerna di taddart-nsen ulac akk amrabeḍ yerran taqbaylit d tameṭṭut-is, gar-asen kan i ssalayen leεcucc-nsen.
Argaz ur d-yufi ara yakk wallaγ-is acuγer d-yusa γur-s lawan-nni, yenna-yas: A k-yehdu Rebbi a ssi Menṣur, wwet azrem s aqerru, fru-yi-d ccedda, ini-yi-d d acu tebγiḍ kečč d-yusan γur-i di tlemmast n yiḍ!
Ssi Menṣur: A Σmer a gma, di leεnaya n lawliyya d ṣṣaliḥin d wayen i d iyi-d-yessawḍen γer dagi γur-k, ma tettruẓuḍ leεnaya-w! Efk-iyi udem, atan ad iḥareb fell-ak jeddi Hlal s tecḍaṭ-is! Qqen allen-ik ma ilaq a sidi, bru-d i wat wexxam-ik seg udaynin, semmeḥ-asen tikkelt-agi!
Isem n nna Taferruğt ur d-yuli ara deg yimi-s, yessen dda Σmer akken ilaq, ulac ɣur-s aεekki d weskeεrer di tigi.
Dda Σmer: Ruḥ atan ihi attan tεedda i wudem-ik, tura a s-kkseγ tuqqna.
Ssi Menṣur: A k-ibarek Rebbi a Σmer, awer yettwakkes sser γef tamart-ik!
Amrabeḍ iḥulfa s yiman-is amzun yewwi-d ayefki n tsedda di tculliṭ n mmi-s, yebren s axxam.
Dda Σmer yebra-d i ifassen n tmeγdurt si tagust, yenna-yas:
Γur-m anida tkeccmeḍ deg yiḍ-agi taγurfet-iw, balak a kem-in-yerr wemnar γer daxel s rriḥa-nni n leγbar!
Amzun d nettat i ifernen ad tettwaqqen ger wezger d weγyul.
Azekka-nni d lexlaṣ n ixeddamen la kumi (akka i yeqqar dda Σmer i tγiwant). Yekker-d tafejrit, yewweḍ d amezwaru s akunṭabl, yettuci-d lkanza-s, yerra-d azal.
Yewweḍ-d s axxam, yeffer taxriṭ-is di tbalizt, yeffeγ γer tejmeεt.
Yufa yusa-d yiwen umeddakel-is n zik-nni, yewwi-d 404 baci, yezznuz iyuẓaḍ.
Argaz-nni n taddart Ufella, d imdanen yettqadaren tawacult n dda Σmer, acku γur-sen i d-gujan di lgirra-nni urumi.
Dda Σmer iban-as-d wergaz-nni am wakken yerbeḥ neγ yerriyisi akken yeqqar netta. Yebded kan γer tama-s, yenṭeḍ deg-s am ddkir, d tinna i d tirrugza.
Mi d-yewweḍ lawan n imekli, dda Σmer ur yelli ara d win yennan i wul-is" a d-aγeγ ayaẓiḍ i temγart-nni, ad aγ-yiẓid useqqi, ahat ad iyi-tsemmeḥ ayen i sserseɣ deg-s iḍelli, ala".
Akken iwala kan tεedda ṭnac, yenṭeq s ameddakel-is, yenna-yas: Wa Lhadi, yya-d kan tura ad tedduḍ s axxam, ayen yellan a t-nečč!
Lhadi bu tyuẓaḍ yesseḍḥa acemma, yerra-yas: Lxir-ik d ameqqran a Σmer, wellah ar am wakken ččiγ, mačči ass-agi, ar tikkelt-nniḍen mi ara d-uγaleγ yerna ur tebnim ara yakk fell-i a sidi.
Dda Σmer: " Ihuzz aqerruy-is, yeḍleq i ubuḥcic-is akken a d-slen akk medden di tejmeεt" I wumi tettεawadeḍ i umeslay? D ayen ara ččen sin, ara ččen tlata, tebra n 3 x 3 ar tedduḍ!
Lhadi bu tyuẓaḍ tessa-yas s wedfel, yenna-yas: Imi tebγiḍ akka a sidi, wellah ma rẓiγ limin-ik.
Yekker yedda yid-s, akken wwḍen γer tlemmast n webrid, yemmekti-d dda Σmer d telmeẓyin-nni n lğiran-is yettγaman lawan-nni γer nna Taferruğt yerna Lhadi-nni ur iεedda semmusan ( 50 ) iseggasen di leεmer-is.
D acu yexdem wergaz amcum?
Yewweḍ kan γer zdat tewwurt n iseqqif, iserreḥ d tusut, amzun d tusut εεiq i t-yeṭṭfen " Ḥḥḥḥḥḥḥḥa, ḥḥḥḥḥḥa, ḥḥḥḥḥḥḥa", ula d nna Taferruğt terwel teffer, tewwi-tt zzedwa n tusut.
Dda Σmer ifaq kan teṣṣer tegnit, yewwi-d daγen s lexbar ula d tamγart-is tessedreg iman-is, yessawel-as sakin s uberreḥ:
Wa Mexluf, waaaaa Mexllllllllluf, wa Lmexlulef!
Tuγal nna Taferruğt teεqel yid-s i d-yelha, teffeγ-d γur-sen, tanna-yas i inebgi lεeslama.
Dda Σmer yenna-yas: Ula d at laxert ahat slan-d i usiwel-iw, εni terniḍ-aγ-d teεẓeg tura? Anida akka tessentaḍ taqerrut-im a tinnat?
Nna Taferruğt: Ccaw ɣileɣ, d tidet d Mexluf i wumi tessawaleḍ.
Dda Σmer: Aha tura berka tafawit-nni ur nesεi ara lmeεna d sser, awi-yaγ-d d acu ara nečč, aql-aγ nemmut si laẓ!
Tewwi-yasen-d tmeṭṭut ayen yellan: " D ayen ara yečč dda Σmer iman-is, d amur-nni kan i ččan di sin yid-sen, acku nettat ur d-tesseww ara i yiman-is ass-nni".
Yerra kan dda Σmer inebgi-s γer tkamyunt-is, yuγal s uγiwel s axxam, yesker daγen tawsa war iḍebbalen γef nna Taferruğt.
Yettεeggiḍ fell-as, yeqqar-as: kemm akken d am-yexdem Rebbi, ad yeḥṣel, tekkseḍ fell-aneγ lḥerma d lεezza zdat lumma.
Nna Taferruğt: Iḍelli kan i tesserseḍ deg-i ayen ur yexdim yiwen deg wayeḍ, ass-agi d awal-ik kan i uɣeɣ.
Dda Σmer: Ur d am-nniγ ara mmet i llllllaẓ, Yak lammer tessewweḍ i yiman-im yelha, tili inebgi ad yečč amur-im, nekk ad ččeγ ayla-w, ad neṣṣer tagnit.
Nna Taferruğt: A lqecc-iw d lḥif-iw, ma d netta ara yeččen amur-iw, ihi zemreγ ad mmteγ i laẓ-agi teqqareḍ, ur d am-nniγ ara mmet-as.
Dda Σmer: ad am-tt-id-yefk Rebbi deg uqerru, ad am-tt-id-yefk Rebbi deg umelγiγ, a xir ad temmteḍ i laẓ, wala ma yettwakkes fell-aneγ sser!!!
Ttεebga imalen
Wid ssneɣ anda zedɣeɣ, deg-i steqsayen yal ass:
Ansi d-kkiɣ? Anda luleɣ? Acu ibedden? Acu ihudden f llsas?
Gar-asen ur zmireɣ ad zuxxeɣ, segmi nɛedda tilas.
Ccbaḥa i ɣ-itgen iseɣ, ntekkes leqder fell-as.
Ay udem n teqcict-nni ibubben ccbaḥa n wedrar.
A yemma yeqqel igenni, deg-s la irekkeḍ uḍar.
Deg wasmi d-εeddan wid-nni, tɣumm tafat n lefnar.
Seg uqerru-k tilkin ani, akken a gma udem-ik ad yeḍher!
Iruḥ yeṭṭeṣ anda ur ilaq, yennudem ur d-teɣli tmeddit.
Tewwi-t tnafa ur ifaq, yeḥmel-d wasif yewwi-t.
Muqlet-t anda yelḥeq, amḍiq-is deg ddunit!
I yiman-is yefka lḥeqq, d netta i d argaz a taqbaylit.
Ssawḍeɣ-d ufiɣ tettawiḍ deg yemdanen ansi d-εeddaɣ.
Ay asif qrib tegliḍ yes-i lemmer ur rwileɣ.
Ad εerḍeɣ widak tewwiḍ, ma zemreɣ a ten-εiwneɣ.
Ad ssneṭqeɣ yal d lxiḍ, ma yeqqers yenziz a t-cuddeɣ.
Nettwali tezdeg d ammus, ammus d tezdeg i t-nettɣill.
Ayen akk i qedceɣ drus, ɣef tid yerkeḍ yal lğil.
Ay atma gret-d afus, ttεebga ad as-nerr lmil!
A bu cclaɣem a bu ubernus, ur s-berru kra ma ur teqbil!
A win qerḥeɣ mi yi-d-tesliḍ, d iman-ik kan i tεeqleḍ.
Tindaw seg wallen ur nesfiḍ, tura ilaq a tent-tferḍeḍ!
Γur wid i k-yifen ad twaliḍ, mačči ɣur widak tifeḍ.
Sennig wayen akken tebɣiḍ, ur tebɣi tin d wi tεaceḍ.
Essaid Ait Maamar
G.M.: Regmeγ-k a gma ur ttseḍḥiγ, ayen akken akk i d ak-nniɣ,
iḥuz-ik, ur d iyi-yezgil.
Ma γelṭeγ deg wayen ẓriγ, aql-i d lεebd ay lliɣ,
ahat zeggdeɣ-as i lkil.
Teẓriḍ seg-k d acu rǧiɣ, Ur k-qaleγ, ur d iyi-ttqil!
Bγiγ kan a k-steqsiɣ: Amek i tga tidet? Mel-iyi!!! ( L.A.M.)
Tamawt-nniḍen:
Aḍris-agi lemmer yeqqim akken kan turiγ nekk, ad yeḥlu Qasi!
Ma yella deg-s kra unamek tura, d dda Ǧamal Benεuf i s-tyefkan, ma ulac d nekk. Tanemmirt a dda Ǧamal, ama yelha, ama diri-t!!!