 | | |  |
 |  |  | |
|
|
|
I umedyaz Sεid At Mεemmer neγ “Essaid Ait Maamar” - D tamuγli n unaẓur - … Tettak-d tzizwit tamment, maca, tettak-d daγen ssem, ula d asefru akken, γas ma medden akk ḥemmlen-t, maca, yessekfal-d deg-sen iẓuran n lhemm. Mi ara yessefray umedyaz, wiyaḍ i s-yettaken tameẓẓuγt γas ma gzan ayen d-yeqqar, γas ma yewweḍ-asen wayen i yexs a sen-t-yessiweḍ, maca d awezγi ad ḥulfun s wayen yeffren daxel n wul-is imi d netta kan i iεefsen γef tergin, tirγi-s yettarra-tt d asefru. Sskefleγ-d deg isefra-k ; iman agrawliw, winna akken i d-igellun s imeslayen-nni i iteẓẓun rrehba d tugdi deg wul aberrani, i izerrεen ttnefxa deg wul n imawlan, i ireffden aqerru n yal anaṣli nnig igenwan. D amedyaz agrawliw, i telliḍ, win akken i terẓa tεeğğağt n wurfan ur s-yekni, win akken i ijerrben i yeẓran amek i yettbeddil zzman tikli, win akken i tḥuza yal tiyiti i yuγ uẓar, win akken ideg tella, leḥmala n tnaṣlit i d-rebban idurar. Sskefleγ-d daγen iman-nniḍen i yemgerraden γef umezwaru-nni, ahat, deffir n wegrawliw yettεenninen, yettzuxxun s tezmert n yiγil d wafud, yeffer wul amerẓu n yiman anaẓur i yeknan zdat n lebγi n lmektub d wussan, iman anaẓur ur nesεi lqedra zdat n ufus n tayri d wayen akken akk i yuran γef wenyir. Anaẓur ur yeḥwaj ara allen akken ad iwali ayen akken yeddurin γef tmuγli n wiyaḍ, tamuγli n unaẓur tettarra srid γer yiman, γef wakka tuget seg isefra-k cban asekfel n yeγsan seg uẓekka, tejbiḍ γef iẓuran n twaγit i γ-yuγen, tenniḍ-d ayen akk i γ-iqebren, temliḍ-aγ-d ayen iseg nrewwel akken. S waṭas n tzemnit tdeggreḍ tamuγli-k γer daxel n terwiḥin yettwaḥeqren yenεettaben tessneṭqeḍ-d isuγan-nsent… “A tafat yeγlin a tafat… Ziγ wi yettnadin kra yufa-t… Akken kkreγ zdat-m a d-akreγ… Texsiḍ zdat-i am tcemmaεt! “ S tmuγli n unaẓur, twalaḍ argagi n terwiḥt zdat usemmiḍ n tewlawalt, teẓriḍ tikli n umezruy s isurifen yettenderkalen zdat wuguren n tsertit, twehhaḍ γer wulawen i yenzan di ssuq n ddunit. Ur tezgileḍ yiwen, yal wa yezmer ad yaf iman-is di kra n wawalen ma mačči deg yakk ayen d-teqqareḍ. Ur d-ufiγ ara imeslayen i izemren a d-ssneṭqen aḥulfu-nni i d-yettlalen deg-i yal mi ara alseγ asmeḥses i isefra-agi i yi-yezzuγuren akin i wawal, γer tizi n yiman anda akken i mcudden isefra-k wa γer wayeḍ, imi yal mi ara yendeh usefru, ikennu zdat-s yiman di tsusmi lqayen. Tanemmirt a Dda Sεid, ssarameγ ur tettcuḥḥuḍ ara fell-aγ s ccbaḥa n tmuγli-k, a γ-tessiγeḍ taftilt ur nxessi akken yes-s ad neεqel abrid γer tẓuri s isurifen n tjaddit d wafud n teqbaylit. Tanaṣlit si wehran Asabter yellan deffir wa | Asabter n zdat
Yir Argaz
- Tinin-is...Azul
Ddeqs n wagulen neɣ n tuccḍiwin i giɣ deg tinin-inu i d-sserseɣ iḍelli, acku uriɣ-n s wurfan.
Awal n wass-a ad yili d wa:
Ayen i yi-iɛeǧben deg tira n temyarut-agi d ccbaḥa n imeslayen-ines akk d telqayt n tikta-ines i tessefrak. Tessen a d-tessifer ayen i tra (tebɣa) i t-id-tini, tekkat azrem ɣer uqerruy, tɛennu adif n temsal… wissen imi d tamedyazt ay tella neɣ d tamussni wayagi, neɣ d tikci ay s-d-tettunefk sɣur ugama, neɣ sɣur Gudu?!!
Maca,
Mačči kker kan uɣal d amyaru neɣ d amedyaz! Wama ula d nekk yellan d amehraz, ad kkreɣ ad uɣaleɣ d amedyaz s usefru-nni i nniɣ ɣef tayri-w “Yir nettatatun:
” A tiḥennikin n lesfenǧ
A tidmarin n lipunj” ( Yeɛni d acu t-ixuṣṣen usefru-yagi-inu ? ahat yif isefra n kra ?!
D tidet wayen yenna bu tqerruyt-nni n Ǧamal deg wawal i d-yewwi sɣur umssnaw aneggaru (dda Lmulud) « Ma yemlal Muḥend d Muḥend, a d-yili kra ?! » Yemlal dda Ssaɛid neɣ Sɛid, neɣ Essaid (anda ẓriɣ nekk isem-is ?!!) I yettmuqulen ɣer mebɛid akk d Tnaṣlit i yettxemmimen i tmeddit, amek ur d-yettili ara kra?! Nekk acḥal d tikkelt i nwiɣ a d-iniɣ kra ɣef isefra umedyaz-agi, maca ttkukruɣ a t-id-sserfuɣ, imi d amɣar ɣef yiman-is!
Ma tessneḍ-t ɣas eg-as tadiwennit kra n wass a War isem.
Ma d nekk aql-i yečča-yi unezgum ɣef Yir nettat-nni ur d-nban, ur d-nesteqsa! Akken i t-yenna Si Muḥ: La awal, la lkaɣeḍ…
Ur ken-ttaǧǧaɣ ara war ma kennteɣ (kennteɣ i yeqqar dda ɛebdella i « burkeɣ ») i « Tegduda n TUMUJƔA », i sbedden watmaten-nneɣ Itergiyen di Nnijer akk d Mali ( Mačči am tkabarin-nni-nneɣ i yeqqaren i imeɣnasen-nsen « ur ttmeslayet ara s teqbaylit, ma ulac a s-inin « wigi d leqbayel akk » !!!!!!!!!!!!)
Yir Argaz si Agadez (tamaneɣt n Tumujɣa)
- Tinin-is...Ulac dacu i irennun urfan i wul-iw am widak yezgan qqaren-iyi:
" Ad k-yeεfu Rebbi, yeεfu i lwaldin-ik! Wigi d tidet d isefra".
D ayagi kan i d-qqaren yerna ttγillin ulac dacu ttnadiγ nniḍen.
Ur ẓrin ara γeḍlen ccan n isefra i γef snummren deg-i s imeslayen-nsen wuḥdiqen, ur ẓrin ara daγen rran-ten d
" War iswi".
Wwḍen almi zgan yesteqsiyen-agi ttwelliheγ s iman-iw, tturaren zdat tmuγli-w: " Tettwanseḍ bururu γef wulac ay ixef-iw? D tiwwura n uqerruy-iw i imedlen neγ medlent kan γef widak ur d-nekcim γur-s? Amek i d tifrat-im a timseεṛeqt? D tismin i yessusmen fell-i, gedlent-yi, neγ d tasusmi-nsent i d-iyi-d-yesnṭaqen?", Ah ya ssiεqa!
Aziγ llant tmuffirin n igenwan! Llan yemdanen yulin yid-i di tmacint yuγen abrid-iw!
" Γer tmacint uliγ, d iṛfiqen i nufiγ,
udem-im am wudmawen-nsen.
Deg-sen ttwaliγ, γur-sen ččabiγ,
yiwen uεekkaz i γ-yewwten" i yenna win inehren tamacint-agi
deg wawal-is.
Γas ma yella terriḍ iman-iw ur tufiḍ ara imeslayen iwulmen
akken ad tiniḍ dacu tettḥulfuḍ mar talseḍ timesla n isefra-w
a Tanaṣlit a weltma, maca, ayen akk d-tenniḍ yugar ula d ayen izemren ad yeffeγ seg yimi n tidet lemmer ad temmeslay i yemdanen. D nekk ideg yebded tura umeslay segmi d-iyi-tgiḍ azal ur uklaleγ, teskecmeḍ-iyi yes-s tirgigit si tama, acku tesbabbeḍ-iyi taεkemt-nni yettaken anzi s anzi-agi ad ssuqleγ si tutlayt n tmurt ideg ddreγ: " Mara ad awḍen waman γer temgert, ur yessefk ara i wemdan ad yesseknu aqerruy-is", si tama nniḍen ulac dacu yettaken anzi s aya, terniḍ-iyi tazmert
ur nγelli s tegzi tawlawalt izedγen allaγ-im d tizeṭ n wul-im.
Ma nniγ-d d tawlawalt i tedder tegzi deg wallaγ-im, riγ a d-iniγ ḥala nettat i t-izedγen ( ulac akk n tkerkas deg-s ).
I wakken ur tettuγ ara, ax tiririt i usuter-im:" Ur γ-ttfaken ara lehdur, ḥala ma ḍṣan widak yettrun".
Isteqsiyen-nni yakk yessumlen ixef-iw ffγen seg-i tura, uγaleγ am winna d-tḍegger tmettant seg iciwi-s, amzun luleγ-d tikkelt tis-snat, ufiγ imdanen yegzan ayen d-qqareγ yerna ur ugaden ara ad kkeγ nnig-sen. I tagi d tidet neγ d targit? D tazwawt kemm a Tanaṣlit? Acimi ur kem-yentiḍ ara ujeğğiḍ-nni amcum ur nezgil yiwen deg-neγ?
A win yafen amek a kem-yeẓmeḍ s idmaren-is akken ttḥebbin yemdanen tiyessetmatin-nsen n tasa!
Tasudant tabelbult,
Sεid
Tamawt: Γas ulamma d abrid kan i k id-yewwin s yagi a mmi-s n Wemsed, telliḍ tettnadiḍ γef YIR NETTAT, maca, allaγ-iw teslef-as tayri n wul-ik, s tmendit tameqqrant i yeṭṭfeγ ijeğğigen-ik, tanemmirt ay izem!
- Tinin-is...Almanen ( Ilalmaniyen ) qqaren: " Iḍarren n lekdeb wezzil-it",
ur uḥtameγ ara, almi d-ufiγ iman-iw di tqeṛṛact yendi ufus-iw.
Riγ a d-aruγ EAM, uriγ War isem, ihi atan wayen yellan:
" Lḥağ Musa, Musa lḥağ".
Daγen ur yelli γef wacu ar a yuγal wudem-iw d azeggaγ akken d-as-teḍra ussan yezrin i YIR NETTAT, akken yenna Lwennas ( ad tid-yebder wayen yelhan):" Lkumisaṛ ma ibded-d, ad tqableγ s lqed, imi yeẓriγ aεerqub-iw yeṣfa!".
- Tinin-is...Azul
Jjmiε liman n tlatin fi tlatin=yugda settin ma gziγ iqqiḥ!!! Anwi i d Sεid, anwi i d "EAM" (Agemmay); anwi i d War isem?!! Asekkur a Jwan-vil!!!!!
Mmi-s n Wefḍis | |  |  |  | |
|