Tudert n wemdan wezzilet maca s ukemmel i yettkemmil γef ayen bnan wiyaḍ deffir-s, yettbin-d am akken tudert n wemdan ur tesεi ansi i d-tebda, ur tesεi anda tettfakka. Γef aya almi d tagara n tudert-is, amdan yezga yettakk azal i wayen yexdem neγ yenna. Baba-s n unaẓur n tallit n “tafat” Mikal Angelu Bunaruṭṭi, ass mi yemmut, yenna-yas i mmi-s (Ma yerna-t-id Irving Stone, aqli rniγ-t-id) : tura zemreγ ad mmteγ deg talwit imi ẓriγ terriḍ-as azal-is i twacult-nneγ.
Kra iεeggalen n tiddukla n «Imaziγen n Fṛansa » sbedden yiwen usaru γef Imaziγen i d-yusan ar temnaṭ n teγzut n Leγwi(Bassin de Longwy) akken a d-ssisen aγrum n warraw-nsen. Imezwura seg-sen usan-d deg iseggasen 1920, zdat imi d-tesukkes Fṛansa tamnaṭ-agi seg ifassen n tmurt n Walman. Dγa ula di lgirra-yagi n 1914-1918 kkan deg-s aṭas iqbayliyen.
Ihi tamnaṭ n Leγwi(Longwy) tuγal d tamnaṭ n temguri(industrie) n wuzzal imi llant dinna aṭas n lminat. Ussan-d leqbayel s taqqa seg imir-nni ad xedmen deg lewzinat n wuzzal akk d lminat n ucaṛbun. Wa yettawi-d wa almi rran Longwy yuγal d Leγwi.
Yiwen gar wid i d-yusan ad xedmen deg Leγwi, d Sliman Azem i ixedmen dinna deg iseggasen 1940-1950. Dγa Taγiwant n Leγwi tgemmn-d ussan-agi a s-tefk i yiwet n tezniqt isem n «Rue Slimane Azem ».
Asaru yesbedd Naṣer Buğu yebda s tezlit n Dda Sliman Azem : « Algérie mon beau pays» Maca qeṛmen-tt s akken kan i tebda. Wissen ahat d tuccḍa kan neγ γilen yelha akken. Amejjay n yiman, Bendahman, yemmeslay-d γef yiman n win yeğğan tamurt-is amek yettqabal tudert-is tamaynut.
Massa Dinar Harik, tebda ameslay γef ayen tesεedda seg mi i d-tewweḍ γer Leγwi. Amek tṛebba tarwa-s akken ad awḍen ar iswi-nsen, amek tessaweḍ yiwet yiwet ad tili am nettat am tlawin nniḍen yettidiren di Fṛansa, d tiṛumyin neγ d tibeṛṛaniyin. Ayen i s-yellan d tirga deg At Yenni yuγal-as d tidett. Ayen ur tewwiḍ ara deg at Yenni, yessi-s wwḍent-t: yiwet tuγal d tamejjayt, tayeḍ d tabugaṭut, mmi-s d abugaṭu… Miḥyaf i muggren warraw-is ur ten-yeğği ara a sen-yeṛẓ ifadden. Asaru ihi yebda s umedya yettakken abeḥri i turett.
Rnan-d zdat-s imedyaten n wid ixeddmen di Lewzinat, ṛwan lmiziriya akk d miḥyaf. Yiwen wemγar yerra-d γef usteqsi yurzen miḥyaf : « à l’époque, on ne cherche pas à comprendre…on travaille c’est tout… » dγa yettεawad-as-d acḥal d tikkelt i wawal-agi. Yerna-d: “llan iṭelyanen umi slemdeγ amek ad xedmen, ar deqqal uγalen d ccifan fell-i.” Ayen i d-nnan iceγb-iten akk wid d-immeslayen deg usaru-yagi, d tarwa-nsen. Ugin ad γren nutni tafṛansist, maca ur bγin ara a d-ggrin warraw-nsen ur ssinen ara ula d nutni tameslayt-agi. Bγan ad lemden warraw-nsen tafṛansist s tγawla, ad γren, ur ttuγalen ara d izufriyen am nutni. Azgen ameqqran fkan tameslayt taqbaylit d asfel. Maca imir-nni, ayen yesεan azal ar γur-sen, d tuffγa seg tegnit-nni deg i ten-rran iṛumyen. I ten-yerra lḥewj. Awi-d kan arraw-nsen ur ten-tettḥettim ara tegnit ad gnen deg 7 deg texxamt. Γilen, -llan gar-asen wid ittḥeqqen-, d akken imi ten-ttwalin akken iṛumyen d imi ur γrin ara.
Mas Durieux, yiwen uselway n tγiwant aqbuṛ n teγremt n Leγwi, yenna: «deg useggas 1956, tella Fṛansa tettnaγ mgal izzayriyen deg Lezzayer akken ad teṭṭef tamurt n lezzayer deg ayla-s. Ihi nella imir-nni nẓerr-d akk izzayriyen am akken d icenga-nneγ, d iεdawen-nneγ. » Yerna-d daγen deg awal-is d akken, tudert n wemγid(prolétaire) akken tebγu tili d yiwet, d yiwen n nnaqus i sellen ma ad ṛuḥen ad ččen neγ ad xedmen. Ayen yeẓeṭṭ cwiṭ n tegmatt gar ixeddamen...atg
Tameṭṭut i yessettrun aṭas deg tzeqqa n „Utopolis“ n Leγwi, d Massa Mukah, fell-as yeεfu Ṛebbi. Temmut uqbel a d-ssalin asaru-yagi. Tenna-d d akken ayen i tt-iceγben d tarwa-s kan. Steqsan-tt γef miḥyaf, tenna : miḥyaf neγ lmiziriya neγ ayen yebγun yili-d tebna fell-as. Iswi-s ad awḍen warraw-is ad idiren s werfad uqeṛṛu deg tmurt-agi, ur ttidiren ara ayen ddren nutni. Arraw-is ass-agi γran, wwḍen γer ussirem n yemmat-sen. Yiwen seg arraw-is, Racid, d aεeggal n tiddukla n Imaziγen n Leγwi, yečča-t wul-is γef tmeslayt-is, γef idles-is, idles aqbayli i yebγa ad yili n umaḍal akken ma yella, mači n yiẓra nni kan yellan deg idurar nneγ.
Asaru yeεṛeḍ s « nniya » nni i neqqaṛ a d-yesken d akken ma γas ṛwan lḥif imawlan-nsen, arraw-nsen wwḍen ar iswi. Ur bγin ara ad stuqten imeṭṭawen, bγan a d-sseknen ayen igerrzen, drus seg ayen izelgen. Ur d-skinen ara amek teḍra d tarwa n wid yettidirin deg „les cités“. Amek i sen-tezleg tudert. Ur steqsan-ara wid yegganen 30 iseggasen aya, ar ass-a, deg leqhawi. Ayen γef tezmer a d-tili tuzzma daγen d tameslayt tafṛansist i sqedcen deg isteqsiyen i sen-fkan i yemγaren ur nessin ara mliḥ tafṛansist. Maca s umata, ayen i d-yellan deg usaru igerrez. Tanemmirt i Iqbayliyen n Leγwi.
Asaru-yagi si tama tatiknikit, yettwaγ cwiṭ, maca ayen i sliγ sγur imγaren akk d temγarin nneγ iccirriw aglim n win i t-yeẓran. I yeḍran yid-m a taqbaylit ! I yuγen irgazen ur ttrun !
winna
Tazeqqa