D lfal i tunṭict
Seg-m a WAR TATUT rewleγ, yal iḍ γuṛ-m ttuγaleγ,
A ziγ tedda-d yid-i tmurt.
Sarameγ a temẓi a kem-ğğeγ, maca γas tura meqqreγ,
γer γuṛ-m tleddiḍ-iyi tawwurt.
Ḥulfaγ yessefk a d-sseṛγeγ, axxam ideg luleγ,
a d-ssaliγ yiwen n tatut.
Di tatut daγen ugadeγ, amezruy-iw lammer a t-meḍleγ,
imal-nni ad t-afeγ ifut.
Γas akud deg-neγ yuker, a neṭṭef yakk deg ifurkan.
I iγallen-ik ay ul cemmeṛ, ṭṭef yal tunṭict d-ak-fkan !
Squcceḍ-d γer Brecht ekker! Imeslayen-is ur rkan:
" Win yettnaγen yezmer ad yexseṛ, win ur nettnaγ yexseṛ yakan".
……………………………………………………………………………………
A yal azger mi telliḍ tkerrzeḍ, yesduqqes-iyi win d-issedhan.
Tnudaḍ ay ul, testeqsayeḍ, γuṛ-s d kečč i d-iwehhan.
Tidet γer tidet kan a tt-tafeḍ, tufiḍ-tt a win tt-icedhan.
Ma nnan-iyi medden tzewreḍ, d aγerbaz-iw i yelhan.
…………………………………………………………………………………….
Aha a gma ddem-d taculliṭ, lqeḍ, stummen, gzi, ḥesses!
Γuṛ-i ayen d-nniγ cwiṭ, fiḥel ma tessekrem lḥes!
Ttxil-m ur d-iyi-kkat a tiṭ, akken iles ur d-iyi-ssamas!
Tameṭṭut i d-igezmen timiṭ, d yelli-s n Yiγil Bammas.
…………………………………………………………………………………….
Tafat-ik anwa ur tewwiḍ, s yes-s anwa ur d-tessakiḍ?
Yes-s i nemmuger asemmiḍ, i γ d-yeqqel rruḥ.
Di yir tagnit yid-neγ telliḍ, seg ulawen di tugda temḥiḍ,
asirem yuli am lḥiḍ, di tudert nesfuḥ.
Ay iṭij ḥader ad teγliḍ, la nleḥḥu skud telliḍ,
nessarem ar yid-neγ tiliḍ, iḍul s anda a nṛuḥ!
-------------------------------------------------------------------------------------------------
Wid yessnen ur ten-steqsaγ, d kečč ten-yesteqsan i wumi selleγ,
di ccna-k εerḍeγ ad fehmeγ, ussan-nni.
Tirezzaf γer lkaf d-ssawḍeγ, tga am wass ideg d-luleγ,
steqsi yemma ma uksaneγ, a d-ak-tini!
In-as aql-i a d-rewleγ! Ur ẓriγ sani a ruḥeγ,
a d-leḥḥuγ ḥala ma wwḍeγ, wissen sani???
………………………………………………………………………………........
Zgiγ uriγ isefra, εerḍeγ deg uferreẓ walaγ.
Γuṛ-i ḥemmlen a d-asen, imeslayen sseqdaceγ.
Tikkwal deg uqerru-w tefra, tikkwal deg leḥsab γerqeγ.
Bu tsura iteqqel ur t-nessen neγ ttwaliγ-t ur t-εqileγ.
Tikkwal ur γ d-yeqqim kra, ur d-yegri dacu a ssiremeγ.
Ata yufa-yaγ-d wassen, ideg nettnaγ gar-aneγ.
War isem