 | | Imagraden |  |
 |  |  | |
|
|
|
I tecbeḥ tmurt-nneγ, lemmer tella deg-s tlelli!
Ilemẓiyen tteglillizen deg iberdan. Dacu kan tura abrid zeddig, yeggudruni. Tafat tella, tiγerdmiwin ulac. Iḍ kamel d aqeṣṣer, awal ijebbed wayeḍ. Tikkelt-a ameslay ameqqran yella-d γef webrid n taddart. At taddart merra, am urgaz am tmeṭṭut, am ilemẓi am umγar dukklen akk γef yiwen webrid. Ulawen ğğuğğgen mačči d kra. Ma nedukkel nezmer a nessiweḍ γer iswi-nni. Llant tlufa, yessefk ad yeṭṭef yiwen afus deg ufus fell-asent. Annect-a yeḍra deg taddart Tiwal, taγiwant Ait Mauc (Bgayet). Taγiwant tefka-d iṣurdiyen ad ggudrunin abrid n taddart. Awi cerḍen a nesεu abrid yeggudruni akken yessefk, mačči kan d aruccu am zik-nni; kra kan iseggasen yeččaray akk d imdunen. Taγiwant tufa-d ula d win ara ad ixedmen abrid. Asmi i tewweḍ γer tidett, dγa Ccaf n Daira yenna ala. Ẓer kan tura: aselway n tγiwant dda Rabaḥ yenna ih, argaz-a i d-yusan wissen s anisi yenna ala. Imezdaγ n taddart Tiwal ẓran aselway n tγiwant-nsen yedda yid-sen dγa nnan: Ccaf-a n daira yessefk a t-nẓer. Imezdaγ n taddart Tiwal ulin γer wexxam n Daira bedden-as i Ccaf-is γef tewwurt. Kecmen γur-s kra n yergazen, nnan-as acuγer i yugi ad yestenyi iccer-nni n lkaγeḍ i waken ad yettwixdem webrid! Dγa mcaqlalen. At taddart n Tiwal nnan-as: Atan ur teffγen ara alma yestenya iccer-nni n lkaγeḍ i waken ad yettwixdem webrid n taddart-nsen. Nnan-as, ma yella yugi atan ad sekkren tiwwura n wexxam n Daira. Ccaf n Daira yeẓra d tidett εewlen-d γer imenγi yid-s, dγa yestenya iccer-nni n lkaγeḍ amcum. Ihi ayen xedmen imezdaγ n taddart Tiwal yessken-d snat n tluffa: Tamezwarut: Tamurt-ik yiwen ur tt-ixeddem ma yella ur tt-texdimeḍ ara keččini. Tis snat: Ma yella icemmer yiwen iγalllen, yeddukkel, atan yezmer ad yessiweḍ yiwen γer wayen yessaram, akken tebγu tella tmara! Asabter yellan deffir wa | Asabter n zdat
Bu3lam
- Tinin-is...Tanemmirt a Akli γef wasel ayi isefṛaḥen, i d-iskanan d akken
nezmer a nesiweḍ γer lebγi, ma neddukel am yiwen, akken bγunt kersent temsal.
Ayuz i At taddart n Tiwal!
- Tinin-is...
Tanemmirt tameqrant i kra n win ixeddmen ayen ilhan i tmurt n Yeqbayliyen.
- Tinin-is...Azul
“Bab idurar” tikkelt-a yeṣfeḍ imeṭṭawen-is; segmi d-yemla kra n tmucuha i tarwa-s, yekker a d-yerr ttar. A ziɣ nezmer mi nebɣa! a ziɣ mi nebɣa nezmer!.. d acu kan tazmert-nneɣ tikkwal nettak-it d asfel ilmend n tuxsa (lebɣi) n wiyaḍ! Tazmert nezmer, d ayen ibanen; neɣ amek i ssulin wid-nneɣ lminat n Wanẓa, lminat n Beccar, iderbuzen umiṭru n Lpari ( wigi meqqar ahat tufa-ten Yir nettat)?! Tazmert nezmer, ladɣa di ccwal akk d teswiɛin n cedda, maca, di teswiɛin n talwit a d-nezg dihin am tili.
Tikkelt-a dduklen wat “Tiwal”, ẓwan (ruḥen) ɣer umeqqran n ddayra, wwin-d ttawilat s wayes wennɛen abrid… ahat nezmer yiwwas ma neddukel ad neg ugar, ad nessali akk tamurt n leqbayel?!
Aḍris-a yecbeḥ nezzeh s tfuṭutin-agi i s-yerra akka dda Akli; wezzil, yeshel i tɣuri, amzun akken yefka-yaɣ-d amedya amek ara negzu asumer neɣ awellih-ines yerzan asiwzel di tira.
Ǧ.B
- Tinin-is...Azul fell-awen,
Telha tegmat a tarwa, telha tdukli; kra i ɣ-d-ǧǧan lejdud-nneɣ imeɛzuzen yelha. Yak weṣṣan-aɣ ɣef tdukli, weṣṣen-aɣ daɣen ɣef twizi, neɣ mačči akka, a tarwa?! S wacu i nif aɛraben akk d wiyaḍ? yak nif-iten s tuṭṭfa deg wesɣan (ddin)-nneɣ, neɣ mačči akk?! Nekk, tban-iyi-d taɣawsa tamenzut ideg ilaq ad nezwer d tamezgid (lǧameɛ) ara nebdu, ad neg akken iga wucbiḥ umazan (nnbi)-nneɣ. Tis-snat, d abrid n Rebbi i yezwaren win n taddart, acku yif ma nezwar deg win ara yawin imɣaren (timɣarin la yaǧuz!)-nneɣ ɣer lḥiǧ, akken ad ṭṭfen deg ucebbak n nnbi, neɣ mačči di ṣṣwab ay lliɣ?!
A ɣ-yawi Rebbi d webrid n lewqam, a tarwa. amin!
Amɣar
- Tinin-is...Azul
Yal mi ara d-kecmeɣ ɣer wesmel-agi, a k-id-afeɣ tezwareḍ-iyi-d ɣer da! D acu d rreb-agi daɣen?! Yella ɛni wi k-yekksen taẓallit a ba amɣar?! Ssya d mmi-s n Wemsed yettruẓu-yaɣ iqerray-nneɣ s yir nettat, ssya d ba amɣar-agi i la yeṣṭenṭunen fell-aneɣ ṣṣbeḥ tameddit, yesqaqay ɣef tẓallit!
A wi yebɣan lewqam, yezwir deg at wexxa, a ba amɣar. A mačči d leǧwameɛ i ixuṣṣen, di tegnit ideg llan wugar n 10000 alaf n leǧwameɛ di tmurt n leqbayel! Ur yezgil ara win s-yennan: “Berkat-aɣ si lebni n leḥbus
Berkat lebni n leǧwameɛ
D taqbaylit ideg nxuṣṣ
….
I ɣ-ixuṣṣen a ba amɣar, d allalen akk d isufar n tudert tamiran: Iɣerbazen, tisnawiyin, tisdawiyin, ixxamen n yedles, tizeqqiwin n ssinimat, umezgun, annaren n yal addal, ṣṣbiṭarat, iberdan, aman, trisiti d lgaz; ladɣa, ladɣa aṭas n waṭas n teqbaylit,,,
A ba amɣar, tamurt n leqbayel yečča lḥif d meḥyaf, amzun azarug-agi yerna-aɣ-d d azaglu ɣef tuyat-nneɣ! D acu d-yeḍren tamurt n leqbayel? Anagar lmut, rrṣaṣ, leḥbas, rrebrab, tamḥeqranit, lkif d ladrug !!! Arrac-nneɣ msakit yečča-ten layas : yal tagnit ad tesleḍ yiwen yenɣa iman-is akken d aleqqaq! Tullas-nneɣ, tin ur neddi d taklit (tislit) ɣer waxxam umehraz(wergaz)-is, ad teqqim d taklit ɣer imawlan-is.
Jjmiɛ liman ma rniɣ-d awal!
Awetniri
- Tinin-is...Azul fell-awn (t)
D tidet ay d-tiniḍ ay Awtniri. Dɣa tella-yi di tedmi (lbal) a d-rnuɣ da, kraḍet (3) temsalin, ma nemwata fell-asent, neɣ atent-neskasi (a tent-“nesqerdec” akken qqaren):
1) mmi-s n Wemsed, ṣṣbeḥ tameddit yettaru-d ɣef zzhu, ccḍeḥ d rrdeḥ; amɣar-agi n leɛza, yettwi-d ala ɣef tẓallit! Amezwaru atan iban: “ilemẓi ma yeɛweǧ, yebɣa ad yejweǧ”. I wis-sin amek i d ixef-is?! Ahat ilaq-as waya kan: “Amɣar ma yebda askeɛrer, i s-ilaqen d imeqber”.
2) Taqcict ɣer leqbayel= jjwaǧ!! Si temẓi-s i la tt-id-ttrebbin i jjwaǧ, ameslay yid-s ala ɣef jjwaǧ, awelleh deg-s i jjwaǧ? Jjwaǧ, jjwaǧ, jjwaǧ!... Werǧin nwelleh taqcict-nneɣ ɣer leqraya, ɣer uxeddim.. akken ad tezmer i yiman-is, akken ad taɣ tamezduɣt i yiman-is, ama tejweǧ neɣ teqqim kifkif! Tameṭṭut ɣur-neɣ ma ur tejwiǧ ara yeɣli-d igenni, tekfa fell-as tudert! Ahat ɣef waya i llant tid msakit i ineqqen iman-nsent, neɣ i yessawaḍen kra-nniḍen ɣer tiselbi!
3) ddeqs n wid izedɣen deg Wehran, neɣ zrin seg-s kan d imsebriden, qqlen d imyura s tmaziɣt, neɣ d imassnanen, neɣ d imnadiyen… yiwen deg-sen dɣa d dda Akli Qbayli, ameskar n weḍris-a, ugar ɣef dda Ɛebdella, Kamal U Ẓerrad, dda Sɛid At Mɛemmer..
Awlawal
| |  |  |  | |
|