Ulac aqbayli ur nessin ara dda Ḥemmu yerna ẓran akk yelḥeq iman-is akken yessefk, acku yunag Lpari.
Ussan imezwura n yinig-is yufa tawuri γer Ṛṛunuda, kra n iseggasen kan ijeddel amḍiq yuγal d amγid di lfur γer Biju akken yeqqar.
Ihi akken yeḥma wemḍiq n twuri-s i yeḥma ula d lğib-is, yekkat idrimen s rrkel, yedder am ṛebbi di Faffa.
Di tmurt daγen yerbeḥ, yufat:
Γur-s tameṭṭut yettṛağun ḥala tisin-is yakk d kraḍ ( 3 ) n tullas ḥemmlen-t-tt nniq kra yellan, netta daγen iḥemmel-iten-t.
Tullas-agi n dda Ḥemmu ugaren-t agur n tziri di ccbaḥa.
Dacu a yernu wemdan s nnig waya? " Nnig lewqam d taxessaṛt".
Yesla hedṛen fell-as medden, qqaren-as:
A ziγ idrimen ur zzmiren ara ad ffrun yal tamsalt,
γas akka Ḥemmu yerfed iman-is akken yessefk, yessuli sa ( 7 ) n taxxamin s lyajuṛ, yesbeγ akk axxam-is si beṛṛa, yesεa snat n lkabinat yerna γuṛ-s akk daγen lerbaḥ yeččaččaṛen tiṭ: Tilibizyu, lbifi, takuzint n usewwi yakk d winna yessismiḍen, ḥala lmut i ulac deg axxam-is, maca yesxeḍ-it-id sidna ṛebbi lεalamin s tullas, ḥala tullas i d-yesεa.
Ma yerzef dda Ḥemmu deg unebdu γer tmurt, yezga yessufuγ-d aseqdiḍ n imezdaγ n taddart-is.
Yettsewwiq snat n tikkal di ssmana, iteddu deg uṭaksi n yiwen wemjahed aqbuṛ n wedrum-nsen, amḍiq n zdat n tkeṛṛust
ḥala netta i yettεeğğiṛen deg-s " yecbeḥ wakli, yerna ticraḍ".
Yal ma ad uγalen s axxam, yettaf-d tamγaṛt-is tettṛağu deffir tejmeεt akken a teddem acerraε-nni d-yeččaččaṛ ḥala ma yugi ad yeddem γef uqeṛṛuy-is.
Mi s-yerra ttεebga i tmeṭṭut, yettuγal γer tkeṛṛust, yessufuγ-d kra n tdellaεt yettarran akk arrac-nni yellan di tejmeεt meddlen allen-nsen, acku ttagaden ad taweḍ tegrest, a ten-id-ssiweḍ
werεad d-ffγen si targit n wučči n ddellaε.
Ur yettaṭaf ara abrid s axxam, ala. Yettḥebbi tadellaεt s yiwen ufus s idmaren-is " iqbayliyen ḥemmlen ad ssaknen γuṛ-sen tazmert tgerrez, win ur nezmir ara ad yeddem aqentaṛ n wewren γef tayett-is mačči d argaz", afus nniḍen yettmuddut i lγaci, izemmeḍ-asen yes-s ifassen-nsen.
Yezga yettaf di tejmeεt yiwen seg iminigen am netta, dγa yiwen wass yufan yiwen seg widak t-yesnen yerna winna ur yetteḍḥi ara yakk seg-s, acku d netta i t-yettawin deg umitṛu tikkelt deg useggas γer TATI akken ad yaγ lkettan i yessi-s.
Nutni imingen-agi n Faffa ulac anwa i ten-yugaren di zzux, ttḥulfun s yiman-nsen zdat iẓawaliyen n tmurt am iyuzaẓ zdat n tyuzaḍ, ččuffun akk deg iman-nsen, amzun d tikli ad felqen.
Argaz-nni yesseṛbek-as snat neγ ma kraḍ n tikkal s iduḍan-is di tdellaεt-nni tamcumt, nettat terrad ṣṣut am winna d-yettuγalen i teγṛi n yemdanen deg idurar, dγa icuff-as aqenduṛ, yenna-yas:
Tebra tmeṭṭut-iw kečč ar d amussnaw n ddellaε a Ḥemmu.
Dda Ḥemmu: Uḥeq wahin d tahin ar teččeḍ taceqquft-agi, yak atan teḍbeε yakan a sidi!
Argaz-nni yeslutteḥ deg-s, yesmektid yakk lγaci-nni yellan di tejmeεt d zwayel ma tessen-t di tala, yenna-yas:
Welleh a sidi ar tεedda si tamment akin.
Dda Ḥemmu iγil yessefk a d-yissiken yessen taqbaylit, dγa dindin yenced-it s axxam, yeggul-as ad yečč imensi γuṛ-s tameddit-nni.
Argaz-nni yessased imensi s weskeεrer, lγaci-nni ufan-d γef wacu a d-awin ameslay, a d-ssεeddin tagnit.
Yeγli-d yiḍ ur ssulin ara ameslay γef ddellaε, yal yiwen deg-sen yefka-d tamuγli-s γef w´amek yezmer yiwen ad iẓer ma telha tdellaεt war ma yeḍbeε-itt wemdan.
Seg akken ur mmsefhamen ara, yal wa yeqqar-as d aman-iw kan i iḥemmun, mxataṛen.
Dda Ḥemmu si tama iḥulfa s yiman-is am akken yeṭṭef-d izem seg umeẓẓuγ im s-yenna ubarizyan-nni am netta tesneḍ i ddellaε, maca si tama nniḍen tekker tmes deg ul-is, acku yeẓra heddren akk fell-as at taddart, ttalsen ameslay-nni n wesxaḍ t-id-yesxeḍ ṛebbi s tullas.
Llan daγen widak yeqqaren: Walit kan ay at leεraḍ, wallllit!!!
Ḥemmu d mmi-s n tfamilt i yella, d lefhḥel γef yiman-is, wellah ma yuklal tawaγit am tahi umeγduṛ meskin.
Yuṛğa almi d tikli ad kkfun wussan-is n werzaf γer tmurt, yenγel-d taffaṭ-is εinani γef tmeṭṭut-is, yennay-as:
Almi d ass-agi i ssawḍeγ fehmeγ ssebba yessawḍen argaz lεali am
lḥağğ Aεṛab n at Tlam yerna-d takna γef tmeṭṭut-is, a ziγ imezwura-nneγ ur d-aγ-d-ğğin ara lemtul-nsen almi tella deg-sen lmeεna, ssεan lḥeq imi qqaren " ur yeqṛiḥ ḥedd usennan, ḥala adaṛ yeddan ḥafi".
Ihi a tameṭṭut εzizen, menyif tidet yesseqṛaḥen, wala lekteb yessefṛaḥen:
Ma yehdak-m sidna ṛebbi ula d kemm, ili kan d tuḥdiqt am nanna-m Lyaqut n at Lḥif! Atan ula d nekk a d-am-ffkeγ d ttiqa, d kemm ad isewqen s ufus-im.
Ihi nekk ussan-agi a d-uγaleγ γer Fransa, kemm gerrez-aγ-d d tawil, wali amek ad-ssḥedreḍ tameγṛa deffir n lεid tameqqrant n useggas d-iteddun!
Dagi ur fessus ara γef wemdan akken ira yili, a d-yaf dacu n wasif d-iḥemlen ger wul d wallaγ n tmeṭṭut. Wissen ma d win n wudi d tamment neγ d win n qedṛan???
Ttessusem kan, ameslay ur d-yuli deg imi-s" tuγ-iten-t mkemda".
Kra n wussan kan yenna-yas, aql-i a d-ṣubbeγ γer Tuzuzzu akken a d-def3eγ, a d-uγaleγ γef yiman-iw γer dahi.
Tezzid kan ssmana yeddukel d ubarizyan-nni n taddart-is, uγalen akken γer Bariz.
Dda Ḥemmu yennay-as deg ul-is, yefkat-id ṛebbi meqqaṛ a
d iy-iεemmeṛ laffic di ṛṛublan.
Tudert n dda Ḥemmu di Fransa tettak anzi s ayen yecna umedyaz-nneγ, anida akken yeqqar: “ Si lxedma n luzin s axxam”.
Mar a d-ttmeslayen fell-as iminigen am netta, qqaren:
Mar a teṭṭef tegnit ass n 14 di julu yiwet n tikkelt di yal semmus ( 5 ) iseggasen di Lpari, iteffeγ ula d netta deg iḍ, yettaweḍ ḥala ma d iri n lassan.
Mar a yettwali lmuḥeṛṛiqat-nni yetterḍiqen yakk d ifeṭṭiwjen-nsent yettalin deg igenni, yetthuzzu kan aqeṛṛuy-is yettwehhim, yeqqar-asen i widak yellan yid-s:
Ay ass-mi ččiγ baba, ay ass-mi ččiγ baba, timura yakk wwḍen-t s igenni, tamurt-nneγ tettuγal kan γer deffir.
Dda Ḥemmu imiren deg iseggasen-nni n 70 ur yesεi ara tilibizyu di texxamt, seg 1939 mi yezger γer Lpari almi d 1969 i d-yuγ yiwet ṛṛadyun deg umarci n Kriyankur.
Medden akk sslan s ṛṛadyun-is, acku yal ma d-yemlil win yessen a s-yini:
Melmi testufaḍ, εeddin ttxil-k γer texxamt, a d-it-rrigliḍ lantin n cwiṭ n twezwazt-nni d-uγaγ, akken a d- ṭṭfeγ tamurt, a d-sselleγ i Ssi Crif n yemṛabḍen, bu nnuba-nni “ Aneznaz n yid´”!
Agur-nni amezwaru i deg rrsen idaṛṛen-is tikkelt tamenzut deg wakal n tmurt n Faffa, yekcem nnig ukkuz( 4 ) n tikkal γer yiwen ubistṛu n yiwen n taddart-nsen.
Seg imiren ur yuγal, ur yekcim kra n ubistṛu nniḍen yerna abistṛu-agi n mmi-s n taddart-is, yezdga-d deg webrid yettawin γer texxamt-is d-yusan kra n 300 n lmitrat γer tama tazelmaṭ deffir-s.
Yesewway tamermiṭ deg texxamt, inuda, yufa.
Yiwen wass kan almi yuqem tamuffirt i yemdanen t-yesnen:
Yejbay-asen γef wemnaṛ n ubistṛu, yerraten akk seffḍen allen-nsen, acku ur uminen ara d netta i d-yeččuṛen imi n tewwurt.
Yal yiwen dacu n lḥir s-yessekcem s ul-is s unekcum-is, wa wwten-t izaylalen, wayeḍ d tugda n tismin.
Argaz yesseεṛeq-asen cced n uyeddid s w´amek akken yettmeslay yid-sen s tedṣa d wecmumeḥ, ladγa mi yerna yeqqar-asen, bwaṛ un (1) ku a sidi! Seww kečč avik blisir! Wwet-as kečč banaci γef yiman-ik! Bṛu lḥağa ay argaz lεali! Ixleḍ-itt akken ilaq.
Llan daγen widak iγillen ahat yerna γuṛ-s weqcic .
Ma d amεellem-nni n taddart-is tekkfa fell-as ddunnit, yeṭṭef tasa-s deg ufus-is, acku yugad ad yili yerbeḥ luṭṭ u neγ yettucid ṛṛabil ameqqran γer Biju.
Amεellem-nni d netta i yebnan akk lbeṛğğ ameqqran deg taddart, yezmer sakin dda Ḥemmu ad yekk nnig-s s kra n tγurfatin.
Yennay-as kan, seww ula d kečč a Ḥmimi un (1) ku γef lkunt-iw, ul-is yebded amecwaṛ, ifassen-is teṭṭef-iten tkekkuct, taqeṛεett n kunyak teγliy-as, terreẓ, yuγal yennay-as s tuffẓa n yiles d ddemmaṛ:
Ssefhem-aγ-d a Ssi Qessam dacu d ugejdur-agi d-yeγlin fell-ak!
Dda Ḥemmu iwet γer Lğib-is, yessuli-d tiligṛam d-yeṭṭef si tmurt, yekmes-as lkaγeḍ-nni aḥcayci s afus-is i Ḥmimi, yennay-as:
Axx, axx ay acrik n ddunnit, kečč tebra ma zemreγ a d-ffreγ fell-ak kra!
Ḥmimi-agi akken ira yella, yelha neγ diri-t, maca di temsal-agi n ddin yezweṛ γef yiman-is, ldin-t wallen-is.
Maca akken iwala lkaγeḍ-nni, yewwet-it wugur annect-ilat, yeγliy-as i ṛebbi γeṛ ger iḍarren-is, acuγeṛ?
Argaz yufa-d iman-is yeččehhid, yeqqar " Laylah waylelleh, Muḥemmed d ṛsul n llah" war ma yuḥtam d wegrireb, a wid kan mačči d Luṭṭu neγ d ṛṛabil i t-yettuci dda Ḥemmu γer Biju.
Isalli d-ibub tiligṛam-nni, d win i s-yeẓra dda Ḥemmu,
texḍeb-as-d tmeṭṭut-is di tmurt yiwet n teqcict yerna s useggas kan i tugar yelli-s tamenzut.
Tameddit tekkfa, dda Ḥemmu yuγal γer texxamt-is d
tmermiṭ-is.
Seg ass-nni d afella yezmeḍ taγeggaṭ-is akken iwata, yurğa almi d tikli ad taweḍ lεid tameqqrant, yeččuṛ-d tibulaz-is γer TATI, yewwid lkunji, yerzef γer tmurt.
Argaz tessay-as s wedfel, ur yettak ara anzi γer wid yettṛağun ṛebbi., dindin iwet azrem s aqeṛṛu, iderrez tameγṛa, yewwid ṭuṭṭu akken yeqqar, yessuli-yas aεebbuḍ, yuγal γer ccγel-is
" ddu neγ teddiḍ".
Tẓa( 9 ) n waguren, ass ur izad, ur yenγis, ilul-d weqcic.
Leεmaṛa i d azarisem d-as-ffkan, acku γillen ḥala yes-s i yeεmeṛ wexxam.
Ass-mi ilul, inezzeh win ixaqen, ur yezmir ara wallaγ n wemdan a d-yaf imeslayen a yesseqdec akken a d-yessefhem amek ur d-yeγli ara igenni seg wayen yedṛan deg wexxam n dda Ḥemmu.
Leεmaṛa yif mmi-s ugellid akken d-yekker, ulac akk melmi i t-ixuṣ kra neγ kra.
Anda yedda a d-yaf aḍellaε n wallen yeṭṭafaṛ-it: Allen n yemm-as, n takna n yemmas yakk d tid n yessetma-s si baba-s.
Ngum a d-yeldi imi-s, a t-yaweḍ wayen a yessuter.
At taddart-nsen seg zik ḥemmlen asbecbec, d imdanen d-yufan lεib ula i tmellalt.
Γas akken mačči d Leεmaṛa i sed-yernan yemma-s d takna i tmeṭṭut n baba-s, at taddart akk qqaren-as:" Deεwessu yewwi baba-s, a t-tterḍeq di mmi-s".
Llan daγen widak yeṭṭfen cceḥna i yemma-s, amzun yella anwa i tt-icawṛen ngum a d-teddu d tislit γer dda Ḥemmu ma yehwa-yas neγ ala yerna d takna-s s timmad-is i yessutren afus-is di jeddi-s, acku baba-s yemmut, yeğğatt-id d tagujilt mi tella d llufan, yeγli-d si labbin n wetṛaktur, yewweḍ anida akk a naweḍ.
Imawlan n yal tawacult di ddunit stummunen i wussan d iseggasen imezwura ideg yettili llufan deg wexxam, ay annect ḥḥlawit fell-asen widak i deg yella Leεmaṛa meẓẓi yerna
γuṛ-s kra n leḥnak d izeggaγen, d ibexbuxen.
Widak yesεan dderya ẓran amek ttafgen-t teganatin-nni d w´amek tettimγuṛ tarwa-nsen s uγiwel war faqen i wakud amek yezreb γas ma yella daγen leεtab deg tnekra n llufan.
Ass-mi yessaweḍ Leεmaṛa tam ( 8 ) iseggasen deg udur-is, tuγit tegnit deg useggas wis kraḍ deg uγerbaz ( lakul ) amezgaru, tedṛa yid-s tmacahut-agi:
Yiwen wass ger wussan, yeffeγ-d si lakul, yeṭṭef abrid-is s axxam, yetteddu, icennu tizlit-nni “ Qum taṛa baraεima lluz”.
Yewweḍ γer tlemmast n webrid, yegray-as-d wezgen n wayen d-yelḥa akken a d-yaweḍ s axxam, ur yessuli ara ccna n tezlit-nni d-yelmed ass-nni yerna yessehrew akka acemma taγect-is, tuγal am akken d tazurant.
Yessemlal-it-id Σemmaṛ Bu zzwaṛ d yiwen ddigurdi d-yezzewren tameṭṭut-is zdat-s, kkan-d si lexla, ass-nni d nnuba-nsen n terga.
Tameṭṭut teddem-d snat ttεebgat, yiwet γef uqeṛṛu, tayeḍ γef weεrur, ma d ilemẓi-nni n wergaz-is yeḍfeṛ-itt-id s useffeṛ yerna ineğğeṛ deg uεekkaz n teslent s lmus n dukduk.
Leεmaṛa ur d-yelhi ara yakk yid-sen, iteddu, icennu war kukru d uḥebbeṛ.
Ur yuḥtam ara yakk weqcic ameγduṛ, almi d-yesseḍwi ujelkaḍ-nni yellan ger ifassen n ddigurdi-nni d-yemlal deg uzagur-is.
Yesseḥḍaqeṛ-it almi d ayen kan, yekkat-it, yeqqar-as:
" Ur tseḍḥaḍ-ara γef yiman-ik ay akebbul, a mmi-s n tsegnatin, εni deg wedrar i k-yuγ lḥal imi tserḥeḍi ugerjum-ik am weγyul?
Ilemẓi-nni ira ( yebγa ) ad yessaken i tmeṭṭut-is yesεa tirrugza, ur t-iwit ra almi yeqqen allen-is, yukel γef ul-is, yessebleε tirgigit d tugda i t-izedγenn d lebda bu tasa n tyaziṭ.
Aqcic yewwi tiγiγiit-nni teḥma yerna yessusem. Ulac akk anwa neγ anta i wumi yemmeslay γef twaγit yedṛan yid-s, acku yumen am akken d tidet yezger kra n talast imi yella icennu deg webrid.
Ilemẓi-nni kra yekka yiḍ ur yeṭṭis, yazga yettlejlij, yedduqqus, yeğğeddil deg idis, yettargu am akken jban-d fell-as widak a s-yerẓen tamgerṭ-is imi iwet Leεmaṛa.
Uḍan n ssmana-nni akken llan yiwen-nsen, yesεedda-ten s wacu n tguni d wacu n ddunit ideg yedder yerna ur yečči, ur yeswi.
Akken iεedda wayur( aggur ), ulac win d-yesteqsan fell-as i lmend n temsalt-nni, yennay-as wul-is:
" Ah ya tawaγit-iw, γeḍleγ-d ssiḍ γef yiman-iw war ssebba, a ziγ yeshel Leεmaṛa!!!
Dacu n tikti d-yusan deg uqeṛṛuy-is?
Yekker iqusem-as i Leεmaṛa lawan-nni ideg t-yemlal m´akken yessers deg weεrur-is amezwi-nni.
Leεmaṛa yeṭṭef abrid-is s axxam am yal ass, winna yuṛğa-t γef yiri n webrid s ddaw yiwet n tzemmurt.
Akken yewweḍ weqcic γer zdat-s, yekker-d γuṛ-s am yizem, yebren-as ifassen-is deg sin γer deffir n uzagur-is, yezwer-it
zdat-s, yesseknay-as aqeṛṛuy-is, yeṣṣub-it γer uderbuz
yellan ddaw webrid, yessekcem-it deg yiwen libiz, yekkes-as aserwal s teγṛit, yuqem-as lεaṛ ( lεib ).
Tagnit-nni tamcumt tekkfa, Leεmaṛa tessegrat-id deffir-s ur yeddir, ur yemmut.
Yu&iten-t kan γer daxel mkemda, yessusem daγen.
Ula d netta yeẓra acuγeṛ yessebleε aγbel, yeṭṭef imi-s.
Acku di tmurt n Yeqbayliyen, win i wumi a tedṛu taluft am tagi, γas a d-yeṭṭef imi-s, ur yettellik ara iman-is yerna ad yekker
fell-as ṭayhuh akken iwata " aseεdi d win yemmuten di liser".
Ma d ddigurdi-nni zur wudem-is neγ ahat s yiẓẓan i t-yessared, ilemẓyen imezwura d-yemlal di tejmeεt yessawel-asen-d taluft yedṛan yerna s zzux.
Aqcic meskin yeffeγ umenduh fell-as, win d-yemlalen wayeḍ a s-yini: A ziγ Leεmaṛa d aεeṭṭay a ddin ṛṛeb!
Izem-nni iḥulfa s yiman-is, amzun d netta i d Nelson Mandela.
Leεmaṛa yuγal am umeslub, yezga yeshetrif kan, yeweḍ almi d tikli yenγa iman-is, ira a d-yekkes bu ḥbel-is akken a d-yaf talwit.
Yella yiwen wergaz n taddart-nsen, yedder d iminig di Kubenhagen ( DK), yal sin iseggasen irezzef γer tmurt.
Ussan-nni ideg teḍra taluft-agi d Leεmaṛa, tuγ-it tegnit di taddart.
Ass-nni iεawez deg iḍ i tziri, yeqqim d kra n yelmeẓyen di tejmeεt, llan ttmeslayen γef Leεmaṛa, uγalen neṭgen γer wiyaḍ, jebden-d ameslay γef li BD an jiniṛal akken qqaren.
Iminig-nni n Kubenhagen yessuli leḥsab-is, yesres-it, yufa mačči d imdanen i wumi yezmer a d-yemmeslay γef temsal-agi n yergazen yettidiren d wiyaḍ neγ n tulawin d tiyaḍ, tamuγli-nsen yessen-itt, gar-asen i d-yekker.
Maca yewhem amek rran tamsalt n Leεmaṛa am akken yiwen-is d tmucuha n widak i γef ttmeslayen.
Leεmaṛa meskin d agrud i γef iεedda uzaglu, yessefk a d-yessifeg wemdan aqeṛṛu n γlulu-nni i t-yesεeddan fell-as war wahin neγ tahin...
Yeqbeṛ wul n iminig-nni yellan yessusem tazwara, yuγal yuli-d ṛebbi-s, yekker, yessaked-iten s yir tmuγli, ihhuz aqeṛṛuy-is akka d wakka, yessegray-asen-d ameslay s tefransist, yennay-asen: Putain de merde, yeṭṭef abrid-is s axxam.
Akken kan yeffel i tiγilt, serḥen d tadṣa sin yizmawen yellan ger widak-nni yakk yeqqim.
Ugaren iγyal mar a smeṛmuγen akken.
Amezwaru yenna-yas: Acuγer akka tettadsaḍ ay ageswaḥ n ṛebbi?
Winna yerra-yas-d: A zṛiγ, zṛiγ tfaqeḍ ula d kečč.
Wayeḍ: Kenwi d imcumen ay atmaten, ulac akk dacu i wen-inettren, aha init-d γef wacu tettadṣam akka, aha!
Wayeḍ nniḍen: “ Yekker, yettneggiz“ Tura faqeγ ula d nekk, faqeγ, mebla ṛebbi ula d wahin ar d aεeṭṭay.
Akken yessuli ameslay, zeḍmen fell-as widak-nni yellan ttadṣan, ḥebbant, zemḍen-t γer yedmaren-nsen si tmendit, nnan-as: Ula d kečč γuṛ-k lḥeqq-ik ay amcum, tebra ma ttεeddin akk fell-ak izaylalen, umadra yemma-k i k-id-yesεan!
Wis kraḍ-nni ( wayeḍ ), yuγal wudem-is d azeggaγ, iseḍḥa akka acemma s yiman-is, acku ḥala netta ur nfaq ara gar-asen, maca dindinyufad tikti i s-yesseṛ aqeṛṛuy-is, yenna-yasen:
Wellah ula d nekk ar faqeγ, walaγ-t m´akken tt-ikemmez s azṛu-nni i γef yella yeqqim, dacu kan ur umineγ ara allen-iw, maca yehwa-yi kan, acku annecta d ayen yella iban am taft, imezdaγ-agi yakk n Luṛubba, la blibaṛ deg-sen ssεan ṣṣenεa, d tikci i d lmiti-nsen.
Imiren kan ata yeffeγ-d seg wexxam yiwen n uεefrit, d yiwen seg widak-nni i wumi qqaren, yekkat-itt ula deg aman.
Akken twalan, mmugren-t s lfeṛḥ, nnan-as: Iyyaγ a Bu γenjuṛ, iyyaγ γer dagi, yewwik-id ṛebbi swa, swa!
Bu γenjuṛ: D lxiṛ a tarwa, yakk d lxiṛ?
Wid-nni: Ma d tidet kečč d argaz, γuṛ-k a k-yenser wudem-nni n teqcict n Ḥmimi n leεziεb! Atan iban tella deg-s 100% yerna di Kubenhagen anida yezdeγ zewğen yergazen d wiyaḍ.
Bu γenjuṛ: Iyyah, ihi akka i tella! !mi akka ihi, aneft-as kan, wali-t mmi-s n tağğalt, wali-t! Atan tebra ddin yemma-s ar d-awiγ la Karṭ rizidans deg uqerquṛ-is!!!
Di taddart-agi n dda Ḥemmu dṛan-t twaγiwin timeqṛanin yugaren tin yedṛan d Leεmaṛa. D ayen i t-yeğğan ur yenγi ara iman-is.
Ass-mi yessaweḍ tam d mraw ( 18 ) iseggasen di tqeṛṛut-is, baba-s imiren dγa i d-yewwi lantrit, i kecmed i lebda γer tmurt,
yewwiy-as-d takeṛṛust i mmi-s, yuγ-d tameqḥelt i iman-is, ma d ayen nniḍen d yiwen mmi-s n taddart-is yezdeγ di Seṭṭif i t-id-yuγen γef yisem-is m akken yerra la karṭ rizidans-is i iṛumyen.
Argaz-nni ixeddem tṛbandu, yessen akk widak ixeddmen di ddiwan yerna ulac daγen ccambiṭ neγ tazuliγt ur yessin.
Dacu i s-d-yegran tura i dda Ḥemmu?
Yessefk ad yesεu tislit skud teskerker deg-s tmettant.
Ma d ul n Leεmaṛa yebḍa γef sin:
1)- Mazal-it d aqcic, ira a d-ifaṛes temẓi d wurar war aḥebber, ttεebga d wayen akk yeqqnen s ayagi.
2)- seg w´akken tullas d tullas i yessefk a d-ddun-t d tislatin di tmurt n yeqbayliyen, yugad a tfat tin iḥemmel.
Yefren ger sin iberdan-agi, yuγal yenna-yas i wergaz-nni i s-d-iceyyeε baba-s a d-yemmeslay yid-s γef temsalt-agi n εamuṛ n wexxam:Imi tebγam akka a sidi, ihi nekk d leflantegga i bγiγ.
Azekka-nni kan yewweḍ dda Ḥemmu baba-s n teqcict, yenna-yas: Llah mṣelli εlik a raṣul llah.
Argaz-nni: Ṣalla εlih wa sellem.
Dda Ḥemmu: Qesḍeγ-k-id i nnesba n ṛebbi, a d-it-ffkeḍ yelli-k i Leεmaṛa-w.
Argaz-nni: " yecmumeḥ" Ṛuḥ a Ḥemmu, atan kulci mebṛuk!
Akken yewweḍ wergaz-nni s axxam, yesnejmaε-d akk tawacult-is, arraw-is di kraḍ yid-sen, yelli-s d tmeṭṭut-is, yuγal yenṭeq γef yelli-s, yenna-yas:
Atan a yelli taεzizt, yefka-yam-d ṛebbi argaz lεali yerna wellah ar akken t-yebγa wul-iw, atan ffkiγ -kem i Leεmaṛa mmi-s n Ḥemmu.
Ngum yessuli ameslay, kkren warraw-is di kraḍ γef yiwet n tikkelt, rrfan, ffγen seg wexxam, tezlez tegnit...
Amecwaṛ kan, bdan sawalen-as-d imeddukal-is wa deffir wa i wergaz-nni.
D arraw-is i ten-yeεnan, mmeslayen yid-sen γef wayen yexdem baba-tsen.
Yeffeγ-d s imeddukal-is, yesteqsa-ten dacu bγan, nutni nna-as:
A sidi mačči akka i k-nessen, waqila ḥala arraw-ik i mazal d lefḥul. Amek a t-medleḍ allen-ik γef wayen yedṛan zzman, a t-ffkeḍ yelli-k i lεaṛ yecban wahi? Σni ur tesliḍ ara yettak?
Argaz-nni: Uḥeqq sidna ṛebbi lεalamin d iẓekwan n lejdud-iw ar almi d ayen ssliγ tura. Ihi atan ay irgazen lεali, a d-awen-ibarek ṛebbi yerna lxiṛ-nwen mačči d win zemreγ a t-ttuγ. Ahaw tura yak ur yeqqerṣ uyeddid, ur nγilen waman, ma
d Ḥemmu zṛiγ amek a s-xedmeγ. M´ur d-rriγ ara ttaṛ-iw akken ilaq, a t-sbehdaleγ zdat medden, γas susef-t deg udem-iw!
Azekka-nni kan, yezwer-d dda Ḥemmu tilawin-is di snat zdat-s, d abrid a d-εnun tuṭṭu.
Tilawin-nni bubben-t-d ttεebgat yugaren ayen yettadam uγeṛṛabu-nni yettinigen ger Wihṛan d Alikant ass ideg a d-yeččaṛ d at tṛabandu-nni n Ledzayer.
I w´akken a d-iṛuḥ wemdan seg wexxam n dda Ḥemmu γer win n teslit-is uzekka, yessefk-as a d-iεeddi d tlemmast n tejmeεt.
Akken ssufγen iḍarren-nsen seg wakal n wedrum-nsen, kecmen win n tejmeεt, adrum-nsen, ineggez-d wergaz-nni γef dda Ḥemmu s lexmata, yeγli deg-s s tεekkazt, yekkat-it, yettεeggiḍ fell-as, yeqqar-as:
Σni tγilleḍ-iyi ula d nekk d ṛṛxis am kečč, a win yeğğan aεeṭṭay deg axxam-is? Tebγiḍ ihi a s-ternuḍ yelli d tameṭṭut-is a mmi-s n lḥṛam? WAaaaa nekk &uṛ-iiii, tlata yergazeeeen, rekkben ula d iγyal, kečč tura a γ-tsetleḍ claγem deg yiwen wass a ssalubri!!!
Dda Ḥemmu Yeddegdeg akken ilaq, maca yessuli-d kra n wawalen yenna-yas: Iγyal rekkben akk medden fell-asen a winnat.
Argaz-nni: Arraw-iw mačči d alluy kan i ttalin γef yeεrar-nsen, waaaaaaa d apeyyep i t-nettpeyyipen a ṭṭneh, ma tebγiḍ a t-ẓreḍ ihi.
Seg wass-nni d afella, at taddart akk yes-s i tt-cehhiden wergaz-nni, γuṛ-sen yugar Claus von Stauffenberg di ccan d yise&.
Γas amdan din i d-yekker gar-asen, maca tikkwal iεeṛṛeq-as cced n uyeddid, yettemlil-d wallaγ-is d tindac war ixef.
Amek akka almi γlay wazal n yemdanen-agi yettpeyyipen iγyal, ma d irgazen yettidirin d wiyaḍ neγ tilawin d tiyaḍ d aṭabu?
Lammer a d-yesteqsi wemdan Muḥya dacu yenna, cukkeγ a
d-yini: Aql-i ur ffhimeγ tren, aqeṛṛuy-iw yeqṛeḥ-iyi, ul-iw kif, kif, ssali-t timucuha-agi-nwen a winnat, aneft-iyi a d-ttṣeγ di talwit a ddin qessam!!!!