Tugna( tteṣwira)-agi tettwaṭṭef-d di tzeqqa “Ssaεada/colisé„ ilmend n tmeγra i tessuddes Numidya n Wehran di 1999, d tullin i Dda Muḥend Aεrab Besseεεud.
Wid yellan da, seg uẓelmaḍ ar uyeffus: Salim Buṣbaε, Muḥemmed Yefṣeḥ, Si Muḥ ( acennay), Ǧamal Benεuf, Hewwari Bessay, yiwen si terbaεt n Si Muḥ, Meḥraz Ḥaced.
Yettfelsif
Theḍreḍ i medden f lḥeqq
Lḥeqq mkull wa amek i t-yefhem
Yal yiwen amek i t-yessenṭeq
Yal yiwen amek i t-yessefhem
Kečč ur k-fhimen ara
mkull yiwen amek i yesserwat
Seg-sen ur telliḍ ara
Sellen-ak ala g yir taswaεt
Kra qqaren-as yettfelsif
Kra qqaren-as d ameslub
Semman-ak ur tessineḍ
Semman-ak d bu nniya
I tselbi-k i wumi tselleḍ
Deg wid i k-yecban neεya
mi tekkreḍ ad txedmeḍ leṣlaḥ
Tessneḍ ad tafeḍ irgazen
Teẓriḍ wi yebnan f ṣṣeḥ
Tessneḍ anwi i d irkasen
Tessneḍ ad tṣebreḍ i laẓ
Tessneḍ d acu i d asemmiḍ
A nnger-ik rwu leḥbas
I k-nebna akken ad tceεfeḍ
Tilelli tebna f tilas
Tidak tebγiḍ ad tγeḍleḍ
Tessneḍ a d-tiniḍ awal
Teṭṭixxireḍ-as ad yelḥu
Wid yesselḥayen lecγal
Kkaten azrem s aqerru
Azrem dayen akka d-tenniḍ
Aqerru-s d keččini
Si Muḥ
I d-yuznen asefru-ya akk d tugna d Atlas mmi-s Wemsed