Σli Makur d amyaru, d amedyaz, d aneγmas. Ilul ass n 07/11/1953 (neγ1954) deg At Σisa Mimun -Tizi-Wezzu-. Yemmut ass n 13 Meγres 2002, d bab n 48 iseggasen deg usemmud-ines.
-Yura kra n tmucuha, gar-asent « Ḥmed beṣṣelṭan » i d-yettwaẓergen γur HCA.
- Yura ammud isefra “ Ul yerγan” i d-yeffγen γur teẓrigin « El amal » di tazwara n waggur n Meγres 2002, yemmut ass ideg ara t-yezzenz s ubuddu γer tmedlist « Ccix » n Tizi-Wezzu.
- Yebda tira deg weγmis “ Tamurt-le pays » deg useggas n 1991 s yisem n Σli At Maceγ, ssyen yuγal γer weγmis “Iẓuran” ideg yettaru imagraden yal aggur s yezwel “ tabrat”.
Σli Makur yewwi aṭas warrazen di tfaskiwin n tmedyezt ideg yettekki , ama di tmurt neγ di Merruk. Dda Σli Makur d win yellan d aεḍur n tfekka,yegla-d yes-s si tlalit-ines; maca, taktiwin-ines frefrent, zegrent akin i tlisa, wwḍent anda ur yettaweḍ yiwen!
Yernu werğin yekcim aγerbaz atrar.
Tamawt-agi-ines terza kan aḥric amenzu, mačči yakk ungal “ Timlilit n tγermiwin”; acku werεad yekfi imiren s tira.
Tamawt: Ur yi-yerzi dagi wungal-iw, annect i yi-terza teṣreṭ neγ tmuγli-yagi n Dda Σli.
Ṭṭes di talwit ay ameddakel .
Ğamal Benεuf seg Wehran.
At Σisa Mimun, ass: 31 / 08 / 02
Azul a Mass Ğamal!
Send yal kra, bγiγ ad ssutreγ deg-k asuref imi, aṭas-aya ahat segmi tettrağuḍ tabrat-agi. Maca, ur ak-n-uriγ ara armi d ass-agi. Acu kan ssarameγ ur tuyiseḍ ara. Ayen i yi-yeğğan ur ak-n-uriγ ara, am wakken teḥṣiḍ: deg wezγal-agi, mačči d ayen fessusen γef wemdan i wakken ad yaru, i wakken ad yesmezdi taktiwin-is. Ahat din di Wehran ur tufim ara agnu-yagi, imi d-tezgam γef yilell yesserwalen fell-awen azγal s ubeḥri asemmaḍ i d-yettawi dihin, seg utaram. Wamma nekkni dagi di Tizi-Wezzu, anef kan, si yal tama d timess, ulac tiẓgi tezgel. Ihi, ğğiγ-k ad tessugneḍ tudert deg unebdu di Tizi. Maca, wicqa ( wi yecqa) , imi am wakken qqaren: “ Skud ur nemmut, rrbeḥ ur ifut”.
Dγa ass-agi kan, ulseγ taγuri i tullist-nni i yi-d-teğğiḍ i wakken, a k-n-fkeγ fell-as tamawt-iw. Dγa a k-nemmreγ aṭas γef lettkal tgiḍ deg-i, acu kan, ḥṣu-k-id nekk mačči d amyaru ameqqran, mačči d win ilemden tasekla s tin n tussna. Ayagi d leḥrara i yi-yewwin γur-s, d ulawen-nneγ yeččuren i γ-yewwin γer tira-yagi. S wakka, tikkwal nessenγal-d s wakken nufa, nessenγal-d iḥulfan-nneγ akken d imsariyen. Ihi, ssarameγ ma ccḍeγ di tamawt-iw, a yi-tessurfeḍ.
Tullist-ik a gma Ğamal, γriγ-tt akken yessefk, greγ-as tamawt s telqayt, dγa kkseγ-d deg-s kra n tγawsiwin, amek-itent akken. Akka dγa tamezwarut :
1) Adiwenni n Bba Belgasem yakk d unarag-is :
Am wakken walaγ nekk s timmad-iw, yexreb di taggara-s. Acku, mi t-γγareγ ( t-qqareγ), uγaleγ ur gziγ amek, anwa i d amattar (interlocuteur), anwa i d amaznaw (interlocuter).
2) D agtam ( la description):
Dγa agtam, ama d win n wudmawen, ama d win n twennaṭ. Deg wayen γriγ di tullist-agi, mačči kan drus, maca, zemreγ a d-iniγ ulac-it maḍi. Ur ḥṣiγ i wacu t-tzegleḍ? Ladγa, imi am wakken neḥṣa, yesεa azal ameqqran, yettak tahregt ( inspiration) i imeγri, yesseftay daγen taktiwin, am wakken daγen yessishil tiwwḍin n yizen s imeγri.
3) D amyaru:
Di tazwara n tullist-ik mi tt-γγareγ, ttḥalfiγ amzun d nekk i d-icuhhun tadyant. Dγa ayagi, d ayen i yi-yesskecmen deg-s, yefka-yi-d tahregt yakk d warem ( gout) n tγuri. Maca, cwiṭ kan, yal kra din yerreẓ. Ḥulfeγ tessufγeḍ-iyi-d mi d-tesskecmeḍ iman-ik, mi d-tebdiḍ tcehhuḍ γef yelli-s n weltma-k. Γer yiman-iw ayagi mačči d nekk kan i iceddeγ, maca, ad iceddeγ yakk imeγriyen.
4) Tadyant:
Tullist-ik, ufiγ deg-s kraḍ (3) isental: 1) D Bba Belgasem. 2) D aγerbaz. 3) Taγiwant neγ addad aγarim). Γas ulamma icudd-iten akk welmud aεerbub, maca, di tγara i s i d-tcehhuḍ, ddant ta deffir tayeḍ war assaγ, yekka gar-asent ucerrig.
5) Tutlayt:
Telha, tebrez.
6) Taggara s umata:
Tadyant tgerrez. Mi tt-γγareγ, ḥulfaγ d amezgun i la γγareγ. Dγa lemmer a s-ternuḍ cwiṭ di teγzi, a d-tezg d tamezgunt ara yettwuraren s yiwen usegbar ( monologue) neγ s waṭas, am wakken ara tettwaru.
Ssuref-iyi ay ameddakel ma ccḍeγ di tamawt-agi k-in-fkiγ, d ayagi i d-tefka tmussni-w.
Ur ttfakaγ ara tira n tabrat-agi war buddeγ-ak-in tabγest tameggazt deg iqeddicen-ik s umata γef tmaziγt neγ di tiddukla-nwen Numidya. Tabγest tameggazt yakk d teγzi n tudert i Dda Εebdella. Ttak-as azul annect-ila-t.
Azul fell-ak d imeddukal-ik s umata.
Σli Makur
Village Igounane Ameur
Ait Aissa Mimoun 15640
T-Ouzou.
D tagi i d tansa-w, ttrağuγ tabrat-ik s lḥir d ameqqran.