Γer Iqbayliyen, ulac tagi n usmekti n umili n wabaaḍ. Ur d-ttmektayen ara imezwura amuli-nsen yal aseggwass. Mi steqsan abaaḍ γef ass mi i d-ilul, ad d-yerr s tibura n useggwass: '' Luleγ di Yennayer, luleγ deg učči n ibawen, luleγ deg uḥeggan...''
Nekk luleγ deg unebdu, akken kan i tetteddu Anṣla ad d-tekcem...nettat d timess-is. Akken qqaren , " Luleγ deg wass i yecban ass-a ". D ass kan am wiyaḍ, ur yelli wacu i deg yif ussan-nniḍen. Gar-as akwd wussan nniḍen, ḥaca tamsalt-agi n umuli i yellan!
Ur aad aad yuli was... ata yebda wemcun-nni tiẓẓift-is ... Si yal tamnaṭ ad d-ssawalen akw :" Amuli ameggaz ! " Mi t-serseγ d γa ad d-inṭeq diγent :"Allo... Amuli ammeggaz. Am yefkk Yillew ayen akw yebγa wul-im. "
Heggaγ-d tasfift-nni i d-ssufuγeγ yal asseggwass, seg wass-mi ẓriγ. Mi i d-yenṭeq kan winna i yettiẓifen, as tt-muddeγ : "Ah... tanmirt ! Tanmirt imi d-tessawlem."
Ahat ur d-ittberriḥ ara tikelt nniḍen. Ahat ad ttun wiyaḍ. Am wid yellan ttama-w, am wid ibaaden fell-i. Ad d-ssawalen akw ass-a... d sidi msenher wayeḍ !
Atan diγent ! "Allo, amuli ameggaz a taazzult n setti-s. " Tanmirt a setti ... cedhaγ-kem ".
Wissen ma teẓra !
Aha ... teẓra... wissen kan ma temmekta-d. Amer ufiγ ur tt-id-ismektay ara wass-a, akken iyi-d-ismektay yal aseggwass.
Wagi akw d ssiya n tbalizt-nni tamecṭuḥt ! D acu iyi-bbwin akw ad aẓeγ γur-es. Mecṭuḥeγ, anda walaγ lkaγeḍ fuγef tella tira, ad muddeγ afus-iw γur-es.
Tabalizt akken d taqburt, iḥuzz-itt uaaddi n wussan, ddaw n wussu i tella di texxamt. Kecmeγ kan, rriγ-d taburt! Slaaqel kan, lliγ-tt. Yessefk ad ẓreγ ayen akkw i yellan deg-s! Lekwaγeḍ inaaud uran akw s Tefransist.
Dmeγ-d, yiwen n lkaγeḍ deg ug yura yiwen n yisem. Aaqleγ yiwen n wuṭṭun. Agur deg-s d agur-iw, ass deg-s d ass-iw, aseggwass mači d winn-iw : 1957.
Imeslayen-nniḍen zwaren uṭṭun-nni : Yemmut deg ...
Imken daymi tesseγret akken setti ass-mi d-luleγ! D ayen yekfa fell-as imeṭṭi !! Ass-nni amcum ur d-yettγim ara d ass n imeṭṭi… yuγal d ass s wayes ar ad d-tettmektay talalit… mačči lmut.
Mer ufiγ ad asen-iniγ akw ‘’ Ur yi d-qqaret ara amuli ameggaz, ttxilwet !’’. Maca yenγa-yi uḥezzeb-nni amcum.
Kečč truḥeḍ, teğiḍ-d γer deffir assmekti… xas nebγa ad nettu, lliγ nekk s wayes ad d-ttmektayen ass mi truḥeḍ… Ziγ yal wa d acu i yuran di twenza-s.
Ass-a, nekk lliγ kečč ur telliḍ…
Aha, mačči akka…mačči akka akw!
Kečč telliḍ… Nekk mazal melmi ar ad iliγ …
Tansa …