Tanfalit-agi “yesres awalen γef ideddicen-nneγ» ulac-itt deg teqbaylit, maca tella deg tutlayt tafransist akk d kra n tutlayin nni
ḍen n Tuṛṛuft(Europe). Nekni neqqar: yenna-d ayen i γ-iqeṛḥen. Imussnawen n yiman qqaren dakken i wakken ad yebdu ad yettejji wemdan seg kra n waṭan yuγen iman(esprit) ines, yessefk ad yesres awalen γef aṭan-is, awalen a d-yinin aṭan-is, awalen yis a d-yessegzi aṭan-is i iman-is.Awalen γef udeddic d asurif amenzu deg webrid ar tujjya.
Matub d amejjay n yiman aqbayli neγ d iles n yiman aqbayli ?
Seg zik nḥemmel a s-nsell i Lwennas akken bγun nnan-d wid i t-ittezzmen γef tikli-s. Neḥṣa yezzem iman-is uqbel a t-zzmen wiyaḍ. Netta diγen yeḥṣa yezmer a γ-yesserfu, yezmer a γ-yeqṛeḥ maca ur yekkat ara aγyul ad yettdaray taberda. Yekkat aγyul yettmuqul-it ar wallen.
Yeqqar tidett qeṛṛḥen, tin akken nekṛeh. Yecna assirem-nneγ. Yecna diγen tissirt nndama-nneγ i itteẓẓḍen allaγen-nneγ. Yecna γef JSK i d-yeskanen i wiyaḍ dakken nella; yecna mgal JSK i γ-yessettuyen tid yeḍran yid-neγ. Yecna ul-is, yecna ulawen, yecna tayri yuḍnen ayen yuγen timetti. Yecna γef tayri, yecna mgal tayri. Yecna γef winnat ticki yuklal, ticki yettγaḍ, yecna mgal winnat ticki yecceḍ, ticki yeswa seg ubuqal n lbaṭel. Winnat mači yiwen kan. Yecna γef tinnat ticki tuklal, ticki tettγaḍ..mmmmmm lemmer skud yella, ili ulayγer a wen-d-iniγ dacu a d-yecnu fell-as. Yecna γef ṛebbi, yecna mgal ṛebbi. Yecna γef Lezzayer, targit n wid yessuffγen Fṛansa timsehrest, yecna mgal Lezzayer tin yeskuffren tilelli tin yeğğan win yefkan idamen-is fell-as yettγiḍ.
Yecna γef yemma-s, yecna γef tyemmatin-nneγ akken ma llant. Yecna γef tirga-nsent yeffγen mxalfa. Yecna γef baba-s, yecna γef ibabaten-nneγ akken ma llan.
Yecna γef idurar, yecna γef izuγar, yezzem at idurar, yezzem at izuγar. N at Yiraten, n Tqubaεin neγ n at Ziki, n iḥerqan n Weqbu neγ n Swaḥel n Bgayet, Lwennas yuγal-asen d iles s a d-inin ayen i ten-iqeṛḥen akk d wayen deg ẓerren assirem-nsen.
Lwennas werğin yeẓra iman-is d nnbi neγ d amejjay, ur yeẓri ara iman-is d amazzan neγ imceyyeε n yellu maca d amazzan n wegdud, d iles n wegdud.
Amejjay n wegdud d agdud s yiman-is. Matub Lwennas yella-yas d iles. Iles yesrusun awalen γef ideddicen-is.
At tneslemt tasertant akk d wid i ten-id-yeslulen, at udabu, kukran tazwara a s-gezmen iles-is i wegdud aqbayli s tmenγiwt n Lwennas, ugaden a d-yesseγres. Irebraben n at tneslemt tasertant kukran a t-nγen uma γas ṭṭfen-t gar ifassen-nsen. At udabu kukran a t-nγen ma γas fessus fell-asen a t-ṭṭfen. Maca ass mi i yufan zemren ad ssenṭḍen timenγiwt-is i wid yellan d ayla-s, ur ḥezzben ara, nγan-t, gezmen-as iles-is i wegdud aqbayli.
Ma γas ḥṣiγ ur d-yezgi ara ahat wannect-a i yal amdan, tikkwal ẓerreγ awalen n Matub d asafar γef ideddicen n yal amdan. Agguren-agi yezrin sεeddaγ kra n tegnatin yessawnen deg tudert-iw akken zerrint γef kra yellan d amdan tikkelt tikkelt deg tudert-is. Ḥemmleγ aẓawan s umata. Maca akken tebγu tili tezlit, deg tegnit-agi, ur s-ufiγ ara tiẓeṭ akken am zik. Ttafeγ-tt tewgeg(tebεed) γef ayen ttidireγ. Sliman Azem d amezruy, mači d tasuta-w. Lewnis d timeẓriwt lqayen yessawalen aṭas i wallaγ, netta allaγ yeḥwağ aεbaṛ, nekk lbaṛud yekfa-yi. Idir d tihuski n uẓawan akk d thuski n tugniwin(images), tagnit berriken ur tessiẓiḍ ara tugna i icebḥen.
Ihi rriγ-tt kan i tmesliwt n tezlatin n Lwennas. Ufiγ iman-iw am akken ḍelluγ awalen i ideddicen-iw. Ihi atan wansi i d-yekka weḍris-agi. Matub mači d amejjay maca d iles n umuḍin i yeḥwağ umejjay akken ad yessejji amuḍin. Tikkwal amejjay n wemdan d amdan-nni s timmad-is ticki yessaweḍ ad yesres awalen γef ideddicen-is.
“Nwala nεemmed neẓra, neḥḍer nugad nessusem, ajenwi aqdim yeḥfa, ur yelli win a t-yesmesden. Agdud ur nefriẓ lehna, s yiles-is ma ur t-id-yenna ‘ra, ad yecrew tidi meṛṛiγen …(Matub)»
winna