Macahu, Ahu, Rebbi a tt-iselhu, Ad tt-id-yawi d asaru.
Nanna yella yiwen n wergaz deg yiwet n taddart, ayen din i yelmed, yeγra, d amusnaw !
Argaz ameγbun, ksed acu ur yelmid ara, akkenni, yarnu ur yufi amkan anda ar a yeqdec, ad d-issekcem adrim γef yiman-is am netta, am medden.
Netta yuγ lḥal deg taddart-nni-nsen saan ccix. Ccix-nni, mi d-iruḥ γur-es yiwen as-d-yeḥku tilufa i yeḍran yid-es, as d-iḍeqqer awal neγ sin, dγa amdan-nni
as-yefk i ccix idrimen. I yebγun iḥku-t-id, medden ttamnen-t.
Yibbwas ikker wergaz-nni amusnaw, iruḥ γer ccix-nni inna-yas a ccix, ttxil-ek m'ur yi-d-tenniḍ amek armi nekk s wayen akkw sneγ gummaγ ad d-afeγ leqdic
i yiman-iw, kecč ur teγriḍ ur yelli, tejemεaḍ-d idrimen yal ass !
Inna-yas ccix-nni :''Nniγ-ak a mmi, xember tεic !!''
Inṭeq-ed wergaz-nni inna-yas amek akka ? Inna-yas ccix-nni :''Xember tεic! D aya !''
Ikker wergaz-nni iruḥ... Hattan hattan, ussan ttεaddin, armi d yibbwas, iteddu wergaz-nni deg yiwen n webrid iwala aγyul yemmut !
Iṭṭef amek ixdem, yaεna yeγza axemmuj, imḍel aγyul-nni dinna. Ikker at-ireddem s wakal.
Iεdda-d yiwen s yinna iwala-t-id. Isteqsa-t :'' A winna-t acu akka yeḍran dagi ani ? ''
Inna-yas wergaz-nni amusnaw: " A susem kan! Tedduγ deg webrid-agi, armi i d-ufiγ snat n lmalaykat a ttnaγent !
Yiwet deg sent tenγa tayeḍ. A tt-meṭṭleγ tura! ''
Ih ih i s-yenna wemsebrid-nni ! Idda d webrid-is, win i d-yemmuger yules-as!
Amusnaw-nni yedha kan d temḍelt-nni, akken isellek, yaεna a yessalay taqubbet !
Ad d-ttaddin medden, a t-steqsayen : '' A winna-t acu akka yellan dagi?
Dγa asen-yini :'' Kkiγ-d s ya, armi i d-ufiγ snat n lmalaykat a ttemεbbarent ! Yiwet deg sent tenγa tayeḍ. Meḍleγ-tt, tura as-geγ taqubbett! ''
Akken akken, immeγ akw wawal !! Kkes-ed anda ur slin ara s lmalaykat i yemmuten, i yesεan taqubbett!
Akken i ysellek taqubbett-nni, ata ad t-id ttawḍen medden s yal tamnaṭ, ad zuren taqubbett, ad fken lwεda γef lmalaykat, ad awin lbaraka!
Ccix-nni n taddart, yegwra-d ula d yiwen ur yettruḥu γur-es, acku beddlen-t akw medden s tqubbett n lmalaykat !
Yibbwass iruḥ-ed γer wergaz-nni amusnaw yenna-yas: ''A mmi di lεnaya-k m' ur yi-d-tenniḍ! Amek ani txedmeḍ armi ssawḍen medden γer
γur-ek i d-ttruḥun ad ẓren taqubbett-agi? ''
Iḥekker-it wergaz-nni yenna-yas :'' A ccix... Xember tεic !''
Dγa yenna-yas ccix-nni :'' Amek !? Amek akka dγa tufiḍ-d lmalaykat dagi a ttnaγent !! Tmeḍleḍ yiwet ? D lekdeb akw ! ''
Iḥekker-it umusnaw-nni inna-yas: '' A ccix ! Aḥq baba-k u jeddi-k ! ar d aγyul i ymeḍlen dagi !''
Tamacahutt-iw truḥ asif asif, wid i s-iḥedren awer iεedda fell-asen lḥif !
Tansa