Deg yiwet n taddart yella yiwen uxxam yemgarad γef wiyaḍ acku yettwazdeγ. Iεeggalen-is ur d-wwin ara s lexbar almi d asmi i sen-d-teḍra yiwet n tedyant.
yiwen wass, mi yezgen yiḍ, nutni yuγ lḥal teγder-iten tnafa, rejrejren-d s yiwen n ṣṣut yejεarayen. Iẓra γellin-d d abruri γef uxxam, dγa ffγen-d s lemγawla, ur ugaden ifeddixen. Ufan-d afrag yeččur d iblaḍen d twedcin. Wehmen ansi d-yekka wanecta ! azekka-nni taddart akk tesla, ussan-d d tirni, wehmen deg wayen walan. Gan tiwizi, sazedgen akk axxam.
Iḍ wis sin rrebrab yeγli-d γef uxxam, lḥal iεedda nutni werεad ṭṭisen. Yiwen uγeggal, ifud, yeṭṭef abuqal deg ufus-is maca, yugad ad yeffeγ a d-yawi aman acku tacercurt deg ufrag i tella. cwiî akka, iluεa-t-id yiwen s deffir, yenna-yas-d: serreḥ-as i ubuqal a k-d-yawi aman. S tergagayt, iserreḥ-as, dγa abuqal ileḥḥu waḥd-s ar berra….
D tigi i d kra n tedyanin ger waṭas i d-yeḍran deg uxxam zedγen yemdanen d yewkilen deg yiwen wakud