Tazwart
Wid wukud (lwaḥid) a tedduklem :
- Lḥusin, d argaz alemmas n tmurt imesdurar; issen-as i wakal, i wuzzal, i wawal
- Azwaw, d mmi-s n Lḥusin, ixeddem netta d baba-s; d netta i d-iḥekkun tadyant,
- Belεid d gma-s n Lḥusin,
- Lmulud, Ḥemmu, Wecrif, d iεessasen n taddart,
- Tasaεdit,
- Ṭimuc,
- Mḥend aderwic
- …
Ma d tariḥt ujeğğig n magu, tizzegzewt n tegnawt, ṣut n webẓiẓ deg wagur n γwect, tesmeḍ n wegris akiwan, tagut ubaṛud iḥman, teqseḥ n wedfel n tizi, temlel n taffza n tefsut, aγilif n wid inḥafen, asirem uzekka…a ten tafem γer zdat !
1
Iṭij yewḍ-ed γef temḍert-nni taneggarut nnig terga. Yella deg wawal, tasmuḍi n tsebḥit tessishil axeddim ugar. Aqabac ikker-as i wakal, yuγ-ed aḍref nnig wayeḍ. Mi yuli s igenni uqabac-nni, ad d-inṭeṛ, syen ad intu deg wakal, ad d-ikkes tissi-s. Tikwal ad izzi din kan γer igenni i tyita tis snat, tikwal ad d-ijreḍ akal zun d tagwersa akken ad iglu s udernu n wakal γer tama wadda, akken ad yeṛẓ aḍref.
Si tmuγli ugemmaḍ, aqabac-nni ittban-ed zun d yiwen netta d wemdan-nni i t-iṭṭfen ger ifassen-is. Afus uqabac, ifassen n wemdan-nni akw d iḍarren-nni irekklen deg wakal uγalen d yiwen, dduklen.
Win iqerben γer wemkan-nni n nqec, izmer ad isel, tikwal, i ṣut-nni d-iggar wemdan-nni, yal tikkelt a yentu ugelzim deg wakal: “eḥḥḥ ! eḥḥ ! “. Ma si lbaεd, win isneqden tamuγli, ad iẓer kan lexyal yettali yettader, amdan ikennu, aqabac inettu. Ula d iḍarren, teddun tardast tardast d tidist, deg weḍref, mar ad d-ikkes yic n wuzzal deg wakal. Akken a teẓreḍ iteddu d tidist, ilaq-ak a tqerneḍ lexyal-nni γer tneqlett yeğğa γer deffir, neγ tin wuγur iteddu γer zdat.
Iṭij yewḍ-ed amkan-nni n nqec. Tiyita uqabac tebda tfeccel. Argaz, γas ifassen xeddmen, netta idha netta akk d yiman-is, idha netta wallaγ-is : « axeddim ṣbeḥ i tasmuḍi”. isers aqabac, icrew tidi deg wenyir-is, syen yuγa γer tyita, am akken yebda segmi yuli wass. Ibγa ad isgunfu maca ur s-ifka wul-is ad isgunfu. Ihuz kan aqerru-s, yenna I yixf-is: “lemmer d amkan n tyuga tili sin neγ tlata wussan kan ad d-εeddiγ deg-s ; maca tayuga ur tezmir i wemkan-a. Assa aqlaγ neffeγ γef turdas n wakal ubuṛen akken a tent-id-nerr d igran, nni yiγil-nneγ. Nuγal-as i nqec deg unebdu. »
Aḍref aḍref, argaz ittali asawen, deffir-es tebrek n wakal d-iqelben simmal tettihriw. UR d-iğğa ugzir γer deffir. Iban, afus uneqqac-nni d amusnaw.
Win t-id-iẓran akkin seg ugemmaḍ, ad inwu ddaw n tsufa i yella ineqqec wergaz-nni. S teγzef akw d lεali n tsufa-nni tessa-d akw tili i tama ufella n tferka.
Win issnen amkan-nni deg ineqqec wergaz-nni, ad iẓer ur yellid iger, ur yelli d tamazirt. D amkan n tkessawt d ubelluḍ werğin yenγec, werğin tekka deg-s tgwersa n tyuga. D akal ibuṛen i wumi yekker s uqabac, acḥal n wussan aya, qbel aman n lexṛif.
Argaz-nni yebγa ad isgunfu, netta ur as-ifka wul-is ad isgunfu. Ibγa ad irnu kra iḍerfan akken ad iqerreb γer tili n tsufa-nni ufella. Ayen d-irna, d ayen d-ikksen i teẓgi ubelluḍ. Idda-yas i uqabac yiwet yiwet akken i yas-iteddu i tyita n wuzzal d tḥanutt-is. Ur ittcuddu yara ifassen-is γef ufus uqabac neγ n wefḍis. D lebda iqqar-as: “efk-as llew !”; yal tikkelt a yesselmed yiwen nniḍen, “ur teqqen ara ifassen-ik γef ufus n wesγar ! »…