Anaγmas d amaγnas n tidett, d inigi > Imyura

| | |

Anaγmas d amaγnas n tidett, d inigi

Abdelkader Sallat yella d « procureur » n wexxam n teγdemt n Medea gar 1979 akk d 1984, sinna yuγal d imḍebber n useddu n leḥbas gar 1984 akk 1986. Yuγal ar deqqal d imḍebber n twuriyin tiγermatin(affaires civiles) deg teγlaft(ministère) n teγdemt(justice), gar 1986 d 1988.

Ma ad imuqel yiwen ansi akk i d-yekka wemdan-agi seg useggas 1979, ad yaf d akken d netta i ijebden imurar n wayen i yeḍran i iqbayliyen deg leḥbus n Lezzayer. Isbedd-it-id Caddli akken ad yekres tiyersi i yezwawen neγ i «zwawa » akken i sen-yeqqar netta imi aẓar-is seg Belεebbas. Win yekkren ar wayeḍ a s-yini : “ad uγalent a k-d-keflent ay amcum !» Arezqi Ait Larbi yeskefl-as-tent-id deg useggas 1994 deg uγmis «Evénement »(Uṭṭun 162 – Imalas n 2 ar 8 deg Ibrir 1994)

Imdukkal akk d watmaten n Abdelkader Sallat llan deg udabu ur t-ffiγen ara. Taγdemt n udabu gar ifassen n imdukkal-is i tella. Γedmen γef Urezqi Ait Larbi war ma nnan i yiwen. Lkarṭa ssuffγen-as-tt-id, ṭṭfen-tt γur-sen, am imyuraren n «Pocker », a d-yaweḍ wakud ticki a tt-id-ssuffγen. Rğan armi d aseggas n 2006(sin igima d sḍis) akken a s-gedlen tuffγa seg Lezzayer.

Qeṛṛiḥet tidett ticki ẓẓayet s ttbut.

5 deg Yulyu n useggas 1985, ṭṭfen imsulta n udabu 22 n yemdanen i yettikkin deg tidukkla n warraw n imeγrasen(martyrs), tin i yeffγen afus i udabu, akk d imaγnasen n izerfan n wemdan gar-asen izerfan n yedles akk d tutlayt, tagi dγa swayes i nesxerbubuc akka dagi. Gar wid akken ṭṭfen yella Uṛezqi Ait Larbi.

Bedden zdat n uzazraf n Medea gar wass 15 akk d 19 deg Dujembeṛ. Γedmen γef 22 yid-sen s tkurmut gar 3 iseggasen d 6 wayyuren :

Arezqi Ait-Larbi (3 iseggasen n tkurmut),
Arezqi Abbut (3 iseggasen n tkurmut),
Ferḥat M'henni (3 iseggasen n tkurmut),

Saïd Sadi (3 iseggasen n tkurmut),
Saïd Doumane (3 iseggasen n tkurmut).

Ali Fawzi Rebaεin (3 iseggasen n tkurmut),
Racid Fennun (2 iseggasen n tkurmut),
Qeddur Arrous (2 iseggasen n tkurmut),
Hacmi Nait Djoudi (2 iseggasen n tkurmut).
Belqasem Adjroud (18 wayyuren n tkurmut).
Maamar Benaoucha (1 useggas n tkurmut).
Nurdin Ait-Hamouda (11 wayyuren n tkurmut),
Rabaḥ Benchikhoune (11 wayyuren n tkurmut),
Naseṛ Babouche (11 wayyuren n tkurmut),
Abdenur Ali-Yahia (11 wayyuren n tkurmut),
Muqran Ait-Larbi (11 wayyuren n tkurmut).
Aḥmed Mekaoucha (10 wayyuren n tkurmut),
Hazerci Bouzid (10 wayyuren n tkurmut),
Feṭṭuma Ouzegane (10 wayyuren n tkurmut).
Amar Mokrani (6 wayyuren n tkurmut),
Bujemεa Iguernelala (6 wayyuren n tkurmut),
Muḥand Ferhi (6 wayyuren n tkurmut).

Tulmatin Ali (???)
Xuğa Gaεfar (???)

Muqran Chemime (serrḥen-as-d).

Gar-asen akken d-nniγ yakan yella win a sen-tent-id-yeskeflen, yella Urezqi Ait Larbi. Yesεedda azal n sin iseggasen deg tkurmut n Taẓult Lambiz, yeẓra ayen ur iqebbel wallaγ, iεedda fell-as lbaṭel akken iεedda γef wiyaḍ. Wid yettḍebbiren γef tkurmut, wid yettḍebbiren γef tkurmutin, ar uqeṛṛu-nsen d Abdelkader Sallat, ggulen ar d-ssuffγen qeḍran seg wallen n warraw n Yugurten. Ass amenzu deg i wwḍen ar Taẓult muggren-ten-id wat terbaεt n umager s tqezlin n wuzzal. Feṛḥat M’henni rẓan-as iγessan n yinzer-is. Yeẓra Ameẓyan M’henni(ad yesgunfu deg talwit) yusa-d, 14 iseggasen deg tudert-is kan, ur t-ğğan ara ad isel i imeslayen n baba-s, zgan keccmen gar-as akk d baba-s akken ur t-iẓer ur s-isell. Yeẓra ass mi Abbut Arezqi kksen-as εeryan rran-t ar uderbuz imi i yemmeslay s teqbaylit akk d twacult-is i d-yusan a t-yeẓren. Yeẓra imi gedlen i imeḥbas ad mmeslayen taqbaylit akk twaculin-nsen. Yeẓra Uharun, izem deg isersen ayen ur yezmir ad yawi wallaγ armi i t-yeffeγ armi i sen-t-id-ttawin d amedya n wayen izemren ad yeḍrun yid-sen nutni s wid d-yewwḍen d ineggura. Qqaren-asen: “Muqlet Uharun, ma ur terkidem ara akka-hin a wen-teḍru !”

Yeẓṛa takurmut i s-d-irewlen i tallit talemmast( moyen âge). Yeẓra wid yeṭṭfen deg twuri-nsen, ama deg tallit n tehrest tafṛansiwt ama deg tallit n tehrest tamseεṛabt. Iḍelli s yisem n “ukulun” ass-a s yiwem n “ukulunil”.

Deg 7 deg Meγres n useggas 1987, yura tabṛatt i Xeṛṛubi, yenna-yas ayen yeẓṛa, ayen i εeddan γef mmi-s n teqbaylit. Tabṛatt-nni tewweḍ anda wwḍent akk tebṛatin iεeddan, anda wwḍent tid akken yura Dda Lmulud γef uzref n tutlayt tamaziγt.

Ayen iεeddan γef twenza, wa fell-as yecfu, wayeḍ iteddeb itettu. Ttaṛ-nsen ttarran-t-id ass-agi, wa d inigi γef tidett, d anaγmas n tidett, wayeḍ d asertan n tifrat, yettnadi abrid yettawin s anda ur yettuγal wemdan ur yettuγal weqbayli ad yidir ayen yedder netta deg Taẓult Llambiz, wayeḍ nniḍen akken nniḍen…Yal yiwen yettnaγ s wemrig umi yessen, yal yiwen yettnaγ γef wid izemren a s-d-fkken afus, yettnaγ akk d wid izemren a s-d-fkken tayett.

Aceqṛew

Arezqi Ait Larbi yeceqṛew Abdelkader Sallat a d-yass a t-id-iqabel deg wexxam n teγdemt, maca yir amdan yekkat s leγdeṛ yettuγal timendeffirt.

winna

Asabter yellan deffir wa | Asabter n zdat

Tansa_Tilelli - Tinin-is...
ttir areqman - Tinin-is...
- Tinin-is...
Winna - Tinin-is...
- Tinin-is...
Tamazight - Tinin-is...
Tamazight - Tinin-is...
djamal.B - Tinin-is...

Azul fell-awen.
“Lbaṭel ma iɛedda tilas amesbaṭli ass-is a d-yas”.
Tanemmirt a gma-tneɣ Winna ɣef weḍris-agi i ɣ-d-tewwiḍ. S tidet kan teccarrew tfekka-w imi ɣriɣ aḍris-a. Taluft-a nezmer a –d-nekkes seg-s snat n temsirin, seg yiwet tama: Ɣas negren idinuẓuren, maca, iwaɣezniwen-agi yecban Ɛebdelqader-agi akk d wid yellan am netta ( yernu ttuqten), werǧin negren neɣ ad negren di tmurt-nneɣ, imi werɛad-iten ddren ar ass-a, ar azekka, alamma tenger ddunit. Yernu ttemɣayen-d am igersalen, ccetla-nsen tecba ccluc neɣ akuz alamma tessenger azegzaw d uquran. Si tama nniḍen: Skud llan yemdanen ( Irgazen d tulawin) yecban gma-tneɣ Areẓqi At Lɛerbi d wid i t-yecban i ugin ad knun zdat uzaglu n meḥyaf, n ddel d lbaṭel n at udabu amasbaṭli at ikaskiḍen neɣ n leḥkem n at tmira .. yes-sen kan i nettwali tafat, yes-sen kan i yettimɣur usirem-nneɣ, yes-sen kan i nlemmed tirrugza, yes-sen kan i nettawi lewhi, wamag yili kkawen ifadden-nneɣ, yili ad nefk mayna..
Anwi deg-neɣ ur necfi ɣef tigawt n tissas d yiseɣ n Areẓqi At Lɛerbi, ɣef wasmi akken i ḥman tafḍist iseneslmen ( at ičumar) akka am ƐLi Benlḥaǧ i yeqqaren “ Yessefk lǧihad, yessefk a d-neslulli Lqeds seg ifassen n wudayen”; dɣa yerra-yas-d netta ( Areẓqi) akk deg yeɣmisen “ Zwir kečč d amenzu ɣer Falaṣṭin, u ma tezwareḍ kečč, nekk ad iliɣ d wis-sin”. Acku yeẓra ɣef iqerray-nneɣ nekkni kan i tt-undin, lebda d nekkni ay d asfel-nsen, wamag nutni ttṣrefiqen kan i win ara iceḍḥen.
Tegra-d kan a s-iniɣ i gma-tneɣ Areẓqi At Lɛerbi: “ Aql-aɣ s idis-ik.
I kra n win d tin I ibedden s idis-is deg taluft-agi, a sen-iniɣ” Ayuz ay imulal”
Tanemmirt.
•Ad farṣeɣ tagnit-agi i yi-d-yettunefken akken a d-wwteɣ s leqseḥ deg leḥkem “ Amexzani” di Lmerruk ilmend n tizzeɣzeɣt akk d udebbuz n lbaṭel i ssqedcen mgal imeɣnasen n tmaziɣt, ladɣa inelmaden n tesdawiyin I yettekkin deg yermad n tefsut Imaziɣen.
Ǧamal.

djamal.B - Tinin-is...

Tekki da akken a d-tiniḍ kra neγ kra.