1-2 Maγres 1980 : Tadiwennit (interview) n Mulud MΣEMRI deg uγmis « Libération ». Yewwi-d awal γef udlis-is aneggaru « Isefra n Leqbayel iqburen ».
9 Maγres 1980 : Inelmaden n tesdawin n Tizi Wezzu swejden-d asarag n Mulud MΣEMRI, ara d-yemmeslayen γef udlis-is aneggaru « Isefra n Leqbayel iqburen ».
10 Maγres 1980 : Asarag n Mulud MΣEMRI yemmegdel (interdit) si tama n udabu. Imi deg ubrid-is ar Tizi Wezzu, mi d-yewweḍ ar Draε Ben Xedda εusen-t-id Iğedermiyen, wwin-t γer lwali i s-yennan « mačči d lawan n usarag-agi imi ayagi d ayen izemren a d-yeglu s cwal » Ayagi yesserfa inelmaden
11 Maγres 1980 : Deg 1700 inelmaden n tesdawit n Tizi wezzu, 1500 deg-sen i d-yeffγen s iberdan n temdint. Azal n snat n tsaεtin nutni d asuγu zdat n uxxam n lwilaya " Ala i tizzeγzeγt tadelsant" (non à la repression culturelle), « Neεya di maḥyaf ». « Idles Amaziγ d idles Azzayri », « Tamaziγt d tutlayt-nneγ », « Imaziγen a nerreẓ wala a neknu ». D amussu d-ilulen berra i tamiwin akk tisartiyin,
12 Maγres 1980 : Inelmaden n tesnawit (lycéens) n Tizi wezzu γunzan aγerbaz, rnan ṣṣut-nsen γer win n yesdawanen n Tizi Wezzu.
13 Maγres 1980 : Akabar n iγalen inemlayen (FFS) ibeggen-d ibeddi-ines γer tama n yesdawanen n Tizi Wezzu s ussuffeγ n kra n wulγuyen « Tugdut, tilelli n umeslay », « Idles aγerfan d idles aγelnaw ». Amussu iḥuza tugett n temnaḍin n leqbayel yecban Larbεa n At Yiraten anda d-ffγen gan tameskant. qelεen-d kra n tfelwit yuran s tutlayt n taεrabt. Tirza n uselway n tmurt Cadli ar Tizi Wezzu, rran-tt ger rrif γef tmentilt n cwal yellan dinna. Lwali n Tizi Wezzu n lawan-nni Sidi Saεid yessawel-d i inemhalen n iγerbazen d yeγsuren (instituts) n tesdawit n TIzi Wezzu, anda dγa d-yemmeslay uselway n uγsur n tineslemt. Yenna-yas « Amer d nek i d lwali nni iεeddan tili sastiγ s ressas γef imesbaniyen… »
15 Maγres 1980 : Asbeddi n yiwen usqamu di Lpari ara yewten γef yizerfan idelsanen di tmurt n Lezzayer (CDDCA)
16 Maγres 1980 : Di tmaneγt, ugar n 200 n yesdawanen i d-yeffγen, lḥan deg ubrid n Larbi Ben MHIDI alamma d Lbusṭa tameqrant. Ttsuγun « Tamaziγt d tutlayt taγelnawt». Tameskant ur tεeṭṭel ara armi d-ẓedmen yemṣulṭa fell-asen, wwin deg-sen azal n 40 n medden, 5 deg-sen ṭṭfen-ten dinna, ur sen-d-serḥen ara.
18 Maγres 1980: Tirza n lwali ar Iεeẓẓegen Ayen d-yeskren cwal meqqren. Imezdaγ, inelmaden n yal aswir ffγen-d qeflen iberdan, d yessekcamen γer tmedint, ẓedmen γef uxxam n yemṣulṭa d uxxam n ukabar awḥid n lawa-nni (FLN), rẓan akk ayen yellan dinna. Dγa lwali yuγal deg ubrid ur d-ikemmel ara.
Di Σin El Ḥemmam, ixeddamen, inelmaden, ffγen-d ar iberdan deg yiwet n tmeskant tameqqrant i ubeggen ibeddi-nsen γer tama n yesdawanen n Tizi Wezzu. Akken ula d Draε El Mizan anda ṭṭfen azal n 70 n medden. Adabu yesseqwa-d lḥers γef tmurt n Leqbayel s uceggeε n yemṣulṭa d iserdasen n lεesker.
20 Maγres 1980 : Aγmis n El Moudjahed, s yisem n Kamal Belkasem, i tikkelt tamenzut yura-d γef tedyanin iḥuzan tamnaṭ n Leqbayel deg yiwen umagrad iwumi isemma « wid yettaken timsirin » (les donneurs de leçons). Anda d-yewwet deg umeγras, ameyaru, anegmay Mulud MΣEMRI.
26 Maγres 1980 : Azal n agim (1000) n inelmaden i d-yeffγen γer iberdan n Tizi Wezzu deg yiwet n tmeskant s wazal-is. Imsulṭa ur d-giren iman-nsen.
30 Maγres 1980 : Tameγra n Ait Menguellat, tella-d di Lpari di tzeqqa mi qqaren (Porte de Pentin), Asqamu yekkaten γef yizerfan n idelsanen (CDDCA), ifureṣ tagnitt, yegr-d tiγri γer yiwen unejmuε zdat uxxam lkunsila di Fransa.
6 Yebrir 1980 : Yiwen unejmuε amatu deg Iḥesnawen (Tizi Wezzu) anda d-ssawlen γer yiwet n tmeskant i wass n 7 Yebrir γer Lezzayer tamaneγt.
7 Yebrir 1980 : Γef 10 n sbaḥ, deg umḍiq n umenzu Magu, di tmaneγt ugar n 500 medden i igan agraw i usiwel γer lmeqdra n yizerfan n yedles Amaziγ. Deg ssenğaqat d-wwin, uran « Idles aγerfan», « Tilelli n wawal », « Tamaziγt, aεni mačči d tutlayt Tazzayrit ? », « Tugdur n yedles ». ṣṣut-nsen yebbaεzeq di tmaneγt s ccna aγelnaw « min ğibalina ṭṭalaε ṣṣawt el ahrar ..» (Deg idurar-nneγ i d-yuli ṣṣut n tlelli…). Iγallen n laman, zzin-d akk i yimesbaniyen degmi yebda umḥarek. Azal n snat n tsaεtin kan ẓedmen fell-asen s tyitwin. Wwin deg-sen 200 medden γer lḥebs. Acḥal deg-sen i yettwajerḥen, 5 deg-sen kecmen di lkuma, yiwen deg-sen yemmut. Asunded dinna kan yebda di tesdawit n Lezzayer. Tasdawit n Tizi Wezzu tettwakref. Γef 11 n sbaḥ, yiwen unejmuε n inelmaden n tesdawit talemmast di tmaneγt, swejden-d tameskant ara iruḥen γer uxxam n yemṣulṭa, ideg ara d-begnen lγiḍ-nsen mgal tizzeγzeγt n udabu.
Γef 3 n tmeddit, yiwen unejmuε nniḍen, yella-d zdat uxxam n lkunisla n Lezzayer di tmurt n Fransa. Maca imḍebren n dinna ur d-yeffiγen ara γur-sen. Dinna kan furṣen tagnitt uran-d tabratt i uselway Cadli ideg setenyan akk wid yellan deg unejmuε-nni.
8 Yebrir 1980 : Di tmaneγt, azal n agim (1000) n inelmaden i d-yeffγen deg yiwet n tmeskant, ideg ttsuγun « Imsulṭa iqettalen », « Ala i tizzeγzeγt », « Serḥet-d i yimeḥbas », « Idles aγerfan d ideles Azzayri». Imsulṭa zzin-asen-d i yimesbaniyen di yal tama, ayen yeğğan amussu ad yimγur ugar. Azal n snat n tsaεtin, nutni d tikli, d usuγu deg yiberdan n tmanaγt. Tugti n wid yettwaṭṭfen, serḥen-asen-d.
Imesdurar n tudrin n Leqbayel, Iεeẓẓugen, Σin El Ḥemmam, Larbεa n At Yiraten, ulin-d γer Tizi Wezzu. Lεesker yeqfel tugti n iberdan yessekcamen γer temdint.
Amussu, yettimγur, tasdawit n Bumerdes tettwakref, i ubeggen n ibeddi-nsen ar yidis n inelmaden n Tizi Wezzu d wid n tesdawit talemmsat.
9 Yebrir 1980 : Amussu iḥuza akk timnaḍin n Leqbayel, At yani, Iwaḍiyen, Lğemεa n Sariğ, Delles, Burğ Mnayel, Sidi Σic, inelmaden, ixeddamen, imezdaγ ffγen-d s iberdan i usuter n uzref n yedles Amaziγ di tmurt n Lezzayer. Tameγra n ccna n Ferhat Imaziγen di Sidi Σic tettwgdel s ufus n yemḍebren n tama-nni.
10 Yebrir 1980 : Asbeddi n yiwen usqamu ara d-yelhin s yizerfan n yinelmaden d yesdawanen iγunzan acḥal aγerbaz.
11 Yebrir 1980 : Tiririt n Mulud MΣEMRI i umagrad (wid yettaken timsirin) d-yura Mulud Belkasem deg uγmis n El Moudjahed. Aneggaru-yagi iγunza amagrad n Mulud MΣEMRI, deg uγmis n LE MATIN i t-id-seddan.
13 Yebrir 1980 : Tamagla (délégation) n yiselmaden n tesdawit n Tizi Wezzu, terza γer uneγlaf n walmud aεlayan, anda mmeslayen yid-s γef liḥala n inelmaden.
Asunded (grève) di tesnawit n Aεmiruc n Tizi Wezzu. Ixeddamen n sbiṭar n Tizi Wezzu uznen-d yiwet n tebratt n temsetla (solidarité) i yinelmaden n Tizi Wezzu. Tayeḍ uznen-tt i uselway n tigduda anda s-ssutren aḥbas n tizzeγzeγt d lmenker d-iḍerrun γef yesdawanen d imezdaγ n tmurt n Leqbayel s umata.
15 Yebrir 1980 : Asqamu (CDDCA) iqedcen di Lpari, yessawel γer snat tmeskanin s talwit, tamenzut i wass n 26 Yebrir ar zdat uxxam n lkunsila n tmurt n Lzzayer yellan di Fransa ma d tis snat i wass n umenzu Magu deg iberdan « les filles du clavaires di la bastille ».
16 Yebrir 1980 : Asunded amatu (grève générale) iḥuza akk timnaḍin n tmurt n Leqbayel . Acennay ameqran Ferhat Imaziγen Imula di lawan mi d-yekcem s anafag di Dar El Beydha yettwaḥweṣ. Aneγlaf n walmud aεlayan, yendeh-d γer tuγalin ar walmud i wass n 19 Yebrir. Tameddit n wass, yiwen n lejmaε i d-yesduklen ixeddamen n sbiṭarat, wid n SNELGAZ, SONELEC, CASORAL, SONITEC, isdawanen d inelmaden n tesnawit sbedden-d yiwen usqamu aγerfan ara ibedden zdat n tezγent (crise) i tettidir tmurt n Leqbayel.
18 Yebrir 1980 : Yiwen unejmuε zdat n uxxam n lkunsila di tmaneγt Ottawa i ubeggen n lγiḍ-nsen mgal ayen iḍerrun di tmurt n Leqbayel.
19 Yebrir 1980 : yiwen unejmuε n inelmaden d iselmaden, gezmen-tt d rray d akken ad kemlen tawaṭfa n tesdawit (occupation de l’université).
20 Yebrir 1980 : Γef lweḥda n sbaḥ (1 :00h), imsulṭa zedmen s trabuzin d yeqjan γef iγaramen n yesdawanen (cités universitaires), γef sbiṭar, γef lluzinat . Azal n 454 n inelmaden ttwajerḥen, azal n 2000 deg-sen ttwaḥebsen. Si jjiεran, llan wid d-iḍegren iman-sen si ṭṭiqan. Imejjayen d ixeddamen n sbiṭar wwin-ten γer lḥebs, bedlen-ten-id s imejjayen n lεesker.
Azekka-nni deg wass n 20 yebrir, imezdaγ yewweḍ-iten lexbar γef lbaṭel yexdem udabu di tarwa-nsen. Awal yuzzel γef 32 n yelmeẓyen yemmuten. Ayen d-yessekren reffu meqqren deg-sen, ffγen-d, rẓan, serγen kra n wayen yellan d ayla n ddula. Tamurt n Leqbayel tettwaεzel, yiwen ur yezmir ad yeffeγ, yiwen ur yezmir a d-yekcem ladγa ineγmasen.
21 Yebrir 1980: Di yal tama n tmurt n Leqbayel, Leqser, Larbεa, Mirabu, Wagennun,.. ffγen-d rẓan akk ayen yellan d azamul n ddula. Di tudrin ṣṣuben-d γer temdinin akken a d–begnen lγiḍ-nsen γef wid yemmuten Aγmis n El Moudjahed, ayen yeḍran di Tizi Wezzu yeṣṣaweḍ-it-id akken yebγa udabu mačči akken teḍra. Yeṣṣawed armi d-yeskadeb d akken isdawanen serγen taεellam n Lezzayer.
22 Yebrir 1980: Asunded amatu yettkemmil deg wass-is wis kraḍ (3). Imesbaniyen di yal tama, d imesdurar neγ di temdinin, s ṣenğaqat deg ifassen-nsen, ffγen s iberdan i usutur aserreḥ n imeḥbas, d waḥbas n tizzeγzeγt di tmurt n Leqbayel. Di sbiṭar n Mosîafa Bacha, imejjayen gan asunded i ubeggen n ibeddi-nsen γer tama n imezdaγ n tmurt n Leqbayel.
23 Yebrir 1980: Asunded amatu deg wass-is wis ukuẓ (4). Di yal tama n tmurt Leqbayel, tella-d tuṭṭfa n imesbaniyen γer lḥebs. Di Tigzirt, imesbaniyen, ṣṣuben-d γer Tizi, ayen d-isekren amcubbak meqqren gar-asen d yemsulṭa. Amcubbak nniḍen yella-d di Draε ben Xedda gar imesbaniyen d yemsulṭa.
24 Yebrir 1980: Di temdint n Tizi Wezzu, tebda tettuγal-d talwit. Di larbεa Nat Yiraten, Σin El Ḥemam d Iwaḍiyen yella-d umcubbak ger Imesbaniyen d yemsulṭa.
25 Yebrir 1980: Tamdint n Tizi Wezzu, tezzi-d s yemsulṭa, Radio d Tiliẓri n tmurt, ṭṭfen-d tugniwin i yimeḍqan yettusxerben d wid ittuserγen, i d-seknen deg isallen n tmeddit n was-n .
26 Yebrir 1980 : Tameskant, yettwagedlen s ufus n leprefet di Fransa, tella-d imi asqamu CDDCA yessawel-d di radio akken a d-ffγen s iberdan. Azal n 500 medden i d-yerran i teγri, azal 400 degsen, ttwaṭṭfen s ufus n yemsulṭa.
29 Yebrir 1980: Tameskant d-ihegga usqamu CDDCA i wass n umenzu Magu di Lpari, tettwagdel si tama n leprefet, s tementilt n cwalat swayes zemren a d-glun.
10 Magu 1980: Tameγra n ucennay Matub Lunes di tzeqqa L’Olympia. Yiwet n dqiqa n tsusmi tella-d ilmend n umussu n tmurt n Leqbayel.
12 Magu 1980 : Asunded di tesdawit talemmast di Lezzayer.
16 Magu 1980: Aγmis n El Moudjahed yefka-d umuγ (liste) n 24 yettwaṭṭen di lḥebs. Yemmeslay-d γef ccraε ideg ara εeddi di Medea.
18 Magu 1980 : Asunded amatu yella-d di Tizi Wezzu.
19 Magu 1980: Di Lezzayer tella-d tmeskant mgal tizzeγzeγt.
24 Magu 1980: Yiwen unejmuε amatu yella-d di tesdawit talemmast, imsulṭa zedmen fell-asen s tyitwin.
25 Magu 1980: Asqamu n CDDCA, yessazreg-d ( publie) tabratt i yuran i uselway n Lezzayer Cadli, ideg d-stenyan 3522 medden
3 Yunyu 1980: Asizreg n wumuγ n wid yestenyan ( publication de la pétition) n usqamu agraγlan yekkaten γef yizerfan n wid yenṭṭerren deg tmesbaniyin n tmurt n Lezzayer.
21 Yunyu 1980: Asqamu n CDDCA, iga yiwen unejmuε di «la bourse du travail » di Lpari i usuter n userreḥ n 24 yettwaṭṭfen di lḥebs di tmurt n Lezzayer. Deg unejmuε-agi ukant aṭas n tdukliwin d ikabaren yekkaten γef yizerfan n umdan yecban l’ASEP, UNEF, LCR, FEN, FO, OCI, FFS d d tejmaεt tagraγlant n yizerfan n umdan.
25 Yunyu 1980: Di Tizi Wezzu, d ass n ibeddi γer tama n 24 yettwṭṭfen. Γef 8 n yiḍ isali n userreh si laεḍil n 24 yettwaṭṭfen, tessaweḍ-it-id tkebbanit n tγamsa l’APS.
26 Yebrir 1980: d izumal n yemdanen i iruḥen s tkerrusin mugren 24 yettwaṭṭfen, s tmeγra i ten-qublen di Tizi Wezzu.
Nura Amara (Tamazight)