Tamacahutt-a, d ayen i wumi i d-cfiγ, γef asmi saaiγ setta n iseggwasen di laamer-iw. Nekkwni nmecṭuḥ, nḥemmel xilla seksu d yikil, akwd lkarmus. Anda yella seksu d yikil, ur nsett ayen nniḍen. Dadda (gma-s n baba), imi iwala akken, isnulfa-yaγ-d taγwect. Yal tikelt micki ar aγ-d-inin: "Aččem seksu?", dadda aγ-d-iḥekker kan, dγa an-nekwmaṣi: "Seksu d yikil, seksu d yikil, d takarmust i d ddisir." Nettṛuẓu-yasen aqaṛṛu. Yezga kan akka i sent-nettara i yemma d nanna.
Ussan-nni, imi mecṭuḥeγ, sett-i yuγ lḥal mazal-itt txeddem. Nek lliγ tteqliliḥeγ, bγiγ ad ẓreγ anda akka txeddem sett-i. Ur saaint ara akw tezyiwin-iw sett-nsent ixeddmen. Ḥaca nekk.
Yibbwass tameddit, nnan-iyi-d: "Aaddi s yinna ad teṭseḍ. Atan azekka akem-tawi sett-im yid-es γer wanda txeddem. Maca serked iman-im, dinna. Ur ḥemlen ara igad illan din, tiḥdayin ittcetiten. Mulac, akem-id-qedmen s yin. Ad d-qedmen sett-im." Nekkini, mmuteγ di lferḥ. Ayen akken rjiγ acḥal aya, yebbweḍ-ed. Azekkawen ad ẓreγ anda tqeddec sett-i. Iḍ kamel ur ṭṭiseγ. Ttxemmimeγ amek ara yeg wemkan-agi, akken asen-znuxxeγ i medden.
Ihi, azekkawen-nni, nekker-ed, netḥerkil an-nruḥ. Yemma d nanna nnant-iyi-d: "D acu tebγiḍ am-nefk, a t-teččeḍ dinna, mi telluzeḍ?". Nniγ-asent: "Seksu d yikil." Tenna-k yemma: "Lmečč ! Ad tettzenqil sett-im s ya γer dihin seksu d yikil, yah! Awi ayen nniḍen !" Nekk, mecṭuḥeγ, ur as-xemmeγ ara akw i wanecta. Walaγ d tidett. As-aabbiγ i sett-i meskint taakumt !
Netta yuγ lḥal, akken kan i d-yebbwa weγrum n temtunt. Dγa nniγ-asent: "Fkemt-iyi-d aγrum n temtunt akwd lbanan !". Di lweqt-nni, asmi yedder “ Buyludyan ”, kul ci yella. Ḥaca tidett i ulac ! Ihi, fkant-iyi-d ayen akken bγiγ, ṭṭfeγ-as afus is sett-i, neṭṭef lkar, nruḥ. Nteddu, nteddu ar mi nebbweḍ γer tesdawit n Benaaknun. Akken nekcem, walaγ yiwwen n ujerdan annectilat. Tenn-ak sett-i: "Qim tura dagi a yelli ad turareḍ. Nek ad ruḥeγ ad xedmeγ, yah."
Ihi, qqimeγ dinn deg ujerdan-nni. Ttmuquleγ amkan-agi deg ug txeddem sett-i. Ziγ d aγerbaz ameqwran. Micki ad awḍeγ s axxam, asen-ḥkuγ akw, asen-zuxxeγ. Imi ḥaca nekk i walan anda txeddem!
Qwleγ, kkreγ, ttqellibeγ sett-i anda tella. Ruḥeγ, zegreγ ajerdan-nni, wlaγ yiwwen n wexxam, kecmeγ γur-es. Axxam-nni isaa xilla n texxamin deg-s. Agwens-is annectilat. Kecmeγ ad waliγ sett-i anda txeddem.
Tazwara ula wi walaγ. Akken ḥekreγ γer llim yfus, taxxamt tamezwarut, walaγ abaaḍ. Di texxamt anda ssiriden medden iman-nsen, i yufiγ sett-i ! Teqqummec, tigwecrar-is γef lqaa, ifassen-is ttḥukkun. Mi d-tesla i lḥess, terfed-ed aqaṛṛu-s, twala-yi-d. Tenna-yi-d: "Acu ani a yelli. Telluẓeḍ ?" Nniγ-as: "Xaṭi a sett-i, ur lluẓeγ ara." Niqal susmeγ, uγaleγ neṭqeγ-d: "A sett-i, acu ani txeddmeḍ?"
Tmuqel-iyi-d, tenna-k: "A ssirideγ ayell-i bitelmat-agi. Yak d ta i d lxedma-inu. Ilaq ad irident akw, ad izdigent." Ttmuquleγ-tt, tettḥukku, tesfaḍ. Ziγ d ta i d lxedma-ines. Tuγal tezzi-d γur-i tenna-k: "Ṛuḥ a yelli kkes-ed ad teččeḍ, ṛuḥ." Tiγil meskint, imi beddeγ kan dinn, d laẓ i lluẓeγ. Fγeγ-d s yinna, uγaleγ γer wand akken qimmeγ di beṛṛa.
Ur yi-d-yenna wul-iw ečč. Sett-i zziγ, tessizdig ayen sewsaxen wiyaḍ. Zziγ yal mara tekk taburt n wexxam-nneγ, d aya itt-yettrağun. Qqimeγ dinna deg wemkan-iw, ttruγ, imi ufiγ iman-iw d taγyult. Acḥal n iseggwasen aya, nettat tesaadday akw annecta, i wakken aγ d-ssekren. Ziγ lukan mači akka, an-nelḥu ḥafi. Ziγ seksu d yikil-nni fuγef ttmettateγ, si tarda n ilefḍan n medden, i d-yekka. Tγaḍ-iyi sett-i. Ttruγ dinna weḥdi, s tufra, armi aayiγ.
Yuγal yaadda wass, nuγal s axxam-nneγ. Maca seg wass-en, mi iyi-d-steqsan: "Tebγiḍ aya ? Ma yehwa-yam waya, am-t-id-naγ !" Xas bγiγ ad iniγ ih, ad mmektiγ sett-i, iqummcen γer lqaa, tesfaḍ. Dγa ur d-qqareγ kra.
Farida At Harun Amenzu n Furar 2003.