TABRATT I MUḤEND AZWAW

 ΓEF TMUSNI

I kečč a Muḥend Azwaw d tezyiwin-ik, adlis-a a k-d-yefk yiwen wudem n tmusni, ad ak-d-yeqqim d tagejdit, ad ak-d-yettales ayen gan d wayen nnan imezwura-inek. Mi ara t-walin medden ammar ad ilin wid ara d ak-yinin: 

- Tigi d timucuha n zik-nni. D timucuha n Tteryel  i yes-s sedhuyen arrac. I wacu d aγ-nefεent tmucuha n zik, i nekni s at tura ? Eğğ timucuha n zik i ya at zik ; nekni d arraw n wass-a, ass-a deg irgazen  ulin s aggur rsen deg-s, ass-a deg isufag semliliyen tamurt γer tmurt yellan ayda dγat deg n ya n tallit, ass-a deg yiwet n takurt tezmer ad tzebbwa tamdint tameqqrant deg usmenγer n tiṭ.

Ini-asen:

- Tamusni tekka nnig teswiεin. Ur ttilit ara ay amedhac d arrac yessedhec uclawa, yesmenyafen arelluc aberreqmuc i yiṭṭij ireqqen neγ i wewreγ yuli uγebbar.

Ini-asen:

        - Awreγ yif arelluc, ulac akk n teqrint gar-asen; awreγ kkes-as aγebbar ad yirriq, arelluc  cwiṭ ma icellef-it d acellef ad yeddegdeg d ticeqfatin tizraraqin.

Ini-asen:

        - Awer teḍru yid-wen ay at tura am seklu mi gezmen iẓuran, di tazwara zegzaw yiffer-is, di teswiεt  sellaw iḍer. Ṭṭejra mebla iẓuran leqrar-is d tamettant. Awer tilim ay at tura am isekla war iẓuran.

Ini-asen:

- Tamacahutt d ajlal n tmusni, kkes ajlal i wakken a d-tedher temsirt yellan ddaw-as, acku …

Acku tamusni γas tettabaε lewqat , ur teqqin ara γer-sen s umrar ur gezmen lemqas. Si tallit γer tayeḍ tettbeddil tusna, tamusni ur tettbeddil ara. Si tallit ar tayeḍ ay yettbeddilen di tmusni d ṣṣifa n sufella, mačči d ixef n daxel.

Maca taγawsa tis snat ay Azwaw, tamusni mačči d lweṛt kan, mačči d agni mi d-zzin leṣwar. Awan n tmusni d antag, d tikli γer zdat. Ma tgiḍ-as algam tenḍiḍ-tt.

Ay azwaw ur as-tteg ara algam i tmusni. Anida tt-yeṣṣaweḍ lğehd ufud-is taweḍ-it, ma s aggur eğğ tamusni ad tali s aggur; ma s itran eg-as abrid s itran, ma awan-is d asemḥelleq i ddunit d wayen yellan, anef i tmusni ad tessemḥelleq i ddunit.

Taγawsa tis kraḍ tamusni, ay Azwaw d asafu.     

D asafu n tafat, eğğ asafu ad yeffu, izuzef tilas.

Tamusni d asafu n wurγu, eğğ asafu ad yesserγ ayen yerkan, d wayen yeblan, d wayen ur nesεi iẓuran. G –as-d asaber γef wayen yelhan, γef wayen yelḥan deg iberdan d amsebrid mačči d amenṭran.

Tamusni d asafu; wa yettak-it i wa, i wakken a d-yezg dayem yeεla, urğin  yettendella neγ yulwa neγ yeqqim am γerrus di tesga.

Ḥedreγ yemmut umγar aneggaru d-yettawin abrid n tmusni: Newwi tafekka-s γer uẓekka ideg ara yenṭel. Mi nerra akal fell-as nuγal-d nettmesmuqal am wi ṣerεan, la d-yettaki. Inṭel usafu gar-aneγ  swayes d-nettagem  tafat.

Ass-n ay Azwaw, i k-id-mmektiγ, i s-nniγ : - Ay imεezzan n yibbas γurwat ad tuγalem d ineḥyaf n kullas si tmusni d tmuγli taγezfant, d tulya n wul d laεqel. Mmektiγ-k-id, mmektiγ-d akk tisutwin ara d-immlen. Amusnaw aneggaru nneṭl-it, daγ nenṭel  yid-s tamusni ? Ulac tijmuyaε d yegrawen ideg ara tḥefḍem tamusni akken ttḥefḍen imezwura-nwen. Tura tamusni tuγal s yedlisen. Degmi ay uriγ adlis-a i kečč ay Azwaw  d tezyiwin-ik, ad ak-d-yeqqim d tagejdit i usenned, d tagejdit i lebni. 

Alɣu
« Dda Lmulud : Argaz n yakk imenzayen (principes) » d wagi d azwel n tafilt tagnennayt (table ronde) ara yessermed Ǧamal Benɛuf di Lḥasi, ass-a n wemhad ɣef 16t 30, qbel tamsirt n tmaziɣt i d-yettilin yal imalas ( ssmana) ɣef 18t00. Armud-agi a d-yili ilmend umulli wis-18 n tmettant n Dda Lmulud.
« Dda Dda Lmulud yerẓa asalu, nekkni deg webrid-is ad neddu »
Aṭlas seg Wehran

Azul a a Atlas
D ayen yessefrahen imi ara isel umdan d akken ass yecban ass-a di yal tama ttaran-as tajmilt i ughrab n tmazight dda lmulud ayagi yettbeggin-d d akken agdud yesla, yegza izen n tegejdit-nnnegh tameqrant.
Ass-a ula dagi ghur-negh nerra-yas tajmilt. tura i -ughalegh deg uxxam nn yelmezyen dinna i d-wwigh awal ghef Mulud Mammeri, aggay, asnalsi, amyaru, ameghnas, ameghras syen tella-d tceqquft umezgun sghur kra n warrac n temnat-nnegh nekfa-tt s yiwet n terba3t n cdhah Ibriqes.
Ihi dda Lmulud xas ass-a iba maca ayen iga yessader-it i lebda .
Tmazight

awal γef bab n wawal

Nutni regglen-aγ tiwwura
Kečč tettṛuẓuḍ asalu
nutni neqqḍen-aγ iles
kečč tufiḍ-as-d tira
nutni xellḍen caaban d ṛemḍan
kečč tferneḍ lḥebb γef takka
nutni tekksen ẓẓeṛb i wayla
kečč terriḍ-as tisseγlit
nutni beddlen adrum s weγrum
kečč ur teṛṛiẓeḍ ur tekniḍ
nutni ddan d waḍu d-isuḍen
kečč tezgiḍ deg wakal-ik
nutni ufan nnger di kullec
kečč tufiḍ din laamaṛa
nutni rran amiran d aqdim
kečč deg weqdim tufiḍ atrar
nutni neqqen iman n wid iddren
kečč tessidireḍ awal s wawal
nutni llan ulac-iten
KEČČ ULAC-IK TELLIḌ

I Ǧamal. Azul a gma n yiman.
Ssarameɣ di lehna d talwit ara k-id-taf tebrat-agi, kečč tuɣeḍ tannumi ɣef leqraya n tebratin-iw, ma d nekk uɣeɣ tannumi ɣef tira-nsent, uɣeɣ tannumi ɣef teswiɛt-agi tuɣrist, anda tettmeslay terwiḥt war akukru, war acuddu, imi teẓra akken yella yiman-nniḍen I s-d-isellen, i s-ifehmen daɣen.
Ɣriɣ tabrat-nni n « Dda Lmulud », ur ufiɣ d acu ara d-iniɣ, imi, ttgugumen imeslayen zdat lehdur i d-yekkan sɣur « Urebbit » i yellan am « Dda Lmulud » ( fell-as yeɛfu Rebbi), ih, d Arebbit i yella, imi d netta i ɣ-d-ixelqen, d netta i yefkan tudert i yiman n tjaddit d tnaṣlit-nneɣ, d netta i d-ixelqen deg-neɣ rruḥ amaziɣ, d netta i d tamentilt ( sebba) n tilin-nneɣ ass-a. Mi ɣriɣ, neɣ mi qqareɣ di tebrat-nni n « Dda Lmulud » i yura i Muḥend Azwaw, i yi-d-yura i nekk, i yal ilemẓi neɣ tilemẓit, ḥulfaɣ akken aṭas, aṭas i ɣ-yettalas uzamul ( symbom ) n tnaṣlit d tjaddit, nniɣ, yiwen urebbit am netta, ur ilaq ara ad yemmet, tamettant-is megdulet, d taxeṣṣart meqqren i talsa s umata, dɣa i timmuzɣa, maca, ur yemmut ara, imi, netta, « ɣas ulac-it yella » ɣas ulac-it, ala tilin ara yili, aɣbel, d aɣbel n wigi akka ur nelli ɣas llan, widak i wumi ɛellqen akka nnaqus n tɣeṭṭen deg yemgerḍen-nsen, rnan zhan, sčernunen, ɣilen s wakken ara yennerni wazal-nsen, ttmeslayen ɣef imedyazen-nni s wacu i ttzuxxun akka di temliliyin-nsen n « ttaqafa lɛarabiyya », ur ẓriɣ ara ma yella ttkellixen i yiman-nsen, neɣ ahat i nekkni i ɣilen akka ttkellixen ! Yal mi ara sen-sleɣ i isefra –nni i d-ttawin , steqsayeɣ : “ ɣef waydeg akka ttkellixen?!” Ttarran tajmilt i wid ur tt-nuklal, wwin-aɣ-d “ ulac”, bɣan a t-ssiɛezzen, a t-ssaɛlin, a t-rren yella!? D nutni i yettɣaḍen ur d-wwin lexbar, imi teḍra-yasen am winna akken i d-yeskaddben akeddib, yumen-it! Skerkisen ɣef yiman-nsen, ur ẓrin ara akken izumal-nni-nsen i gan s uɣebbar, mi ara a d-ihubb fell-asen waḍu, ad ṣefḍen, d izumal-nneɣ kan ara d-yeqqimen, acku wecmen di tdikelt n wussan s wureɣ, d awcam ur nṣeffeḍ, ur ẓriɣ ara anwa isɛan akka yezmer a d-iban zdat urebbit-nneɣ “ Dda Lmulud”? Imi akka i bɣan ad ɣbun later-is, ɣilen ma yella ffren-t ur d-yettban ara, ur ẓrin ara akken tafukt, ur tt-iteffer uɣerbal.
Mi ara waliɣ ayen xedmen imeqqranen, imezwura, wid-nni i ɣ-d-ineǧren abrid, qqareɣ-as nekkni d ulac, ur yelli i nexdem, werɛad nessaweḍ ɣer yeswi i ɣ-d-heggan.
Tanaṣlit