Aḍris-a i tmesliwt
Tidukkla tadelsant tamaziɣt di Ottawa-Hull terra-yas tajmilt i tgejdit n umezgun aqbayli : Moḥya , ‘’Shakespeare n teqbaylit ‘’ amek is isemma Ferḥat , ass n sed tameddit , 7 di tuber 2006, di temdint n Ottawa, tamanaɣt tafidiralit n tmurt n Kanada .
Deg ahil n tejmilt-agi , tamezgunt Si Leḥlu, d ccna akk d inebgi n tdukkla, d inebgi n Iqbayliyen merra n Kanada , Ferḥat Imaziɣen Imula.
Si Leḥlu d yiwet ger ugar n 30 tmezgunin yura Moḥya .D Inelmaden d tinelmadin n uɣerbaz n tmaziɣt i-tt yuraren war akukru am yelɣuɣen, ɣas akken d tikkelt tamezwarut i sullin tamezgunt, yernu tuget seg-sen deg ‘’iseggasen n 80’’ i lulen . Fkan-d yiwen n wudem yessefraḥen aṭas, uraren-d tamezgunt akken iwata, akken i tt-yebɣa lxaṭer i d-ters fell-as. Si tama-nneɣ, nettara-yasen tajmilt tameqqrant i tullas akk d warrac n tdukkla i s-yefkan azal-is i umezgun. War akukru, kkan abrid n teɣzi xas akken d tikkelt tamenzut i yuraren taceqquft .
Nedder timidi n tsaεet d wezgen di tlemmast n imesdurar d ‘’nniya-nsen’’ , neḍsa seg wul, nezha. Taqbaylit tneddeh di tzeqqa Jack Purcel di Ottawa . Xas akken ṣṣut mačči dayen igerzen maḍi maca imyurar sgerzen-aɣ-ad tazwayt.
Ilmeẓyen id yuraren tamezgunt akk d iεeggalen n tdukla tamaziɣt di Ottawa-Hull fkanaɣ-d tamsirt amek yezmer ad yili umennuɣ assa f teqbaylit. Tikli i d-uɣen tgerrez, tif tid yekkan. Nutni ass-a, ḥerzen tutlayt d insayen n yezwawen dayen kan. Ar iḍ-a tarwa uɣen abrid uɣen imezwura-nnsen. Izwawen am wi nezmer a nzux yissen ass-a, a ten-nawi d amedya da di Kanada neɣ anda nniḍen. Abrid-is iban: S ucemmer iɣalen, s useqdec n tmeslayt-nneɣ d uselmed-ines i tarwa-nneɣ akken tebɣu tili tegnitt, akken ad tettwaḥrez , ad tenerni mačči kan d asuɣu deg iberdan nekni ur nessin ad naru ula d awal s teqbaylit .
Mi tfuk tmezgunt, deg lawan-nni i deg nella nettrağu a ttkemmel tmeɣra s ccna akk d , Ferḥat , yuklalen a t-nerr d amazzan n Iqbayliyen deg umaḍal merra war tugdi acku nettkel fell-as , neserbeḥ i imyurar, neddem amur-nneɣ n tesfenğtin d lqahwa . Nqeṣṣer d iεeggalen n tdukkla, ḥmed (iɣ-d-isegzin amek i d-tlul tdukkla d wamek tsaweḍ a tt-sekcem tutlayt tamaziɣt deg uɣerbaz unṣib n Ontario), tamedyazt Farida At Harun(El-Djama), Karim Achab (aselmad n tmaziɣt ) d wiyaḍ.
Nfureṣ tagnit imi nella nettqeṣṣir d Si Leḥlu (Hakim Abdat), nefka-yas kra isteqsiyen .
Imyura.net : azul a Hakim, amek i wen d tusa tikti n usali n tmezgunt di Ottawa?
Hakim Abdat : Taceqquft-agi n Si Leḥlu, neɣra-tt deg uɣerbaz Tmaziɣt, tehwa-yaɣ , dɣa dinna deg uɣerbaz tmaziɣt i ɣ-truḥ tekti-yagi akken a tt-id-nurar. Yerna inelmaden/tinelmaden uɣerbaz Tmaziɣt bɣan ad as-rren tajmilt i Moḥya, neɣra isefra-s, timucuha-s deg uɣerbaz tmaziɣt, iɣaḍ-aɣ lḥal aṭas imi yiwen am Moḥya ur t-nessin ara almi d asmi i yemmut.
Si Leḥlu mačči d tamezgunt tamezwarut i d-yellan dagi di Ottawa, tamenzut d ‘’Tidak n Nna Fa’’ i yura Mass Arab Sekhi, yurar-itt-id netta akw d Mass Lhousine Toulait. D wigi i ɣ-iseknen abrid-agi umezgun.
Imyura.net: Tikkelt tamezwarut i txedmeḍ amezgun ?
Hakim: D tagi i d tikelt tamezwarut i nexdem amezgun, tid akw d wid i d-yuraren akw d ibujaden, nɣil amezgun yeshel, ziɣen ur neẓri ara anda i nger iman-nneɣ , di tazwara yuεer lḥal, ur neẓri ara amek ar a nexdem, ilaq ad d-naff anda ar a nemlil, ad d-naff lweqt melmi i nestufa merra ɣef tikkelt, wigi akw d uguren... yiwet yiwet almi i frant merra.
Imyura.net : D kečč i yuraren Si Leḥlu, mačči d ayen isehlen, tekukraḍ neɣ tugadeḍ
cwiṭ ?
Hakim : Weqbel ad d-nurar tamezgunt-agi nekukra merra acku d tikelt tamenzut, d acu kan ass-nni nemsefham merra a nemlil zik akken a nheggi tazeqqa yerna a nekkes akukru-yagi neɣ targagit-agi. Ur as-nḥuss ara i wass amek i yεedda. Nekk imi i tebda tceqquft ḥusseɣ i yiman-iw qqwleɣ d taṭumaṭict! Tetṭef iyi leḥya-nni tamcumt!
Imyura.net : nusad acḥal tikkal ar Ottawa lamεana tirza taneggarut werğin a tt-nettu ,
tesferḥmeɣ aken yesefraḥ Rebbi .si tura i la nettrağu tamezgunt id
iteddun neɣ leqdic niḍen.
hakim : Ula d nekni nefreḥ aṭas imi i d-tusam ar Ottawa, nessaram mačči d tikelt taneggarut. Nnig wass-a ma tella kra n Tmezgunt dagi di Ottawa a kun-in-yaweḍ lexbar, kkes aɣbel!