YIWEN NNIḌEN
Yiwen nniḍen d asaru s tutlayt n tmaziγt yewwin araz usebγes di tfaska taγelnawt tadelsant n usaru Amaziγ i d-tessewjed tneγlaft n yedles deg wussan n 11 ar 15 yennayer 2007.
Asaru yettmeslay-d γef Farid, ilemẓi Azzayri yefkan akk tazmert-is di leqraya-s akken a d-yifrir ger imenza. Ifuk almud yufa-d iman-is deg ubrid.. Ulac anta tawwurt iγef ur ibedd ara akken a d-yaf axeddim maca kra n wanda yesṭebṭeb rran-t-id γef tewwurt. Sin iseggasen yella netta yettali, yettṣubu yerwa lḥif maca mebla lfayda. Yeṣṣaweḍ armi yezzenz akk idlisen-is akken a d-iḥelli swayes ara yezger akin i ugemmaḍ. Imi di tmurt-is ulac asirem, ad yeεerḍ timura n medden ahat dinna a s-d-tifrir tafat. Isemmeḥ di tayri-s tamenzut Nura i d wi yemyeṛgam ad zdin tudert-nsen s wayen yelhan d wayen n dir. Deg usaru-yagi a nwali daγen udem n tmetti ( société) Tazzayrit anda azuran yečča areqqaq, anda win yesεan yerkeḍ aẓawali. Farid yugi timuγliwin-agi iḥulfa i yiman-is d ajenṭaḍ (étranger) di tmurt-is.
Anwa i d bab n usaru-yagi?
Amseḍru (réalisateur) n usaru Yiwen nniḍen d Smaεil MESΣUDI yesεan 28 iseggasen di laεmr-is. Yezdeγ deg wul n udrar n Ğerğer γef lebεid 70 km i tzeqqa n usarug (cinéma) amenzu t-iqerben d-yezgan di temdint n Tizi-wezzu. Annar n usarug yessen-it kan deg isura yettwali di tiliẓri (télévision). Werğin yelmid asarug acku ulac di tmurt-nneγ iγerbazen yettwamuzgen (écoles spécialisées) deg uḥric-agi.
Aḍris n usaru yura-t deg useggas 1999. Deg useggas 2006 yessaweḍ akken a d-yerr adlis-is d asaru awezlan yesεan azal n 25 n dqayeq. Ini (couleur) n usaru yextar-it ad yili d amellal d uberkan anda d yufrar uqehwi ugar n sin yiniyen-agi imenza, ayen mi qqaren s tefransist (sépia).
I usuffeγ n usaru-yagi Smaεil yefka akk ayen yesεa di texriṭ-is akken ad yeg amahil zeddigen acku ulac tuddsa tadelsant (organisation culturelle) ama di tmurt-nneγ neγ di tmura n berra i s-d-yefkan afus n tallelt.
Ar tama n yemdukkal-is, llan kra n yemdanen yesεan tirmi (experience) deg unar n usliẓri ( audio-ḍisuel) i t-yeεawnen
Si tama n tfukkest (technique) yufa-d uguren imi imḍebren n tesdawit n Tizi Wezzu ugin a s-ğğen ad yessexdem allalen s-ilaqen dinna. D ayen i t-yeğğan yextar tamdint n Bgayet anda s-llin tiwwura s tehri. Dγa dinna i ttwurarent tugti n tugniwin n usaru-yagi.
Asaru-yagi yettwasken-d i tikkelt tamenzut di tzeqqa n usarug n Lzzayer. Syen yettwasken-d deg uxxam n yedles n Mulud At MΣEMMAR.
Deg useggas-agi n 2007 ad yiki deg tfaska n isura n usamar ara d-yilin di Jenev
Asirem n Smaεil d akken leqdic-is ad yeffeγ akin i tlisa, ad yettiki di tfaskiwin tigraγlanin.
Nura Amara (Tamazight)