Ay Ajaγiγ aberzegzaw

I serrun di tegnaw,

Neyyr-as d acu tettrajuḍ.

Ezger agumaḍ i ugaraw,

Ar tmurt n wuzwaw,

Anda yettarew ubelluḍ.

A k-nazen ay amesfaw,

Zwir si Budwaw,

Lewḍat icebbeḥ jiḥbuḍ.

In-asen inig yuzdaw,

 Uqleγ d agafaw,

Ksiγ di lexla am uziḍuḍ.

A tamurt ixla usegraw,

Issendayen uraw,

Acu ara d-yekken seg ugmuḍ.

Zgan deg-m d acraw,

Adabu yessağaw,

Erran agdud d amejṛuḍ.

Nfan wi llan d amusnaw,

Ur d-yeqqim udelsaw,

Tseqin s aggug am ubuḍ.

Ay Ajaγiγ aberzegzaw,

Lezzayer tekkaw,

Amdan-is yuγal d amsuḍ.

Lḥusin Ukerdis, Montréal 16 mai 2004.