Am ass-a ad yazef ulemlum
a-nbeddel laḥkum
ad yefru lḥeb γef alim

Ifessasen ittrebin aksum
di tili n umcum
γilen akka kan ar a-neqim

A-d-yas leḥsab s lmaεlum
γuṛwat at-tettum
ay at tijeεal d udrim

Awal yid-wen d anegzum
s wanuz iga lεum
tallit nwen ur tett tim

Ayen illan deg-wen iγum
ar daxel i kwn isum
t-tiyita ur d-nettak idim

Mazal tesganayem lqum
ddin yesnuddum
akraf γur-s i d ittweqqim


Am ass-a ad yezzi waḍu
lpitrole ad ikfu
d ijdi kan ad iqqimen

Am ass-a tidett a-d-tejbu
tilleli ad tenulfu
a-kwen-iddez akw Σezrayen

Tettakem lğehd i wcengu
tineslemt n zaylelu
tefγem-aγ-d akw d imcumen

Tefkam azuγer i larelijyu
teknam tuyat i uzaglu
tγedṛem idamen nwen

Am ass-a ad yezzi waḍu
yis-wen ad iglu
skud mazal Imaziγen


Ukerdis, ass n 22 di meγres 2005