Wi d kra isefra n Laḥlu' Musa (ism unṣib Lahlou Sebaa) i d yeddan deg udlis yura: “Yal awal s ba-is, yal taγawsa deg wemdiq-is”. Ur yettuhwan wayen yura, tazrigt (edition) t-id-yessufγen ur tgi ra amahil yeffulkin, ur tgi ra amahil igerrzen, imi atas n wezgal i yellan deg-s. Amyaru netta, 62 iseggasen deg tudert-is, ur yessin ara ad yaru s tutlayt niḍen, d tamaziγt kan i yessen. Tira n tmaziγt tusa-yas-d am ugerruj yufa yiwen, am tiṭ n waman (taεwint) yufa yiwen deg tniri (Seḥra), imi i s-tefkka tegnit akken ad yaru tiktiwin-is, ad yaru tidmi-s.
Laḥlu' Musa yefkka azal ameqran i tira s tmaziγt. Yenna deg tezwart i iga i wedlis-is: “Win izemren ad yaru s tmaziγt, yeğa deg utefar-is ma yella ur yuri ara.” Yuddr-ed diγen izen-nni i qqaren: “Ur k-id-ikemmez yiwen anda i k-yečča.”
Ahit ad cfun
D izumal d imelyan
Yid-I d inigan
Ar zdat i ibγun yili
ilemziyen d ileqaqen
D nitni i yezwaren
Yiwen zdat-i i yeγli
Selt-as dacu d-yenna
Yecmumex-d d tadsa
Yenna-k ur tettru fell-i
S idammen-is yura
Γef tlelli n tmurt-a
Imesli ad yaweḍ s igenni
Init-as-t I yemma
Aqli-n ur uggadeγ ara,
d arraw-im akkwit wigi
A sellaḥ iεussen tamurt-a,
I wid ixedεen anect-a
Mlet-aγ-d amek ar a sen-nini
Si zik wigi llan
Deg umezruy d imeγban
Zgan ibexs-iten Rrebi
Nuγal γef wiyaḍ d aklan
Tekksen-aγ εeryan
Regglen fell-aγ tiwwura
Aγawas yeğa-t-id Abban
Yettazal am aman
Deg Leqser tettunefk lemεahda
Ixeddaεen werjin fukken
Ad ilin akka d asawen
Ayagi d ayen nezṛa
Tezṛam akk d acu
S tagi nneγ a naru
Tamurt-nneγ uzekka
A wid akk yettarun
Awal-nwen d aldun
Yessergagayen icenga
S tidi n imawlan ad ssweγ tiniri.
Walit tagnit deg illiγ
Tura a wen-d-iniγ
Deg ill(lebḥer) i bdiγ tikli
D baba d yemma i zerṛeγ
d aya s wayes kecmeγ
tissit-nsen d tidi
Ul-iw a t-id-čareγ
d tala deg a d-agmeγ
ad sweγ ffad yenγa-yi
Tura d targa ar a-d-rreγ
Ssed-ines a t-seggmeγ
Ad ssweγ yis-s tiniri
Wigi akk i iεeddan
Sya akk yekkan
Nek tayugt tessaggd-iyi
Tura tiggdin ğiγ-tt
Seg ul nfiγ-tt
i yebγun yeḍru yid-i
Aman g ill zeddigit
Asigna iteddem tiqit
Deg tallunt yeskar-d tili
Deg-s ihi a d-rreγ targa
Ad sekkreγ tamda
Ad ssweγ yis-s asuki
Ill inu ur yelli d urfan
Ur yelli diγ d aṭan
Ha!! Ad tγilem d tiselbi !
°°°
Igenni deg-s i d-itess
Zeddig dihin ires
I t yessnen d win yettεezziṛen
Werjin yeqqim iman-is
Itran zhan ar yiri-s
Atan s γur-i d izen
°°°
Win yexsan ad izeṛ
S tireft ad yezger
Yal tawwurt s yism-is
Ad yissin tihuski
D wayen γlayen γef Rebi
Ad iwali kan s walen-is
Dacu i d tiwwura igenni
Mačči d yiwen yetri
d yefka Yellu deg ccan-is.
Yura diγen idrisen γef tlufa iḍerrun deg tallit taqburt ar yeqbayliyen.Wagi d cwiṭ deg yiwen udris yura γef yiwet n taluft d-yeskanen tasγart i s-d-isahen i tmeṭṭut deg tmetti taqbaylit ma γas tikkwal neskerkis γef yimanen-nneγ, neqqaṛ: “nekkni s leqbayel, nefkka izerfan i tmeṭṭut seg zik.
" ...Ubaεziz γur-s sin warraw, Muhend d Yidir akk d snat n teqcicin, Silya d Dihya. Ubaεziz d amdan umi teqqur tasa mačči d kra. Ttuttu, tameṭṭut-is, ur tezmir ara a d-terfed allen-is γur-s. Γur-sen tazmart i sin, ahit εedlen deg teγzi naγ deg tuzert. Yisi-tsen, mraw(10) iseggasen a tent-tafeḍ ttbanent d tilawin. Ttuttu am tegmart, imi ar ad-tetteddu, tettergigi tmurt.
Γur-sen aqeddac, yettili-yasen, qqaren-as Lhusin. Ar γur-sen amzun d mmi-tsen. Lhusin, d aberkan, maca mačči d akli, aksum-is aras. D azuran, d awezzlan. Yettaγ awal, ya i teqcicin nni neγ i Ttuttu. Iqeddc-asen am teqcict am weqcic. Ula d tiyita kkatentet-t teqcicin-nni.
…
Ur zṛan amek teḍra armi terfed Silya s tadist. Ubaεziz yegza d akken d Lhusin i d-tamentilt n waya, yeggul deg yili-s, a s-d-tini ma s yiγil i tt-yetṭef naγ s lebγi-s nettat.
Silya tuls-as-d taluft amek teḍra: “d tiyita i t-wteγ, yettru, greγ iman-iw γer-s a t-id-ḥelleγ…imi t-id-ḥelleγ ur uḥtameγ amek, armi teḍra yid-i.” Ubaεziz yebγa ad yebbeεzeq, maca iṭtef deg iman-is. Yenna-yas deg ul-is: “Arju kan !”.
Yedda wakud. Yiwen wass deg ussan Rrebi, yuγal-d seg tferkiwin, yufa-tt-id teqqim iman-is deg wexxam. Ineggez fell-as am yilef, yurz-itt s imurar, ixenq-itt armi tessufeγ tarwiḥt. Yuγ lhal yessewjed-as aẓekka ar yiri n yeγzeṛ. Yegr-itt deg-s, yerra-yas akal. Ssin γer-s yeẓẓa taleqqamt ar tama uẓekka-nni. Taleqqamt nni ass-a d-tazemmurt.
Ass mi d-rran tamawt wiyaḍ, Silya ulac-itt, nudan fell-as armi ddhen (εyan). Ubaεziz yiqqim kan issermumug, ur a-s-yenni i yiwen dacu yexdem, ula d tameṭṭut-is ur-as-yenni ara. Anagar Lhusin i yegzan d akken d Ubaεziz i tt-yenγan, maca ur yezmir a t-id-yali wawal. Yerna dacu yerna, yerwel seg wexxam. Yugad a t-ineγ Ubaεziz ula d netta.
Ubaεziz netta, yerna kra iseggasen, yečča-t weqjun amṣud. Ssafen fell-as aman s uγerbal, teffeγ seg-s terwiḥt... "