Daḥman Umsal

Wa d-asefru d ttawint tlawin deg tama n At Wertiran γef Dahman Umsal. Yiwet n tikkelt yusa-d uqebtan arumi ass n 27 deg Furar aseggas 1850 ad-ifru tamsalt n wakal gar At Imula akk d At Jlil. Aqebtan akk d iserdasen-is bdan ameslay akk d imeqranen n iderma imi d ikker yiwen ilemzi isnesr-d tamezyant(takabbust) s ddaw ubernus-is, iwwet s tersast aqebtan nni. Iserdasen tfen Dahman Umsal, wwin-t ar Bgayet, sεeddan-t deg craε, sersen-t d nnican, nγan-t deg tefsut nni ya n 1850.
Ihi tura ussan-a n a-d-nesmekti tamettant n Dahman Umsal, γef izrin tura 155(tawinest d semust d semus) iseggasen, s usefru d ttawin-t imir nni dγa tlawin n At Wertiran, n Imula, n At Jlil, n Wasif n Sahel fell-as.



Arumi mi d imεuccaq
Aman, aman, ata iεna-d imnufaq
Inγa Dahman, timmi n lbaz mi yujjaq
A yemma! A tin εzizen !


Arumi mi d ittqerris
Aman, aman, lmedfeε la d ittressis
Inγa Dahman, timmi n lbaz ittiγwis


Aman ucercur semmdit
Iswa-ten urumi s talwit
Six a yul ! Dahman immut tameddit


Aman ucercur aḥded
Iswa-ten urumi s lqed
Dahman immut, tγadṭ-iyi a ucbiḥ lqed


Aman ucercur hman
Iswa-ten urumi s laman
Six a yul, Dahman ibedd d nnican


Dahman ittru deg tejmaεt
A Imula, nek γileγ ayen xedmeγ d-tacebaht
Six a yul γef nek ur isεin tarbaεt


Dahman ittru deg wseqif
Menεi-iyi a sidi Crif
Ur k mniεeγ terziṭ aqebtan n Stif


Dahman ittru γer umnar
Menε-iyi a lalla m leγyar
Ur k mniεeγ, terziṭ aqebtan deg wdar


Dahman ittru deg lhara
Menε-iyi a lalla Myasa
Ur k mniεeγ terziṭ aqebtan ass-a


Dahman ittru deg wgnes
Menε-iyi a lalla Tawes
Ur k mniεeγ terziṭ aqebtan deg ‘γes


Dahman ittru deg tkenna
Menε-iyi a lalla Zwina
Ur k mniεeγ terziṭ aqebtan ass-a


Ğğur ixdem urumi * iwwi-d aqcic d-ajleli
Iwwi-t γer Bgayet * tnneεğab deg-s tmuγli
Isbedd it id d nnican * ahlil yemma-s teṭilli


Ğğur ixdem urumi * iwwi-d aqcic d-amrabeṭ
Issawḍ it γer Bgayet * ism-is yura deg lkaγeṭ
Isbedd-it d nnican * ahlil yemma-s mi tewweṭ

Ğğur ixdem urumi * Iwwi-d aqcic seg Mula
Iwwi-t γer Bgayet * Ism-is yura deg lkarta
Isbedd it id d nnican * ahlil yemma-s mi tella

Ğğur ixdem urumi * iwwi-d aqcic d lεalit
Iwwi-t γer Bgayet * tnneεğab deg-s trumit
Aws a Rebbi ! A izwawen ! * tebram yak i teqbaylit