Asefru n Σmeṛ amceddal (~1850)

Wa d cwiṭ seg usefru n Σmeṛ amceddal iga γef unekcum uṛumi γer tmurt.


A yixf-iw ekker ur ggan
dacu i k-ilhan ?
Amek ar ad ak-iγḍer yiḍes ?
Lεibad fnan
sens-ed a yuzmir times !

ass mi d-iffeγ uqeṛsan
Afṛansis iqwan
Ihecd-d leğnas-nes
Tura ahat-en εezben s iγnan
Lezzayer tucbiḥt tekkes

Uliγ γer uxxam n selṭan
Deg kkaten ddiwan
Ufiγ γas tegnitt tefres
Amalah! Inza laman
A win ittεeğben da ad t-tsres

Ecawc nni din illan
Amek i s nnan ?
I ubaca d terbaεt-ines
Ikfa unesnes d lγiwan
Win innumen lεezz ittekkes

Lmexzen b udrim imelan
N uṛeγ icelwan
Iwwi-ten akk wer lḥess
Ilemm iten maṛican(maréchal),
Lekkmanda akk d ṛṛays

Lebṛuj zzin-d am itran
εedmen imawlan
Ikcm-iten imγeṭes
D aṛumi igqwan
Siḥ a izri idim nesses

…
Nek wehmeγ deg m laγrur
Xerben lumuṛ
Teẓram a medden lqiyam
Fkkan-d lebḥur
Ilfan iqqazen aḥemmam

D iγerṣiwen wer tfuṛ
Azagur iččuṛ
Deg uqeṛṛu igan akmam
D uεwijen llehduṛ
Ur tfehmem ayen teslam

Traḍ n iqudam n cruṛ
Am win ittṛuzun lbuṛ
Win ur teben iselqam
Igseḥa iqquṛ
Amdiq-nsen d-asemmam

Di lmedfeε ad d-izuγuṛ
Issn-as bu leεeṛur
Imi iwwet isbek am leγman
S ddubli iččuṛ
D igedrez lewhi uḥiyyam

Tasa-w tfelleq am ujeqduṛ
Seg mesli ituṛ
Sliγ-as imi tnnegdam
Dehceγ am beqquṛ
Γas ay tga trewla s axxam

Ass n sebt tεedda ṭhur
Imi d-zḍan d sduṛ
Γer tegzirt a i d nelqam
S lbumba d lkkuṛ
S lebεid i d-ires uεellam

…

Isal iẓri am sdud
Γef tin iḍran abrid-a
Si Ḥanif ar Bumesεud
Yewen ur t-iεuda
Wid illan d izmawen at waffud
Tura teqql-asen tberda

Yuγ-d asif γer iswi meqsud
Ur irgagi uṭeḥḥin ur yugda
S ṭbul s nḥas am rεud
Isrus-d rεac imi t-ibda
Γer Bgayet iga lmewεud
Iṛuḥ ihwa tabuda

S cenna ma theddeṛ trumit
Nutenti urwent at tezmart
Win ikkren icebbeḥ am teslit
Ziγ at lislam d lxalat
Tezwar-aγ akk tergagit
Anagar at ddhat

Neqqel deg ifeg-ik, delq-it
A yucbiḥ a bu lkeffat
Sbaḥ zik lewhi tẓallit
Ma ad tekkreḍ uqbel tafat
Lεaṛc illul qesd-it
Icellaḍen εnu lembat
Mmi-s n cix(Ben Ali Crif) ẓr-it
Seg tidett in-as snat
A win isneggren tajaddit
Γas baba-s d bu tinzart

Atan ikcm-aγ-d ufeḍulli
Maṛican bu-ddin n nḥas
Cεaṛ deg udem ur yilli
Lhiba amzun d aγilas
Iğğa tamurt d lxali
Issaγ i medden lweswas
Issexdem aεṛab aqbayli
Yal lεaṛc ijba fell-as



...

Σmeṛ Amceddal

Wagi daγen d amezruy mači d asefru kan...
Tanemmirt