Ula d tagi d ssalima

Tusa-d tameddit n wass
Tufa-d teğğa-tt tmacint
Ula d tazzla-s tennefḍas
Dγa ulli imensi ur t-ččint
Anef ad ttunebbhen lemwas
Ad tt-iqil kan uεessas
Allen ḍacent mačči ḍacint

Tefrawes ula d ttaylala
Mi d-tezzuḥtelli lawan-is
Γas d taderγalt tesla
Teḍleq i tferrawin-is
Teddem tewwet-itt γer lexla,
tanna "ayen yellan yella
Awer d-teqqel tmeddit-is!"

La ixef, wala aqerru i tifin
D tindict i ikersen tiyersi
Awal uffir ur d as-d-cfin
Akken ad s-d-fsin i tixsi
Tettwaqqen ẓran ur rfin
Ayefki ran ad t-id-ffin
Γas akken ur tečči imensi

D acu i d tifart ay allen
Anda a d-tafemt tamuγli
Ssusem ay imi ad ak-d-slen
Ma ulac agrireb ad yeγli
Iḍelli ḥuccen-aγ-d aslen
Ass-a deg-neγ ttaklen
Ttifxir ihi ur nettwali



Ay annect nḥemmel tidderγelt
Ziγen telha ay axeṣṣaṛ
Nerna nessenteḍ-as tizzeγyelt
Ajelkaḍ yessen ad aγ-yenher
Qqaren-aγ "ihi ur γeflet!"
A nnger-ik a lleft
Γef tγeddiwt Muḥya yehder

Sεid at Mεemmer