Tekki da akk-en ad d-tzedmeḍ asaru-ya

Yettru lṭufan

Yettru weqcic d amecṭuḥ
Imeṭṭawen-is d tiregwa
Ad s-tiniḍ ad t-iffeγ rruḥ
Yiγwas tezγeb lqaεa
Iḍelli i d-isubb si dduḥ
Yufa-d ddunit-is terka.

Weḥlen deg-s imawlan
Ur ẓrin d acu ara s-xedmen
Yelluẓ weqcic i s-nnan
Widak yebγan ad ṭṭsen
Seglafen deg yiḍ yiḍan
Amzun gzan lṭufan .

Idmaren n yemma-s ttiqin
Ayefki yugar fell-as
Iẓerr ussan ttεeddin
Učči deg mi-s d amessas
D lṭufan ifadden γlin
Yir azekka iḥulfa-yas.

Mačči d geεεu i yelluẓ
Yelluẓ tafat ad tt-iẓer
Yugi tudert n udebbuz
Baba-s d tin i d-immuger
Di dduḥ itezzi am werzuz
Yettxemmim g tura i temγer .

D yemma-s ihedder yal iḍ
S wallen amzun yeqqar-as:
"Melmi ara ifak usemmiḍ ?
Wissen melmi ara d-yali wass ?
Acimi  a yemma i yi-d-teseiḍ
Mi iγusa wejgu alemmas ? "
Tazmalt ass n 28.01.1982.





                                        
Iles

Yettuγaḍ yiles deg yimi
Yeqqim yeṭṭili
Ur yezmir ad d-yin' awal

Deffir wuglan yedduri
Yerra-tt i tguni
Ayen yeffer d izumal

Imetman ḥaca nutni
Aksum -is yelwi
Yeγli d amγar ur yuklal

Ay acedluḥ azeggaγ
Yiggas ad k- seggeγ
Ad k- degreγ i wuccanen

Lbaṭel mi ara t-ẓreγ
ṭerḍeγ ad d-neṭqeγ
Tεuggneḍ fukken imeslayen

Teẓriḍ diri  ma   ssusmeγ
Tebγiḍ ad qebleγ
Amrar s amgerḍ n watmaten .

Aḥeq iles yettwakeblen
D wallaγ yiraden
D tamdelt f uẓekka ard tekkes

Ad nẓer at laxert yeddren
Aglim f iγessan
Ifassen refden iles

Aten aya ulin-d d asawen
Agdud ad t-muqlen
Walan-t d azeqqur ires.




Zerriεa-s teγli ar wakal
Issemγi ard d-ilal
Iles-is ur ikerri ad yiγzif

G tfeqlujt tagmat tikal
Ar lḥeqq tmal
Teggul ad tekkes aγilif

Ass ad d-igrin d amellal
Ad ifak ccwal
Iles ad s-d-yuγal nnif . 
     Tazmalt ass n 17.01.1981


Tafunast n  yigujilen .

Gujlen warrac mi temmut
Tayemmat i ten-id -isεan
Baba-tsen yuγ  tameṭṭut
Teğğa-ten i laẓ d εeryan
Fell-asen tuγal tewwurt
Tafat ctaqen ad tt-ẓren

Γef wallen tafat tenger
Tebrek yal ass tettimγur
Tameṭṭut n wergaz tuεer
Ul-is qeṭṭiε d acaqur
Yelli-s tga-yas leqrar
Wiyiḍ tezzi-yasen aεrur

Ur sεin lḥeqq ar wawal
Tudra n wallen d lεada
Zzher-nnsen yečča-t wakal
G tmeqbert ahat yerka
Deg tudert zdin d ccwal
Lḥif γur-sen itekka

Tafunast tenza temzel
Aglim lsan-t d icifaḍ
Tafdult yundin ur tzeggel
Aḍu yewten d asemmaḍ
Tarwiḥt n tyemmat temdel
F uẓekka-s rran ablaḍ

Aqcic yuγal d izerzer
Yesbaεbuε ddaw n tzemmurt
Ma d wetma-s iẓri-s yenger
Tameddurt tif-itt lmut
F ṭica lxir yugar
Yal seggas fell-as d tafsut

Iεedda lweqt aberkan
Iṭij  issefsi agris
F Izerzer segmen wussan
Yuγal d amdan s timmad-is
Ittbeddil dima zzman
Tameṭṭut tečča yelli-s .
                  Tazmalt , ass n 18. 01. 1982             
                                             
                      Tabrat n umeḥbus .    
Tira tceṭṭeḥ ger wallen-iw
Yefla lkaγeḍ seg' meṭṭi
Derbuka tekkat deg wul-iw
Udem-iw yeγreq deg tidi
A yemma aql-i iman-iw
Yenγa-yi iγimi weḥd-i

Mačči d timenγiwt i  nγiγ
Mačči d tukerḍa i ukreγ
Lmut tneqq ayen i sεiγ
Nek nnan-d ilaq ad εemmde£
Ul-iw yugi γas ma bγiγ
Zzεaf yezεef d azeggaγ

A yemma aḍar irekku
Ifer n uzemmur yeqqur
A yemma d acu ad nesεu
Yegra-d wesγar d azeqqur
Lḥif i γ -yeksan yettγummu
Yemmeγ-d yekkes -aneγ amur

Ma nekkini ttwaḥebseγ
Rray d-fkiγ yettcali
Ger leḥyuḍ nek susumeγ
Berra netta yettimẓi
Ayen ffreγ ad d-yeffeγ
Ddunit merra ad t-wali

Ṣṣber a yemma ṣṣber
Am tyemmat -nniḍen
Lweqt yedha-d d umεebber
Yiggas ad s-nini d ayen
Tafat ad d-tezger i wemnar
G temda n lferḥ ad nsisen

Kkes imeṭṭi g wallen-im
Γes alamma d imeẓẓuγen
Ur ttagad ara f mmi-m
Ur tufiḍ d acu ad t-yaγen
Neggul d ṣṣwab ad d-yeqqim
S sshala neγ s yidammen . 

          Tazmalt , 07.02.1983. 

D asefru yettezririgen am waman, ladγa imi d-yectel γer wid n umeqṛan deg imedyazen. Tanemmirt i umeskar n tezwert γ-yellin tawwurt n iḥulfan agi ines izedganen.

A ddin uqabac. Akka i d isefra negh ruh ad txuxuced. Tanmirt-nwen

Azul,
Tanemirt i wmedyaz!
Isefra zaden...ula d taghuri-ines tgerrez d ayen kan!
Ah'uddu ah'unnu!!!

Newara

Wagi h´law s´s´ut-ines, ad a&e& ddisk-ines

tamdyazt am ta tuklal ad ttwiẓreg,
tanemmirt a mass Ḥud