Terwi Tebberwi
Sγur: D.Messaoudi
Terwi tebberwi
yegguma ad d-iban yixef-is
Kra ččan ṛwan yerna rran ayen ran di rrif
Kra ddan εeryan yerna zhan s yeγsan war adif
D imṛayen i yeččan d nitni i yeṭṭfen aṣarif
D imnayen i yeεran d nitni i yeddmen ssif
Terwi tebberwi
yegguma ad d-iban yixef-is
Ayen yebγun yeḍru di tmurt ur igi i uneγmas aγilif
Serrin isalen ẓiden am ttut ur yeslik weγmis m’ur yeslif
Aggag yugin kennu γur-sen m’ur yemmut yettwazen d utlif
Sseftin gar-aγ abihu berriken sseγrin tidett mi tettiẓẓif
Terwi tebberwi
yegguma ad d-iban yixef-is
Ittwasettef uγerbaz yerna ittwanna i uselmad εemmed
Гas ur yelmid unalmad kra xersum γef webrid yebεed
Inerra uγerbaz d tagrurt tanaḍt n uselmad tettwanγed
Гas ur d-yeggri di tγuri wayra nitni la qqaren tekkat treεεed
Terwi tebberwi
Igguma ad d-iban yixef-is
Siwel ay ungif susem ay ufhim
Immečč wukrif yenṭerr wufḍim
Siker amγid sutel bu-wedrim
Yemzel ur yemmid yewḥel ur yeḍlim
Terwi tebberwi
yegguma ad d-iban yixef-is
Sufella “ssidna” yezha ijjawen meṛṛa ay icedha
Swadda agdud “yerḍa” s qassamen netta yedha
Inaw-is dayem iwata yeṣka akk γef tmucuha
Win ikerhen ay d-yenna aḍad γur-s iwehha
Terwi tebberwi
yegguma ad d-iban yixef-is
Yal argaz nebγa γeḍlen-t ur d-yuli
Ma d win d-sbedden fell-aγ ur d-yedli
Yal ma nḍal s azekka skeflen-d iḍelli
Ma γef iḍelli ssawlen deg-s ur nelli
Terwi tebberwi
yegguma ad d-iban yixef-is
Nnan kkset taṛumit ta d tutlayt n wid yeggumin
Asmi nessuter tamaziγt sserkin-d fell-aγ at-ddin
Asmi tenneḍran tlafsa γur-sen qeblen zunik ay ugin
Nnan daγ si tama nniḍen yefti wazal n taεrabt γef sin
Terwi tebberwi
Igguma ad d-iban yixef-is
Di yal tiγmert ağadarmi neγ aεsekri ibded di tili
Imi nitni d inezgalen n tmetti γur-sen aqader ur yelli
M’ur k-iwala tumeẓ-ik tegdi s tṛuka ara k-yessemlelli
Ma teccetkaḍ fell-ak terki yax anezzarfu yid-s yettili
Terwi tebberwi
Igguma ad d-iban yixef-is
Mahel ar d-ifak waggur tessutreḍ adrim di medden
Xemmel ad d-tawiḍ amur s yicekkalen ara k-ddmen
Nṣebber ar d fell-aγ iferreğ kemmlen deg-neγ ẓẓaden
Uqbel ar d fell-aγ ifeğğeğ s ugerruj ad sriffgen
Terwi tebberwi
Igguma ad d-iban yixef-is
Seg mi terwi tebberwi γef yizzayriyen
Uγalen meṛṛa am yiḍan yesḍen
Deg wagar-asen s urrif la ttemyegzaren
Armi ttun wid-nni i ten-yesmerkayen
Terwi tebberwi