Melmi ara yesleb urumi?
Sécurité dans les hôpitaux psychiatrique
Urgaγ ddunit tenneqlab, tuγal d amejjay imeslab,
kra gar imuḍan-is d irumyen.
Wiyaḍ merra d ṭṭellab, sεan neγ bubben laṣel aεrab,
s nnefxa deg-s i yessalayen.
Amejjay yessaked ṣṣifa, yezwar yesteqsa at Faffa,
sakin yuγal γer widen.
Inuda ad yegzu tilufa, maca, ayen deg-sen yufa,
mačči d ayen yemgaraden.
Am irumyen, am waεraben, d taḍṣa n medden i ten-yesselben,
slaqaben-ten ṣṣbeḥ, tameddit.
Ẓẓayet teεkemt bubben, ata wayen i ten-iceγben:
"Ur ssinen ara taqbaylit".
Yenna-yasen "ulac aγbel, awi-d kan ul ad tt-yeqbel,
yella ttawil i waya".
Nnan-as "si yir lehdur nemmel, aha mel-aγ-d amek, γiwel!
Sani ad ner mi ara neffeγ sya"?
“Ay arumi kečč tqefzeḍ, ihi nadi ad tafeḍ,
ddu, ur d-yeqqim waddud!
Ayen-nniḍen akk d leγlaḍ, ḍfer kan abrid Uzerrad,
win yenjer dadda-s Lmulud!
I kečč ay aεrab yak tesliḍ neγ triḍ ad teqqimeḍ akka telliḍ,
ad truḥeḍ si ṭṭlam γer wayeḍ?
Taqbaylit ma ur tt-teγriḍ, ddunit amzun ur tt-teẓriḍ,
maca, awer d ak-taweḍ”!
Aεrab yeεreḍ ad yelmed, maca, awer d as-taweḍ,
aqerru n wefḍis yeqqur.
S arumi ad nessefqed, ad nawli anda yewweḍ,
ma yekkat-itt s ucaqur.
D tidet ddunit tenneqlab, arumi yeqqel yessen ṣṣwab,
yettmeslay tutlayt n Muḥya.
Aqbayli akken d-yenneqlab, wungif yeεraq-as ṣṣwab,
yeqqel s yiman-is yeṣṣeḍḥa.
yeqqel s yiman-is yeṣṣeḍḥa, tagi n tikkelt-a tṣeḥḥa,
d tiγrit s wazal-is.
Dγa ul-is deg-s yerḥa, lemmer ad yili s tidet Ğeḥḥa,
ur izemmer ad t-yerr tezleg tikli-s.
S tγawla i yetteddu ad yaweḍ, d tazla zdeffir Uzerrad,
deg webrid yenjer dda Lmulud.
Ay arumi tugadeḍ! Maca, imi kečč tzewreḍ,
temmektiḍ-d tesεiḍ lejdud.
Ay arumi din din tukiḍ, dγa di teqbaylit teğğiḍ,
γer tefransist tuγaleḍ.
Tanemmirt γef kra d aγ-tefkiḍ, neḍfer-ik mi d aγ-d-tewwiḍ
s iman-nneγ γer d-aγ-tezzuγreḍ!
La yekkat ugeffur tura, nekk yeṭṭṣen berra,
ffeεfaεeγ-d seg yiḍes.
A ziγ ur tenneqlab ara! Ma d kra din merra,
allaγ-iw i usaru-s la yettales.
Γas d targit ideg kecmeγ, griγ-d ssarameγ
ur tettγama kan d lekteb.
Ay asirem a k-nessawaleγ, ahat a k-γaḍeγ,
ini-yas i urumi ad yesleb!!!
Sεid At Mεemmer