Atan usefru d tajmilt i xedmeγ γef Dda Lmulud ass n lmmut-is,
26 di furar aseggas 89, ad fell-as isuref wednaw.
Imeṭṭi n wegdud
Fell-ak cebḥen-d i lekdeb
Σinani iγ-iceggeb
Di lqayeq yekmen lesrar
Nunez-as i tidett ad tenẓar
Tadyant n εin Ddefla
Di tyemmett teğğa ccama
Tegla ula s wegdud-is
Ma d nekk ur umineγ ara
S isallen d yefrurin maṛṛa
D tismin i yeγban udem-is
Yeḥzen wul-iw f lğedra
Rran-t d aqejmur yerkka
D isegmi i-d leqrar-is
S tezmart aẓar-is yeṛṣa
Yefti maṛṛa di tmazγa
Γelten seg-s warraw-is
Tamettant n Dda Lmulud
Tessargagi kra yellan d afud
Yesεan tissas f tezzayrit
D imeṭṭi i d amur n wegdud
Γef kra yeğğa unarfud
N taγult tadelsant n tmaziγt
Melmi !... ara ad d-telli tewwurt ?
Melmi !... ara ad tifrir tagut ?
Melmi !... ara ad d-terzu talwit ?
Alami d asmi teḥwağ tmurt,
Dda lmulud yemmut,
Ḥzen fell-as a Taqbaylit ...
Amar Mokrani seg iwaḍiyen